ភ្នំពេញ៖ ពាក្យថា OTP មកពីឃ្លាពេញជាភាសាអង់គ្លេសថា One-Time Password ដែលប្រែមកជាភាសាខ្មែរថា «លេខសម្ងាត់ប្រើតែម្តង»។ វាជាលេខកូដដែលប្រព័ន្ធបង្កើតឡើងដោយស្វ័យប្រវត្តិ ដើម្បីផ្ញើទៅកាន់ម្ចាស់គណនី សម្រាប់បញ្ជាក់អត្តសញ្ញាណក្នុងប្រតិបត្តិការណាមួយ។
១. លក្ខណៈពិសេសរបស់ OTP
– ប្រើបានតែម្ដង៖ រាល់លេខកូដដែលផ្ញើមក អាចប្រើបានតែម្ដងគត់សម្រាប់ប្រតិបត្តិការមួយ។
– មានកំណត់ពេល៖ មានសុពលភាពក្នុងរយៈពេលខ្លី (ប្រហែលពី ៣០ វិនាទី ទៅ ២ នាទី)។ បើហួសពេលនេះ លេខនោះនឹងមិនអាចប្រើបានទៀតទេ។
– សុវត្ថិភាពខ្ពស់៖ ទោះបីជាមានគេដឹងលេខសម្ងាត់ (Password) ដើមរបស់អ្នក ក៏គេមិនអាចចូលគណនីបានទេ បើគ្មានលេខ OTP នេះ។
២. តើយើងទទួលបាន OTP តាមណាខ្លះ? ជាទូទៅ លេខ OTP ត្រូវបានផ្ញើមកកាន់យើងតាមរយៈ៖
– សារ SMS៖ ផ្ញើចូលមកលេខទូរស័ព្ទដែលបានចុះឈ្មោះ។
– អ៊ីមែល (Email)៖ ផ្ញើចូលទៅកាន់ប្រអប់សារអ៊ីមែល។
– កម្មវិធីបង្កើតលេខកូដ (Authenticator Apps)៖ ដូចជា Google Authenticator ឬ Microsoft Authenticator ជាដើម។
៣. តើពេលណាខ្លះដែលយើងត្រូវការប្រើ OTP?
– នៅពេលប្តូរលេខសម្ងាត់ថ្មី។
– នៅពេលផ្ទេរប្រាក់តាមប្រព័ន្ធអេឡិចត្រូនិក ឬកម្មវិធីធនាគារ (Mobile Banking)។
– នៅពេលចុះឈ្មោះបង្កើតគណនីថ្មី (Facebook, Telegram, Gmail…)
– នៅពេលធ្វើការទូទាត់ទំនិញតាមអនឡាញ។
ដើម្បីរក្សាសុវត្ថិភាពឌីជីថល សូមកុំប្រាប់លេខ OTP ទៅកាន់អ្នកដទៃ ដាច់ខាត ទោះបីជាគេអះអាងថាជាបុគ្គលិកធនាគារ ឬភ្នាក់ងារក្រុមហ៊ុនណាមួយក៏ដោយ។ ប្រសិនបើអ្នកចែករំលែកលេខនេះ អ្នកដទៃអាចលួចយកប្រាក់ ឬគ្រប់គ្រងគណនីរបស់អ្នកបានយ៉ាងងាយស្រួល៕
