អេមីរ៉ាតអារ៉ាប់រួម៖ អ៉ីរ៉ង់គួរតែសងថ្លៃខូចខាតដែលបង្កឡើងដោយការវាយប្រហាររបស់ខ្លួនលើបណ្ដាប្រទេសក្នុងតំបន់ឈូងសមុទ្រ
ឌូបៃ៖ បើតាមការចេញផ្សាយដោយទីភ្នាក់ងារសារព័ត៌មាន AFP អេមីរ៉ាតអារ៉ាប់រួម កាលពីថ្ងៃពុធ ទី៨ ខែមេសា ឆ្នាំ២០២៦ បាននិយាយថាអ៉ីរ៉ង់គួរតែសងថ្លៃខូចខាតដែលបង្កឡើងដោយការវាយប្រហាររបស់ខ្លួនលើបណ្ដាប្រទេសក្នុងតំបន់ឈូងសមុទ្រ ហើយថានឹងស្វែងរកការបញ្ជាក់ឱ្យបានច្បាស់ថាតើបទឈប់បាញ់នឹងធានាថាតេហេរ៉ង់បញ្ឈប់អរិភាព និងបើកច្រកសមុទ្រ Hormuz ឡើងវិញយ៉ាងដូចម្ដេច។
សហរដ្ឋអាមេរិក និងអ៉ីរ៉ង់បានយល់ព្រមលើបទឈប់បាញ់រយៈពេល ២សប្ដាហ៍ បន្ទាប់ពីការប្រយុទ្ធគ្នាជាងមួយខែមកនេះ។ ប៉ុន្តែ បទឈប់បាញ់នេះមានភាពផុយស្រួយដោយប្រទេសជាច្រើន ក្នុងតំបន់ឈូងសមុទ្ររួមមានទាំងអេមីរ៉ាតអារ៉ាប់រួមបានអះអាងថាអ៉ីរ៉ង់នៅតែបន្តវាយប្រហារលើពួកគេ ក្នុងពេលដែលអ៉ីរ៉ង់ចោទអ៉ីស្រាអែលថាបានរំលោភបំពានបទឈប់បាញ់តាមរយៈការបន្ត ទម្លាក់គ្រាប់បែកលើលីបង់។ចំណែក អ៉ីស្រាអែល និងអាមេរិកបានអះអាងថាបទឈប់បាញ់មិនបានរាប់បញ្ចូលលីបង់នោះទេ។
គួរបញ្ជាក់ថា ក្នុងរយៈពេលជាងមួយខែមកនេះ អ៉ីរ៉ង់បានបើកការវាយប្រហារលើបណ្ដាប្រទេសក្នុងតំបន់ឈូងសមុទ្រ ជាការសងសឹកទៅនឹងការវាយប្រហាររបស់សហរដ្ឋអាមេរិក និងអ៉ីស្រាអែល ដែលបានសម្លាប់មេដឹកនាំកំពូល និងថ្នាក់ដឹកនាំអ៉ីរ៉ង់ជាច្រើននាក់។ គួរឱ្យកត់សម្គាល់ផងដែរ ក្នុងចំណោមប្រទេសអារ៉ាប់ក្នុងតំបន់ឈូងសមុទ្រ អេមីរ៉ាតអារ៉ាប់រួមរងការវាយប្រហារពីអ៉ីរ៉ង់ ច្រើនជាងគេ៕
