ភ្នំពេញ៖ ប្រធានាធិបតីកូរ៉េខាងត្បូង លោក យូន ស៊ុកយុល [Yoon Suk-yeol] បានសន្យាបង្កើតជំនួយទ្វេដង និងជំរុញការវិនិយោគឱ្យកាន់តែច្រើនមកកាន់កម្ពុជា។
ប្រធានាធិបតីកូរ៉េខាងត្បូង បានមានប្រសាសន៍លើកឡើងនៅក្នុងជំនួបពិភាក្សាការងារជាមួយសម្តេចតេជោ ហ៊ុន សែន នាយករដ្ឋមន្ត្រីកម្ពុជា នារសៀលថ្ងៃសុក្រ ទី១១ ខែវិច្ឆិកា ឆ្នាំ២០២២។
លោកប្រធានាធិបតី ក៏បានសម្តែងការពេញចិត្ត ចំពោះកិច្ចសហប្រតិបត្តិការទ្វេភាគី ជាពិសេសលើវិស័យពាណិជ្ជកម្ម វិនិយោគ ទំនាក់ទំនងរវាងរដ្ឋាភិបាល និងរដ្ឋាភិបាល, វិស័យឯកជន និងឯកជន ព្រមទាំងប្រជាជន និងប្រជាជន។
លោកប្រធានាធិបតីកូរ៉េខាងត្បូង បានបញ្ជាក់ថា ទំនាក់ទំនងរយៈពេលតែ ២៥ឆ្នាំ ទំហំពាណិជ្ជកម្មរវាងប្រទេសទាំងពីរ បានកើនឡើង ២០ដង។ ការរីកចម្រើនលើផ្នែកពាណិជ្ជកម្មនេះ កូរ៉េ ចាត់ទុកការអភិវឌ្ឍប្រកបដោយចីរភាពរបស់ប្រទេសកម្ពុជា ជាអាទិភាពមួយដ៏ល្អ។
សូមបញ្ជាក់ថា ប្រទេសកម្ពុជា និងប្រទេសកូរ៉េខាងត្បូង បានតភ្ជាប់ទំនាក់ទំនងគ្នាឡើងវិញនៅថ្ងៃទី៣០ ខែតុលា ឆ្នាំ១៩៩៧ ក្រោយការផ្តួចផ្តើមដោយផ្ទាល់ពីសំណាក់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ជាមួយឯកឧត្ដម គឹម យ៉ុងសាន ។
