ឯកឧត្តម សៅ សុភាព ជួបជាមួយតំណាងអង្គការ Conservation International Cambodia (CI) ពិភាក្សាអំពីគម្រោងឥណទានកាបូនក្នុងតំបន់ជួរភ្នំក្រវាញកណ្តាល

ភ្នំពេញ៖ ឯកឧត្តម សៅ សុភាព រដ្ឋលេខាធិការក្រសួងបរិស្ថាន និងជាប្រធានក្រុមការងារសហប្រតិបត្តិការ ផែនការ និងថវិកា បានទទួលជួបជាមួយតំណាងអង្គការ Conservation International Cambodia (CI) ដើម្បីពិភាក្សាអំពីគម្រោងឥណទានកាបូនក្នុងតំបន់ជួរភ្នំក្រវាញកណ្តាល។

ជំនួបនេះ បានធ្វើឡើងនៅថ្ងៃទី៨ ខែសីហា ឆ្នាំ២០២២ និងមានការអញ្ជើញចូលរួមដោយ ឯកឧត្តម ទិន ពន្លក រដ្ឋលេខាធិការ និងជាអនុប្រធានក្រុមការងារ ឯកឧត្តម ជួប ប៉ារីស៍ អនុរដ្ឋលេខាធិការ និងជាប្រធានលេខា ធិការដ្ឋានក្រុមការងារ ឯកឧត្តម ខៀវ បូរិន អគ្គនាយក នៃអគ្គនាយកដ្ឋានសហគមន៍មូលដ្ឋាន ឯកឧត្តម ស៊ុ ធី អគ្គនាយករង នៃអគ្គនាយកដ្ឋានគោលនយោបាយ និងយុទ្ធសាស្រ្ត លោក លឿង កេសរោ អគ្គនាយករង នៃអគ្គនាយកដ្ឋានតំបន់ការពារធម្មជាតិ លោក ជិន សុធន់ ប្រធាននាយកដ្ឋានផែនការ ថវិកា និងសហប្រតិបត្តិការនិងសហការីសរុបចំនួន ១៤នាក់។

ឯកឧត្តម សៅ សុភាព បានលើកឡើងអំពីការងារមួយចំនួនទាក់ទងនឹងការងារអភិរក្ស និងការអភិវឌ្ឍសហគមន៍ មូលដ្ឋាន ក្នុងក្របខ័ណ្ឌឥណទានកាបូន ដែលក្រសួងបានអនុវត្តកន្លងមក និងបានពិភាក្សាអំពីតម្លៃ និងការទូទាត់ឥណទានកាបូននៅក្នុងទីផ្សារកាបូនស្ម័គ្រចិត្ត និងការបែងចែកចំណូលនៃគម្រោងនេះ៕