នាយករដ្ឋមន្រ្តីអូស្ត្រាលី បានកោតសរសើរ និងវាយតម្លៃខ្ពស់ថាភាពជាអ្នកដឹកនាំរបស់សម្តេចតេជោ ហ៊ុន សែន ក្នុងនាមជាប្រធានអាស៊ាន ដែលខិតខំរកដំណោះស្រាយស្ដីពីវិបត្តិមីយ៉ាន់ម៉ា
ភ្នំពេញ៖ ឯកឧត្ដម Anthony Albanese នាយករដ្ឋមន្ត្រីអូស្ត្រាលី បានវាយតម្លៃខ្ពស់ចំពោះភាពជាអ្នកដឹកនាំរបស់សម្តេចតេជោ ហ៊ុន សែន ក្នុងនាមជាប្រធានអាស៊ានឆ្នាំ២០២២ និងខិតខំស្វែងរកដំណោះស្រាយ ចំពោះវិបត្តិប្រទេសមីយ៉ាន់ម៉ា។ នេះបើយោងតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរនាថ្ងៃទី១២ ខែវិច្ឆិកា ឆ្នាំ២០២២នេះ។
នៅក្នុងកម្មវិធីជំនួបពិភាក្សាទ្វេភាគី នាឱកាសនៃកិច្ចប្រជុំកំពូលអាស៊ាន និងកិច្ចប្រជុំកំពូលដែលពាក់ព័ន្ធ នាថ្ងៃទី១២ ខែវិច្ឆិកា ឆ្នាំ២០២២ ឯកឧត្ដមAnthony Albanese ក៏បានថ្លែងអំណរគុណចំពោះសម្តេចតេជោ ហ៊ុន សែន ដែលបានអំពាវនាវឱ្យមានការដោះលែងសាស្ត្រាចារ្យសញ្ជាតិអូស្ត្រាលី Sean Turnell ផងដែរ។
សម្តេចតេជោ ហ៊ុន សែន និងឯកឧត្ដម Anthony Albanese ក៏បានផ្លាស់ប្តូរទស្សនៈអំពីបញ្ហាតំបន់ និងអន្តរជាតិមួយចំនួនថែមទៀតដែលជាបញ្ហាកង្វល់រួម។
គូសបញ្ជាក់ពីនេះ លោកនាយករដ្ឋមន្រ្តីទាំងពីរ ក៏បានចែករំលែកសេចក្តីសោមន្សរីករាយក្នុងឱកាសខួបអនុស្សាវរីយ៍លើកទី៧០ នៃការបង្កើតទំនាក់ទំនងការទូតរវាងកម្ពុជា.អូស្ដ្រាលី។ ថ្នាក់ដឹកនាំទាំងពីរក៏បានវាយតម្លៃខ្ពស់ ចំពោះភាពរីកចម្រើននៃទំនាក់ទំនង និងកិច្ចសហប្រតិបត្តិការលើគ្រប់វិស័យរវាងប្រទេសទាំងពីរ។
សូមគូសបញ្ជាក់បន្ថែមថា នាក្នុងអំឡុងកិច្ចប្រជុំកំពូលអាស៊ាន លើកទី៤០.៤១ មេដឹកនាំអាស៊ានទាំងអស់ នៅថ្ងៃទី១១ ខែវិច្ឆិកា ឆ្នាំ២០២២ បានវាយតម្លៃ និងសេចក្តីសម្រេចចិត្តរបស់ខ្លួន ស្តីអំពីការអនុវត្តកិច្ចព្រមព្រៀង ជាឯកច្ឆន្ទចំនូន៥ចំណុច របស់ប្រទេសមីយ៉ាន់ម៉ា។ មេដឹកនាំអាស៊ាន ក៏បានបញ្ជាក់ជាថ្មីថា ប្រទេសមីយ៉ានម៉ានៅតែជាផ្នែកដ៏សំខាន់មួយរបស់បណ្ដាប្រទេសអាស៊ាន ហើយក៏បានពិចារណាអំពីមាត្រា៧ និង២០ នៃធម្មនុញ្ញអាស៊ាន និងបានឡើងវិញនូវកិច្ចប្រជុំកំពូលអាស៊ាន លើកទី៣៨ និង៣៩ នាកន្លងមក។
មេដឹកនាំអាស៊ាន យល់ឃើញថា ស្ថានការណ៍នៅមីយ៉ាន់ម៉ានៅតែធ្ងន់ធ្ងរ និងមានភាពផុយស្រួយ ជាមួយនឹងការកើនឡើងនៃអំពើហិង្សា ដែលជាកង្វល់ចម្បងប៉ះពាល់មិនត្រឹមតែមីយ៉ាន់ម៉ាប៉ុណ្ណោះទេ ថែមទាំងដល់កិច្ចខិតខំប្រឹងប្រែងកសាងសហគមន៍អាស៊ានផងដែរនោះ អាស៊ានប្ដេជ្ញាចិត្តជួយមីយ៉ាន់ម៉ាក្នុងការស្វែងរកដំណោះស្រាយដោយសន្តិវិធី និងយូរអង្វែងសម្រាប់វិបត្តិបច្ចុប្បន្ន។ ជាមួយនឹងភាពជឿនលឿនតិចតួច ដែលសម្រេចបានក្នុងការអនុវត្តកិច្ចព្រមព្រៀងជាឯកច្ឆន្ទប្រាំចំណុច កងទ័ពជាតិមីយ៉ាន់ម៉ាមានតួនាទីក្នុងការអនុវត្តតាមការប្តេជ្ញាចិត្តចំពោះថ្នាក់ដឹកនាំ អាស៊ាន ។។
