ប្រធានាធិបតីបារាំង នឹងមកបំពេញទស្សនកិច្ចនៅកម្ពុជានាខែវិច្ឆិកា ដើម្បីពង្រឹងចំណងមិត្តភាពដែលផ្សារភ្ជាប់ប្រទេសទាំងពីរ ឱ្យកាន់តែស្អិតរមួតខ្លាំងឡើង

ភ្នំពេញ៖ យោងតាមផេកហ្វេសបុកផ្លូវការរបស់ស្ថានទូតបារាំងប្រចាំនៅកម្ពុជា ដែលបានចេញនូវថ្ងៃទី៩ ខែមេសា ឆ្នាំ២០២៦នេះ បានឱ្យដឹងថា ប្រធានាធិបតីបារាំង លោក អេម៉ាណុយអែល ម៉ាក្រុង នឹងមកបំពេញទស្សនកិច្ចនៅកម្ពុជានាខែវិច្ឆិកា ឆ្នាំ២០២៦នេះ ដើម្បីពង្រឹងចំណងមិត្តភាពដែលផ្សារភ្ជាប់ប្រទេសទាំងពីរ ឱ្យកាន់តែស្អិតរមួតខ្លាំងឡើង។

ប្រធានាធិបតីបារាំង បានថ្លែងអំណរគុណចំពោះសម្តេចធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ដែលបានអញ្ជើញទៅចូលរួមកិច្ចប្រជុំកំពូលស្តីពី« សុខភាពតែមួយ»នៅប្រទេសបារាំងកាលពីថ្ងៃទី៦ដល់ថ្ងៃទី៩ខែមេសា ឆ្នាំ២០២៦នេះ ហើយជាមួយនឹង ពាក្យថ្លែងអំណរគុណនេះ លោកអេម៉ាណុយអែល ម៉ាក្រុង ក៏បានប្រកាសថា ទំនាក់ទំនងរវាងកម្ពុជា និងបារាំងនឹងកាន់តែរីកចម្រើនស្អិតរមួតបន្ថែមទៀតផងដែរ។

លោកប្រធានាធិបតីបារាំង សូមអរគុណចំពោះសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា សម្រាប់ការចូលរួមក្នុងកិច្ចប្រជុំកំពូល «សុខភាពតែមួយ» កាលពីម្សិលមិញនៅទីក្រុងលីយ៉ុង និងសម្រាប់ការពិភាក្សាផ្លាស់ប្តូរយោបល់រវាងយើងនៅថ្ងៃនេះ ក្នុងទីក្រុងប៉ារីស។

លោកអេម៉ាណូអែល ម៉ាក្រុង ក៏បានរំលេចផងដែរថា រវាងកម្ពុជា និងបារាំង យើងមានប្រវត្តិសាស្ត្ររួមគ្នាដ៏ជ្រាលជ្រៅ ដែលកំពុងតែរីកចម្រើនកាន់តែរឹងមាំថែមទៀត ក្នុងវិស័យថាមពល សុខាភិបាល ក៏ដូចជាវិស័យបេតិកភណ្ឌ ។

លោកប្រធានាធិបតីបារាំង បានលើកឡើងតៀតថា តាមរយៈអង្គការហ្វ្រង់កូហ្វូនី យើងក៏កំពុងបន្តដំណើរជាមួយគ្នាផងដែរ បន្ទាប់ពីកិច្ចប្រជុំកំពូលនៅ វីឡែស៍ ខូតូរ៉េស ក្នុងឆ្នាំ២០២៤ ហើយការណាត់ជួបបន្ទាប់ត្រូវបានកំណត់ធ្វើឡើងនៅភ្នំពេញ ហើយនៅភ្នំពេញនេះ ឯកឧត្តមប្រធានាធិបតីនឹងមានសេចក្តីសោមនស្សរីករាយក្នុងការទៅបំពេញទស្សនកិច្ចនាខែវិច្ឆិកា ឆ្នាំ២០២៦នេះ ហើយអំឡុងពេលដំណើរទស្សនកិច្ចនោះ គឺជាឱកាសបន្ថែមមួយទៀត ដើម្បីពង្រឹងចំណងមិត្តភាពដែលផ្សារភ្ជាប់ប្រទេសទាំងពីរ ឱ្យកាន់តែស្អិតរមួតខ្លាំងឡើង៕