រដ្ឋបាលខេត្តបាត់ដំបង ជម្រុញគ្រប់ភាគីពាក់ព័ន្ធ រៀបចំជួសជុលទូកនិងហ្វឹកហាត់ក្រុមកីឡាករត្រៀមចូលរួមប្រកួតក្នុងពិធីបុណ្យអុំទូក ថ្ងៃចេញព្រះវស្សា

ភ្នំពេញ៖ ឯកឧត្តម សុខ លូ អភិបាលខេត្តបាត់ដំបង បានជម្រុញដល់គ្រប់ស្ថាប័នមន្ទីរអង្គភាពជុំវិញខេត្តនិងអាជ្ញាធរក្រុង-ស្រុក ត្រូវរៀបចំកែលម្អធ្វើការជួសជុលទូកនិងហ្វឹកហាត់ក្រុមកីឡាករនៅតាមបណ្តាអង្គភាពនីមួយៗដើម្បីត្រៀមចូលរួមប្រកួតក្នុងពិធីបុណ្យអុំទូក បណ្តែតប្រទីបថ្ងៃចេញព្រះវស្សាឆ្នាំ២០២២ខាងមុខនេះ ។

ថ្លែងនៅក្នុងកិច្ចប្រជុំជាមួយថ្នាក់ដឹកនាំគ្រប់បណ្តាស្ថាប័នមន្ទីរអង្គភាពជុំវិញខេត្ត និងអាជ្ញាធរនៃរដ្ឋបាលក្រុង-ស្រុកនិងកងកម្លាំងប្រដាប់អាវុធទាំង៣ប្រភេទ ពិសេសក្រុមមន្ត្រីជំនាញពាក់ព័ន្ធរៀបចំពិធីបុណ្យអុំទូកចំណុះសាលាខេត្តនៅថ្ងែទី១១ ខែសីហានេះ ឯកឧត្តម សុខ លូ បានថ្លែងថា នៅថ្ងៃចេញព្រះវស្សាឆ្នាំ២០២២ខាងមុខឆាប់ៗនេះ រដ្ឋបាលខេត្តនិងចាត់តាំងឲ្យមានការប្រារព្វនូវពិធី “បុណ្យអុំទូកបណ្តែតបាញ់កាំជ្រួច”ដើម្បីអបអរសាទរ ក្នុងថ្ងៃចេញព្រះវស្សាជាថ្មីឡើងវិញ ដើម្បីប្រារព្វទៅតាមលំអាន នៃប្រពៃណីនិងទំនៀមទម្លាប់បុរមបុរាណរបស់ដូនតាខេត្តយើងជំនាន់មុនៗនិងក្រោយពីការខកខានមិនបានប្រារព្វពិធីនេះអស់រយៈពេល០២ឆ្នាំដោយសារតែវិបត្តិនៃការរាតត្បាតជំងឺកូវីដ-19ក្នុងអំឡុងឆ្នាំ២០២០និង២០២១កន្លងទៅនេះ…។

ក្នុងកិច្ចដឹកនាំប្រជុំ នាព្រឹកថ្ងៃទី១១ខែសីហា ឆ្នាំ២០២២នេះ ឯកឧត្តមអភិបាលខេត្តបាត់ដំបងដោយផ្តោតសំខាន់ ដើម្បីធ្វើការណែនាំនិងជម្រុញដល់គ្រប់ស្ថាប័នអង្គភាពនិងអាជ្ញាធរពាក់ព័ន្ធទាំងអស់ដែលកន្លងមក ធ្លាប់បានចូលរួមនៅក្នុងពិធីខាងលើនេះ គឺ៖ ធ្វើយ៉ាងណាត្រូវត្រៀមរៀបចំកែលម្អឡើងវិញនូវទូករបស់ខ្លួនដើម្បីចូលរួមប្រកួតប្រជែងនៅក្នុងពិធីបុណ្យថ្ងៃចេញព្រះវស្សា រយៈពេល២ថ្ងៃខាងមុខ និងដើម្បីត្រៀមរៀបចំធ្វើការហ្វឹកហាត់កីឡាករនិងពិនិត្យធ្វើការជួសជុលរចនាទូក របស់ខ្លួនឲ្យបានល្អ ដើម្បីចូលរួមប្រកួតកុំឲ្យមានការខកខាននៅក្នុងពីធីបុណ្យខាងលើនេះ។

ជាមួយគ្នានេះផងដែរ ឯកឧត្តមអភិបាលខេត្តក៏បានសំណូមពរដល់គ្រប់សមាសភាពពាក់ព័ន្ធទាំងអស់ត្រូវយកចិត្តទុកដាក់ក្នុងការរៀបចំនិងធ្វើការកៀរគរនិងអំពាវនាវឲ្យមានការចូលរួមពីសប្បុរសជននានាក្នុងមូលដ្ឋានស្រុកក្រុងរបស់ខ្លួន ដើម្បីគាំទ្រធនធានថវិកានិងសម្ភារៈផ្សេងៗជួយផ្គត់ផ្គង់ដល់ក្រុមកីឡាករ កីឡាការិនីអុំទូកក្នុងស្រុកនីមួយៗទៅតាមលទ្ធភាពដល់ស្រុក-ក្រុងរបស៎ខ្លួន។ ដោយឡែកពាក់ព័ន្ធជាមួយថ្នាក់ដឹកនាំនិងមន្ត្រីសំខាន់ៗរបស់សាលាខេត្តឯកឧត្តម សុខ លូ អភិបាលខេត្តបាត់ដំបង បានណែនាំឲ្យរៀបចំនូវសមាសភាពគណៈកម្មការក្នុងការចាត់ចែងរៀបចំពីធីបុណ្យនេះឲ្យបានសមស្របឆ្លើយតបបានទាន់ពេលវេលា ដើម្បីបង្កលក្ខណៈក្នុងការរៀបចំពិធីបុណ្យ ទៅដោយរលូន។

តាមការគូសបញ្ជាក់ពីឯកឧត្តមអភិបាលខេត្តប្រធានអង្គប្រជុំ ក៏បានឲ្យដឹងផងដែរថាៈការរៀបចំ
និងប្រារព្វនូវ ពិធីបុណ្យអុំទូក បណ្តែតប្រទីប អុជកាំជ្រួច និងរៀបចំការដាក់តាំងពិព័ណ៌ផលិតផល
នៅក្នុងថ្ងៃចេញព្រះវស្សាខេត្តបាត់ដំបងនេះ ក៏មានការចូលរួមពីក្រុមកីឡាករអុំទូកមកពីបណ្តាខេត្តនា
នាជិតខាងជាប់ជាមួយខេត្តបាត់ដំបង។ ហើយក្នុងនោះក៏មានវត្តមានពីក្រុមកីឡាករអុំទូកនិងក្រុមម៉ូតូហោះមកពីប្រទេសថៃ ដែលជាខេត្តភូមិផងជាប់ជាមួយនិងខេត្តបាត់ដំបងផងដែរ។

ការរៀបចំពិនូវធីបុណ្យអុំទូកថ្ងៃចេញព្រះវស្សាខេត្តបាត់ដំបងឆ្នាំនេះនិងប្រព្រឹត្តិទៅរយៈពេល០២ថ្ងៃនៅថ្ងៃអាទិត្យនិងថ្ងៃច័ន្ទទី១៤-១៥កើតខែអស្សុជ ឆ្នាំខាលចត្វាស័កព.ស២៥៦៦ ត្រូវនិងថ្ងៃទី៩ និងទី១០ខែតុលាឆ្នាំ២០២២ ខាងមុខនេះ៕