ឯកឧត្តម កែប ជុតិមា អញ្ជើញបិទសិក្ខាសាលាស្តីពី «ស័្វយភាពសេដ្ឋកិច្ចរបស់ស្ត្រីនៅតំបន់ជនបទ និងវិធីសាស្ត្រនៃការចរចា និងសន្ធានកម្មប្រើប្រាស់ក្នុងក្របខណ្ឌ័សភា»
ភ្នំពេញ៖ ដោយឆ្លងកាត់ការធ្វើបទបង្ហាញ និងចែករំលែកនៅបទពិសោធន៍ពីសំណាក់វាគ្មិនសំខាន់ៗអង្គសិក្ខាសាលាស្តីពី «ស័្វយភាពសេដ្ឋកិច្ចរបស់ស្ត្រីនៅតំបន់ជនបទ និងវិធីសាស្ត្រនៃការចរចា និងសន្ធានកម្មប្រើប្រាស់ក្នុងក្របខណ្ឌ័សភា» អស់រយ:ពេលបីថ្ងៃកន្លងមក ត្រូវបានបិទបញ្ចប់នៅល្ងាចថ្ងៃទី២៩ ខែកញ្ញា ឆ្នាំ២០២២ ក្រោមអធិបតីភាព ឯកឧត្តម កែប ជុតិមា ប្រធានគណៈកម្មការមហាផ្ទៃ ការពារជាតិ និងមុខងារសាធារណៈ នៃរដ្ឋសភា និងជាសមាជិកនៃក្រុមសភាជាតិកម្ពុជា-APF នៅវិមានព្រឹទ្ធសភា។
ថ្លែងក្នុងឱកាសបិទអង្គសិក្ខាសាលា ឯកឧត្តម កែប ជុតិមា បានចូលរួមអបអរសាទរចំពោះការចូលរួម និងថ្លែងអំណរគុណដល់វាគ្មិនទាំងអស់ដែលបានជួយគាំទ្រក្នុងកំឡុងពេលបីថ្ងៃនេះ ដោយនាំយកនូវបទពិសោធន៍ និងជំនាញរបស់ខ្លួនមកចែករំលែក។
ឯកឧត្តមបន្តថា តាមរយៈការវិភាគដែលបានធ្វើក្នុងបទបង្ហាញ យើងសង្កេតឃើញថា ការផ្តល់សិទ្ធិអំណាចសេដ្ឋកិច្ចដល់ស្ត្រីនៅតាមជនបទ គឺជាធាតុផ្សំយ៉ាងសំខាន់ក្នុងការធ្វើឲ្យប្រសើរឡើងនូវលក្ខខណ្ឌរបស់ស្ត្រី និងការលើកកម្ពស់សមភាពរវាងបុរស និងស្ត្រី និងសម្រេចបាននូវគោលដៅអភិវឌ្ឍន៍ប្រកបដោយចីរភាពរបស់អង្គការសហប្រជាជាតិរួមទាំងពីគោលដៅ២ (បញ្ចប់ភាពអត់ឃ្លាន) និងគោលដៅទី៥ (សម្រេចបាននូវសមភាពយេនឌ័រ និងផ្តល់សិទ្ធិអំណាចដល់ស្ត្រី និងកុមារី)។
ឯកឧត្តមលើកឡើងទៀតថា នាពេលបច្ចុប្បន្ននេះ យន្តការគតិយុត្ត និងហិរញ្ញវត្ថុមាននៅក្នុងប្រទេសកម្ពុជា និងនៅក្នុងប្រទេសមួយចំនួនក្នុងពិភពលោក។ យន្តការទាំងនេះមានគោលបំណងគាំទ្រដល់ស្ត្រីនៅតាមជនបទ និងកែលម្អលទ្ធភាពទទួលបានសេវាហិរញ្ញវត្ថុ និងប័ណ្ណកម្មសិទ្ធិដីធ្លី។ នៅកម្ពុជាយើងមានក្របខ័ណ្ឌជាតិមួយចំនួនដូចជា យុទ្ធសាស្ត្រចតុកោណ និងយុទ្ធសាស្ត្រនារីរតនៈរបស់រដ្ឋាភិបាល ដែលសុទ្ធសឹងតែមានគោលបំណងជួយស្រ្តីឲ្យទទួលបាននូវស័្វយភាព។ លើសពីនេះ យន្តការផ្សេងទៀតដែលពង្រឹងអំណាចសេដ្ឋកិច្ចរបស់ស្ត្រីត្រូវបានចែករំលែកដោយវាគ្មិន ដែលអនុញ្ញាតឲ្យយើងឆ្លុះបញ្ចាំងរួមគ្នាលើសកម្មភាពជាអទិភាពដែលត្រូវដាក់ឲ្យដំណើរការ ជាពិសេសក្នុងបរិបទនៃការអភិវឌ្ឍក្របខ័ណ្ឌនីតិប្បញ្ញត្តិ។
ឯកឧត្តមសង្ឃឹមយ៉ាងមុតមាំថា ចំណេះដឹង បទពិសោធន៍ និងមេរៀនដែលទទួលបានពីសិក្ខាសាលានេះ លោក លោកស្រីនឹងយកទៅអនុវត្តក្នុងសកម្មភាពសភាក្នុងប្រទេសកម្ពុជា និងក្នុងកិច្ចពិភាក្សាផ្ទៃក្នុងសភា និងអន្តរសភានានា ដើម្បីឈានដល់ការឯកភាពគ្នាក្នុងអំឡុងពេលចរចាក្នុងដំណើរការនីតិប្បញ្ញត្តិជាតិផងដែរ ក៏ដូចជានៅក្នុងកិច្ចប្រជុំនៃសភាក្នុងតំបន់ ឬអន្តរជាតិ។
សិក្ខាសាលាលើប្រធានបទទាំងពីរនេះ មិនត្រឹមតែធ្វើឡើងដោយអ្នកជំនាញជាន់ខ្ពស់ប៉ុណ្ណោះទេ ថែមទាំងបានអនុញ្ញាតឲ្យមានការផ្លាស់ប្តូរបទពិសោធន៍នានាលើស្ថានភាពស្ត្រីការលំបាក និងដំណោះស្រាយចំពោះបញ្ហាទាក់ទងនឹងការពង្រឹងស្វ័យភាពរបស់ស្ត្រី និងវិធីសាស្ត្រនៃការចរចា និងការសម្របសម្រួល។ ឯកឧត្តមបានថ្លែងអំណរគុណសារជាថ្មីចំពោះ APF ដែលតែងតែឆ្លើយតបជាវិជ្ជមានចំពោះសំណើរបស់កម្ពុជាក្នុងការអនុវត្តសកម្មភាពកិច្ចសហប្រតិបត្តិការនេះលើប្រធានបទដែលយើងទាំងអស់គ្នាចាប់អារម្មណ៍ ហើយសិក្ខាសិលានេះនឹងរួមចំណែកដើម្បីលើកកម្ពស់គុណភាព និងប្រសិទ្ធភាពនៃសកម្មភាពសភាកម្ពុជា។
ឯកឧត្តមក៏បានប្រកាសបិទសិក្ខាសាលាស្តីពីស្វ័យភាពសេដ្ឋកិច្ចរបស់ស្ត្រីនៅតំបន់ជនបទ និងវិធីសាស្រ្តនៃការចរចា និងការសម្រុះសម្រួលដែលប្រើប្រាស់ក្នុងបរិបទនៃសកម្មភាពសភា ៕