មេបញ្ជាការកងពលតូចថ្មើរជើងលេខ៥៣ អញ្ជើញចូលរួមក្នុងពិធីសួរសុខទុក្ខ និងចែកអំណោយមនុស្សធម៌របស់សាខាកាកបាទក្រហមកម្ពុជា ខេត្តបាត់ដំបង

ភ្នំពេញ៖​ ឧត្តមសេនីយ៍ត្រី កែវ សេងលន មេបញ្ជាការកងពលតូចថ្មេីរជេីងលេខ៥៣​ នៅព្រឹកថ្ងៃទី២ ខែតុលា ឆ្នាំ២០២២ បានអញ្ជើញ ចូលរួមក្នុងពិធីចុះសួរសុខទុក្ខ និងចែកអំណោយមនុស្សធម៌របស់សាខាកាកបាទក្រហមកម្ពុជាខេត្តបាត់ដំបង ដឹកនាំដោយ ឯកឧត្តម សុខ លូ អភិបាល នៃគណៈអភិបាលខេត្តបាត់ដំបង ជូនប្រជាពលរដ្ឋ ដែលរងគ្រោះដោយទឹកជំនន់នាពេលថ្មីៗនេះ ចំនួន២៥០ គ្រួសារ ស្ថិតនៅភូមិ បឹងសង្កែ ឃុំអំពិលប្រាំដើម ស្រុកបវេល ខេត្តបាត់ដំបង ។

លោកឧត្តមសេនីយ៍ត្រី មេបញ្ជាការកងពល បានមានប្រសាសន៍ថា ប្រជាពលរដ្ឋទាំង២៥០គ្រួសារនេះ ត្រូវបានទឹកជំនន់ទឹកភ្លៀងជន់ជោរលិចផ្ទះសម្បែង ហើយត្រូវបានសង្គ្រោះដោយកងកម្លាំងវរសេនាតូចលេខ៥៣៣ កងពលតូចថ្មើរជើងលេខ៥៣ សហការជាមួយអាជ្ញាធរមូលដ្ឋាន បញ្ជូនមកកាន់ទីទួលសុវត្ថិភាព។

លោកក៏បានគោរពកោតសរសើរដល់ ឯកឧត្តម អភិបាល នៃគណៈអភិបាលខេត្តបាត់ដំបង បានដឹកនាំប្រតិភូចុះមកសួរសុខទុក្ខ ព្រមទាំងនាំយកអំណោយចែកជូនប្រជាពលរដ្ឋបានទាន់ពេលវេលា។

លោកបន្តថា កងកម្លាំង និងមន្ត្រីរាជការស៊ីវិល តែងធ្វើការជិតស្និទ្ធ និងសហការការងារជាមួយគ្នាបានយ៉ាងល្អប្រសើរគ្រប់ស្ថានការណ៍ ជាក់ស្តែងនៅក្នុងអំឡុងជំងឺកូវីត១៩ កំពុងរាតត្បាតខ្លាំង កងកម្លាំង និងមន្ត្រីរាជការស៊ីវិល បានធ្វើការជាមួយគ្នាយ៉ាងសស្រាក់សស្រាំ មិនភ័យខ្លាចឆ្លង ដើម្បីទប់ស្កាត់ការឆ្លងរាលដាល នៃជំងឺដ៏កាចសាហាវនេះចូលទៅក្នុងសហគមន៍ និងទៅក្នុងប្រទេស។ ហើយនៅពេលនេះ ប្រជាពលរដ្ឋរបស់យើងជួបការលំបាក យើងក៏បានរួមគ្នាមកជួយសង្គ្រោះទៀត។

សូមបញ្ជាក់ថា អំណោយ ដែលត្រូវបានចែកជូនប្រជាពលរដ្ឋ ក្នុង១គ្រួសារទទួលបានអង្ករ២០គីឡូក្រាម តង់កៅស៊ូ ៤×៦ម៉ែត្រចំនួន១ផ្ទាំង ទឹកត្រី១យួរ ទឹកស៊ីអ៉ីវ១យួរ មី១កេស ត្រីខ១យួរ ភួយ១ សារ៉ុង១ និងទឹកសុទ្ធ១កេសផងដែរ៕