ភ្នំពេញ៖ នៅបញ្ជាការដ្ឋានកងទ័ពជើងគោក នៅថ្ងៃទី៥ ខែតុលា ឆ្នាំ២០២២ មានផ្សព្វផ្សាយសៀវភៅសរការពារជាតិ ជូនថ្នាក់ដឹលនាំ នាយទាហាន បញ្ជាការដ្ឋានកងទ័ពជើងគោក ក្រោមអធិបតីភាព ឧត្តមសេនីយ៍ឯក ខៀវ សាផាត អគ្គលេខាធិការរង នាយករង នាយកដ្ឋានបុគ្គលិក ក្រសួងការពារជាតិ និជាអនុប្រធាន ក្រុមការងារ សៀវភៅសរការពារជាតិ និងឧត្តមសេនីយ៍ឯក ថោង ថាវរិន្ទ មេបញ្ជាការរង កងទ័ពជើងគោក ។
ជំនួសមុខឲ្យនាយទាហាន នាយទាហានរង និងពលទាហាន នៃបញ្ជាការដ្ឋានកងទ័ពជើងគោក សូមថ្លែងអរគុណដល់ឧត្តមសេនីយ៍ឯក ខៀវ សាផាត ព្រមទាំងសមាជិកទាំងអស់ដែលបានអញ្ជើញមកផ្សព្វផ្សាយខ្លឹមសារ សៀវភៅសរការពារជាតិ ជូននាយទាហាន ថ្នាក់ដឹកនាំ កងឯកភាព សា្ថប័ន ចំណុះកងទ័ពជើងគោក នាពេលនេះ ដែលជាត្រីវិស័យ និងជាគោលនយោបាយ យុទ្ធសាស្ត្រវិស័យការពារជាតិ របស់រាជរដ្ឋាភិបាល នៃព្រះរាជាណាចក្រកម្ពុជា ។
នៅក្នុងឱកាសនៃនោះ ឧត្តមសេនីយ៍ឯក ខៀវ សាផាត បានធ្វើបទបង្ហាញពីសៀវភៅសរការពារជាតិ ជូនអង្គពិធីជាបន្ទាប់រួមមាន៖ ទស្សនៈចំពោះការអនុវត្តន៍គោលនយោបាយការពារជាតិ . យុទ្ធសាស្ត្រការពារជាតិ និងការអនុវត្តន៍ផែនការយុទ្ធសាស្ត្រ ។ បទបង្ហាញក៏បានរំលេចផងដែរពីគោលបំណងការចងក្រងសៀវភៅសរការពារជាតិ សារសំខាន់សៀវភៅសរការពារជាតិ ប្រវត្តិនៃសៀវភៅសរការពារជាតិ និងឯកសារវិវេចនាយុទ្ធសាស្ត្រការពារជាតិ ។
ឧត្តមសេនីយ៍ឯក ខៀវ សាផាត បានបន្ថែមទៀតថា គោលបំណងនៃការផ្សព្វផ្សាយនេះដើម្បីឆ្លុះបញ្ចាំងការប្តេជ្ញាចិត្តខ្ពស់របស់រាជរដ្ឋាភិបាលលើការអភិវឌ្ឍន៍វិស័យការពារជាតិ សិក្សា ស្វែងយល់ និងពង្រឹងការយល់ដឹងលើវិស័យការពារជាតិ បង្ហាញតម្លាភាពនៃគោលនយោបាយការពារជាតិ ដល់មជ្ឍដ្ឋានជាតិ និងអន្តរជាតិ ។
ឧត្តមសេនីយ៍ឯក ខៀវ សាផាត បានបញ្ជាក់ថា សៀវភៅសរការពារជាតិ មានសារសំខាន់ណាស់ ជាមគ្គុទេសសម្រាប់ព្រះរាជាណាចក្រកម្ពុជា លើវិស័យការពារជាតិ និងជាឯកសារគោលសម្រាប់ការធ្វើកំណែរទម្រង់ និងទំនើបកម្មកងយោធពលខេមរភូមិន្ទ រៀបចំផែនការយុទ្ធសាស្ត្រ នៃអង្គភាពនីមួយៗ ។
ឧត្តមសេនីយ៍ឯក ខៀវ សាផាត សង្ឃឹមយ៉ាងមុតមាំថាក្រោយទទួលបានការផ្សព្វផ្សាយសៀវភៅសរការពារជាតិនេះ គ្រប់បណ្តាអង្គភាពកងទ័ពជើងគោកនិងយល់កាន់តែច្បាស់អំពីតួនាទីភារកិច្ចរបស់កងយោធពលខេមរភូមិន្ទ កម្មវិធីនយោបាយរបស់រាជរដ្ឋាភិបាលលើវិស័យការពារជាតិ ដើម្បីអនុវត្តន៍បានត្រឹមត្រូវឈានឆ្ពោះទៅធ្វើទំនើបកម្ម កងយោធពលខេមរភូមិន្ទ ៕
