ឯកឧត្តមទេសរដ្ឋមន្ត្រី មាស សុភា អញ្ជើញជាអធិបតីក្នុងពិធីប្រណាំងទូកលក្ខណៈសហគមន៍ អបអរសាទរព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ

ភ្នំពេញ៖ ឯកឧត្តមទេសរដ្ឋមន្ត្រី មាស សុភា ប្រធានក្រុមការងាររាជរដ្ឋាភិបាល ចុះមូលដ្ឋានខេត្តព្រះវិហារ ឯកឧត្តម សួស យ៉ារ៉ា អ្នកតំណាងរាស្តមណ្ឌលខេត្តព្រះវិហារ ឯកឧត្តម គីម រិទ្ធី អភិបាលខេត្ត ព្រមទាំងថ្នាក់ដឹកនាំខេត្ត មន្ត្រីរាជការ ប្រជាពលរដ្ឋយ៉ាងច្រើនកុះករ នាព្រឹកថ្ងៃទី០៧ ខែវិច្ឆិកា ឆ្នាំ២០២២ បានអញ្ជើញជាអធិបតីក្នុងពិធីប្រណាំងទូកលក្ខណៈសហគមន៍ អបអរសាទរព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ ដែលបានធ្វើឡើងនៅសហគមន៍ទេសចរណ៍ទំនប់៩៥ ស្ថិតក្នុងសង្កាត់ប៉ាលហាល ក្រុងព្រះវិហារ។

ឯកឧត្តម មាស សុភា បានថ្លែងពាំនាំការផ្តាំផ្ញើសាកសួរសុខទុក្ខ ដោយក្តីនឹករលឹក ពីសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋទូទាំងខេត្តព្រះវិហារ ក្នុងឱកាសដ៍សែនសប្បាយរីករាយ នៃពីធីអុំទូក នាថ្ងៃនេះ។

ឯកឧត្តមទេសរដ្ឋមន្ត្រី បានបញ្ជាក់ថា «ឆ្នាំនេះព្រះរាជាណាចក្រកម្ពុជាយើង ស្ថិតក្នុងសន្តិភាព និងការអភិវឌ្ឍ និងមានក្តីសប្បាយរីករាយ ដោយខេត្តភាគច្រើននៅទូទាំងប្រទេស ប្រារព្វពិធីបុណ្យអុំទូកអកអំបុក។ សម្រាប់រាជធានីភ្នំពេញដោយសារឆ្នាំនេះប្រទេសយើង រៀបចំកិច្ចប្រជុំអាស៊ាន ចំឱកាសជារៀងរាល់ឆ្នាំយើងបានប្រារព្វព្រះរាជពិធីបុណ្យអុំទូកនេះ ដូច្នេះយើងមិនបានចាត់តាំងព្រះរាជពិធីបុណ្យអុំទូកទេ ប៉ុន្តែអនុញាតឱ្យខេត្តនីមួយៗដែលមានលទ្ធភាពរៀបចំពិធីបុណ្យអុំទូក ដែលជាបុណ្យប្រពៃណីជាតិរបស់យើង»។

បន្ថែមពីនេះទៀត មាស សុភា បានលើកឡើងថា ដោយឡែកនៅខេត្តព្រះវិហាររបស់យើង ជាខេត្តឆ្ងាយដាច់ស្រយ៉ាល ជាខេត្តដែលស្ថិតនៅក្នុងតំបន់ព្រៃភ្នំ មានទន្លេ មានបឹងបួ ដែលជារៀងរាល់ឆ្នាំយើងបានចាត់តាំងពិធីបុណ្យអុំទូកដែរ ប៉ុន្តែក្នុងរយះពេលនៃជំងឺកូវីដ១៩ គឺយើងបានអាក់ខាន។

ការរៀបចំពិធីបុណ្យអុំទូក បណ្តែតប្រទីប នៅទំនប់៩៥នេះ ជាលើកទី១ ដែលកន្លងមកមិនធ្លាប់បានរៀបចំទេ ហើយការរៀបចំនេះក្រោមការផ្តួចផ្តើមពីឯកឧត្តម គីម រិទ្ធី អភិបាលខេត្ត។

ឯកឧត្តមទេសរដ្ឋមន្រ្តី ក៏បានអំពាវនាវដល់ប្រជាពលរដ្ឋយើងត្រូវចូលរួមការពារនូវសុខសន្តិភាព ដែលសម្តេចតេជោ ហ៊ុន សែន បានខិតខំដោយលំបាក ដើម្បីឱ្យប្រទេសជាតិយើងការតែអភិវឌ្ឍន៍រីកចម្រើនថែមទៀត៕