ភ្នំពេញ៖ ក្រសួអប់រំយុវជន និងកីឡាបានបញ្ជ្រាបការការយល់ដឹងពីផលប៉ះពាល់ នៃការប្រើប្រាស់គ្រឿងស្រវឹងដល់យុវជនដើម្បីឱ្យពួកគេចៀសឆ្ងាយពីគ្រឿងស្រវឹងគ្រប់ប្រភេទ ។
នេះបើតាមការបញ្ជាក់ពី លោកជំទាវ បណ្ឌិតសឿ សុជាតា អនុរដ្ឋលេខាធិការក្រសួងអប់រំ យុវជន និងកីឡាកាលពីថ្ងៃទី១១ ខែតុលា ឆ្នាំ២០២២ នៅពេលដែលលោកជំទាវអញ្ជើញជាគណៈអធិបតី និងជា មេប្រយោគផ្តល់ពិន្ទុ ដល់បក្ខជនបក្ខនារី នៅក្នុងវគ្គពាក់កណ្តាលផ្តាច់ព្រ័ត្រ នៃកម្មវិធីប្រកួតនិយាយជាសាធារណៈស្ដីពីការហាមឃាត់ការផ្សាយពាណិជ្ជកម្មគ្រឿងស្រវឹងគ្រប់ទម្រង់ គ្រប់រូបភាពក្នុងព្រឹត្តិការណ៍កីឡានិងទីកន្លែងប្រកួតកីឡាដែលរៀបចំឡើងដោយក្រសួងអប់រំ យុវជន និងកីឡា។
លោកជំទាវ បណ្ឌិតសឿ សុជាតាមានប្រសាសន៍ថា បច្ចុប្បន្ននេះ ក្រសួងអប់រំបានរៀបចំឱ្យមានគោលនយោបាយសុខភាពសិក្សាដោយចាត់ទុកបញ្ហាសុខភាពរបស់សិស្សជាអាទិភាពទី១។
សំឡេង៖ «កម្មវិធីសិក្សាដែលនាយកដ្ឋានសុខភាពសិក្សា នៃក្រសួងអប់រំបានយកទៅអនុវត្តន៍ចាប់ពីពេលនេះតទៅ ដោយបានបង្ហាញថា ដើម្បីទទួលបានសុខភាពល្អ ព្រោះថា សុខភាពគឺជាកក្តាទី១សុខភាពគឺជាជីវិត។ ដើម្បីចង់បង្ហាញថា គ្រឿងស្រវឹងមានផលប៉ះពាល់ដល់សុខភាពបែបណានោះ ? ទើបក្រសួងអប់រំយុវជន និងកីឡាបានសហការជាមួយអង្គការចលនាដើម្បីសុខភាពកម្ពុជារៀបចំកម្មវិធីប្រកួតនិយាយជាសាធារណៈស្ដីពីការហាមឃាត់ការផ្សាយពាណិជ្ជកម្មគ្រឿងស្រវឹងគ្រប់ទម្រង់គ្រប់រូបភាពក្នុងព្រឹត្តិការណ៍កីឡានិងទីកន្លែងប្រកួតកីឡានេះឡើង»។
ក្រុមសិស្សនិស្សិតបានគាំទ្រចំពោះក្រសួងអប់រំ ព្រោះសកម្មភាពរបស់ឧស្សាហកម្មគ្រឿងស្រវឹងកំពុងបានជះឥទ្ធិពលអាក្រក់ជាច្រើន គឺកុមារនិងយុវជន បង្កើតឱ្យមានអំពើហិង្សានៅក្នុងគ្រួសារ សហគមន៍ខាតបង់ថវិកា និងប៉ះពាល់សុខភាពជាដើម។
បើយោងតាមអង្គការសុខភាពពិភពលោកបានឱ្យដឹងថា មានមនុស្សនៅលើពិភពលោកប្រមាណ៣លាននាក់បានស្លាប់ជារៀងរាល់ឆ្នាំ ហើយបានបន្សល់នូវជំងឺប្រមាណ២០០ប្រភេទដល់អ្នកប្រើប្រាស់គ្រឿងស្រវឹង ដូចជា៖ ជំងឺមហារីកថ្លើម មហារីកបំពង់អាហារ និងជំងឺក្រិនថ្លើមជាដើម។
ក្រុមនិស្សិតបានបញ្ជាក់ថាដើម្បីដោះស្រាយបញ្ហានេះ អ្នកពាក់ព័ន្ធទាំងអស់គូរតែរឹតបន្តឹងការធ្វើទីផ្សារ និងបញ្ឈប់ការផ្សាយពាណិជ្ជកម្មគ្រឿងស្រវឹងគ្រប់រូបភាព។ ដោយត្រូវតម្លើងពន្ធលើផលិតផលគ្រឿងស្រវឹងឱ្យខ្ពស់ ដើម្បីបង្កើនចំណូលចូលថវិកាជាតិ និងកាត់បន្ថយអ្នកប្រើប្រាស់បានមួយកម្រិតផងដែរ៕ ( អត្ថបទ៖ ដោយវិទ្យុមិត្តភាពកម្ពុជាចិន )
