មន្ត្រីជាន់ខ្ពស់ក្រសួងពាណិជ្ជកម្ម អញ្ជើញបើកវេទិកាកិច្ចសហប្រតិបត្តិការអន្តរគម្រោង ក្រោមប្រធានបទ “ស្ត្រី និងវិស័យកសិ-ពាណិជ្ជកម្ម”

ភ្នំពេញ៖ លោកជំទាវ តឹករ៉េក កំរង រដ្ឋលេខាធិការក្រសួងពាណិជ្ជកម្ម នាថ្ងៃទី៦ ខែកក្កដា ឆ្នាំ២០២២ បានអញ្ជើញជាអធិបតីក្នុងការបើក វេទិកាកិច្ចសហប្រតិបត្តិការអន្តរគម្រោង ក្រោមប្រធានបទ “ស្ត្រី និងវិស័យកសិ-ពាណិជ្ជកម្ម” ដែលបានរៀបចំនៅ សណ្ឋាគារតារាអ៊ែរផត រាជាធានីភ្នំពេញ និងមានការអញ្ជើញចូលរួមពី ឯកឧត្តម សំរិទ្ធ សាកុរា អគ្គនាយកនៃអគ្គនាយកដ្ឋានពាណិជ្ជកម្មក្នុងប្រទេស និងជានាយកគម្រោងជំរុញទីផ្សារសម្រាប់កសិកម្មខ្នាតតូច (អេមស៍) លោកជំទាវនាយិការរងគម្រោងអេមស៍ លោកនាយករងគម្រោងអេមស៍ តំណាងក្រសួងកិច្ចការនារី តំណាងកម្មវិធី ASPIRE តំណាងគម្រោង SAAMBAT មន្ត្រីអនុវត្តគម្រោងអេមស៍នៃការិយាល័យគ្រប់គ្រងគម្រោង មន្ត្រីបង្គោលនៃមន្ទីរពាណិជ្ជកម្មខេត្តទាំង១៨ ទីប្រឹក្សាគម្រោងអេមស៍ សរុបចំនួន ៦០នាក់។

ក្នុងឱកាសនោះ ឯកឧត្តម សំរិទ្ធ សាកុរា អគ្គនាយកនៃអគ្គនាយកដ្ឋានពាណិជ្ជកម្មក្នុងប្រទេស និងជានាយកគម្រោង អេមស៍ បានមានប្រសាសន៍ថា គោលដៅអភិវឌ្ឍន៍របស់គម្រោងអេមស៍ គឺដើម្បីបង្កើនប្រាក់ចំណូល និងលើកស្ទួយវិបុលភាពលើខ្សែច្រវាក់តម្លៃផលិតផលកសិកម្មសម្រាប់កសិករខ្នាតតូច រួមទាំងកសិករក្រីក្រ ស្រ្តី និងយុវជនតាមរយៈការតភា្ជប់ផលចំណេញ និងការផ្សាភ្ជាប់ទីផ្សារជូនពួកគាត់ឱ្យបានកាន់តែទូលំទូលាយដោយកៀរគរកសិករខ្នាតតូច រួមមានកសិករក្រីក្រ ចំនួន ៧៥ ០០០គ្រួសារដែលជាសូចនាករគម្រោង។

ឯកឧត្តមអគ្គនាយក បន្តថា ដើម្បីសម្រេចគោលដៅរបស់ខ្លួនពាក់ព័ន្ធនឹងសមភាពយេនឌ័រ គម្រោងអេមស៍បានរៀបចំផែនការសកម្មភាពយេនឌ័រសម្រាប់ឆ្នាំ២០២២ ដូចជា៖ ១) កសិករជាស្ត្រីចំនួន ៥០% នឹងអាចទទួលបានសេវាកម្មដែលគាំទ្រដោយគម្រោង ២) សមាជិកក្រុមផលិត ៥០% និងសមាជិកគ្រួសាររបស់ក្រុមផលិត ៥០% គឺជាស្ត្រី ៣) ជំរុញការយល់ដឹងអំពីយេនឌ័រ និងការពង្រឹងអំណាចសេដ្ឋកិច្ចរបស់ស្ត្រី និង ៤) ផ្តល់ឱកាស និងអត្ថប្រយោជន៍ដោយតម្លាភាព និងសមធម៌ដល់ស្ត្រី។

