អនុស្សរណៈយោគយល់គ្នាដើម្បីបញ្ចប់សង្គ្រាមនៅតំបន់ឈូងសមុទ្ររវាងអាមេរិក និងអុីរ៉ង់ អាចនឹងត្រូវបានចុះហត្ថលេខានៅថ្ងៃអាទិត្យនេះ

វ៉ាស៊ីនតោន៖ តាមប្រភពពីមន្ត្រីលោកខាងលិច ប្រាប់ទីភ្នាក់ងារសារព័ត៌មាន Reuters កាលពីថ្ងៃសុក្របានបញ្ជាក់ថា អនុស្សរណៈយោគយល់គ្នាដើម្បីបញ្ចប់សង្គ្រាមនៅតំបន់ឈូងសមុទ្ររវាងសហរដ្ឋអាមេរិក និងប្រទេសអ៊ីរ៉ង់ អាចនឹងត្រូវបានចុះហត្ថលេខានៅថ្ងៃអាទិត្យនេះ នៅក្នុងទីក្រុងហ្សឺណែវ (Geneva) ប្រទេសស្វីស។

ប្រភពបានឱ្យដឹងថា ខ្លឹមសារនៃអនុស្សរណៈនេះកំពុងត្រូវបានកែសម្រួលជាចុងក្រោយ ដោយភាគីអ៊ីរ៉ង់នៅតែទាមទារដាច់ខាតឱ្យបញ្ឈប់សង្គ្រាមរបស់អ៊ីស្រាអែលនៅលីបង់ផងដែរ។ ការព្រាងអត្ថបទគ្រោងនឹងបញ្ចប់នៅថ្ងៃសៅរ៍ ដើម្បីត្រៀមឱ្យអនុប្រធានាធិបតីអាមេរិក លោក ជេឌី វែន (JD Vance) និងប្រធានសភាអ៊ីរ៉ង់ លោក ម៉ូហាម៉ាត់ បាខឺ កាលីបាហ្វ (Mohammed Baqer Qalibaf) ធ្វើការចុះហត្ថលេខា។

កាលពីថ្ងៃព្រហស្បតិ៍ លោក ដូណាល់ ត្រាំ ក៏បានប្រកាសលុបចោលការវាយប្រហារថ្មីៗលើអ៊ីរ៉ង់ ដោយអះអាងថាកិច្ចព្រមព្រៀងសន្តិភាពនេះត្រូវបានរៀបចំរួចរាល់ហើយ។
ទោះជាយ៉ាងណា យោងតាមប្រភពពីអ៊ីរ៉ង់ លក្ខខណ្ឌនៃកិច្ចព្រមព្រៀងនេះហាក់ផ្តល់អត្ថប្រយោជន៍យ៉ាងច្រើនដល់ទីក្រុងតេហេរ៉ង់ រួមមាន ការដកទណ្ឌកម្មប្រេង ការដោះលែងទ្រព្យសម្បត្តិរាប់ពាន់លានដុល្លារដែលជាប់បង្កក និងការបញ្ឈប់សង្គ្រាមនៅគ្រប់សមរភូមិ។ ចំណែកអាមេរិកទទួលបានត្រឹមតែការបើកច្រកសមុទ្រហ័រមូសឡើងវិញប៉ុណ្ណោះ រីឯបញ្ហានុយក្លេអ៊ែរត្រូវបានលើកពេលទៅជជែកនៅពេលក្រោយ៕