ជាមួយគ្នានេះ លោកជំទាវ តឹករ៉េក កំរង រដ្ឋលេខាធិការក្រសួងពាណិជ្ជកម្ម បានធ្វើការថ្លែងនូវការកោតសរសើរ និងវាយតម្លៃខ្ពស់ចំពោះក្រុមការងារអនុវត្តគម្រោងទាំងបី ជាពិសេសគម្រោងអេមស៍ ដែលបានខិតខំប្រឹងប្រែងអនុវត្តយ៉ាងសកម្ម ក្រោមការដឹកនាំរបស់ឯកឧត្តម សំរិទ្ធ សាកុរា អគ្គនាយកនៃអគ្គនាយកដ្ឋានពាណិជ្ជកម្មក្នុងប្រទេស និងជានាយកគម្រោងអេមស៍។

លោកជំទាវរដ្ឋលេខាធិការបន្តថា រាជរដ្ឋាភិបាលកម្ពុជា បានចាត់ទុកស្រ្តី ជាកម្លាំងចលករដ៏សំខាន់សម្រាប់ជំរុញសេដ្ឋកិច្ច ហើយបានសង្កេតឃើញថា ស្ត្រីបានចូលរួមអភិវឌ្ឍសេដ្ឋកិច្ចគ្រប់វិស័យនៅពេលបច្ចុប្បន្ន ចាប់ពីកម្រិតគ្រួសារ នៅកន្លែងធ្វើការ និងសហគមន៍ទាំងមូល ហើយ ៨០ ភាគរយនៃស្ត្រី បានចូលរួមក្នុងកម្លាំងពលកម្មសម្រាប់ការអភិវឌ្ឍសេដ្ឋកិច្ច ក្នុងនោះ ៤៥ ភាគរយនៃកម្លាំងពលកម្មសរុប។

បន្ថែមពីនេះ លោកជំទាវរដ្ឋលេខាធិការ បានបង្ហាញពីការជឿជាក់ទៅលើកិច្ចការទាំងនេះនឹងជំរុញការបញ្ជ្រាបយេនឌ័រក្នុងកិច្ចការអន្តរវិស័យ ក្នុងការកសាងមូលដ្ឋានឆ្ពោះទៅសម្រេចបាននូវចក្ខុវស័យកម្ពុជាឆ្នាំ២០៥០ ព្រមទាំងគោលនយោបាយ និងយុទ្ធសាស្ត្រជំរុញពាណិជ្ជកម្ម ដូចមានកំណត់នៅក្នុងយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាលកម្ពុជា។

នៅកិច្ចបញ្ចប់ លោកជំទាវរដ្ឋលេខាធិការ បានផ្ដល់អនុសាសន៍ណែនាំដល់គម្រោងទាំងបី ដើម្បីសហការគ្នាជាធ្លុងមួយ ជំរុញការចូលរួមរបស់ស្រ្តីក្នុងសកម្មភាពរបស់គម្រោងតាមរយៈ៖

-បន្តបង្កើនចំនួនអ្នកទទួលផលគោលដៅជាស្រ្តី និងការជំរុញស្រ្តីមានតួនាទីជាអ្នកដឹកនាំក្នុងក្រុមផលិតគោលដៅ។

-រួមបង្កើតយន្តការអន្តរាគមន៍ និងការគាំទ្រនានា ដើម្បីអនុញ្ញាតឱ្យស្រ្តីចូលរួមក្នុងផលិតកម្ម និងការធ្វើអាជីវកម្ម ឱ្យបានកាន់តែសកម្ម តាមរយៈ ១) ផ្តោតការយកចិត្តទុកដាក់យ៉ាងខ្លាំងលើការបញ្ចេញមតិយោបល់របស់ស្រ្តីលើផលិតកម្មនិងការធ្វើអាជីវកម្ម ២) ផ្តល់បច្ចេកទេសនវានុវត្តន៍ដល់ស្រ្តី ដើម្បីកាត់បន្ថយការប្រើប្រាស់កម្លាំងពលកម្មនៅក្នុងផលិតកម្ម ៣) ជំរុញលើកទឹកចិត្ត និងបង្កើនភាពអង់អាចដល់ស្រ្តីក្នុងការស្នើសុំមូលនិធិគាំទ្រ និងការស្នើសុំឥណទានសម្រាប់បង្កើនវិសាលភាពផលិតកម្ម ដែលជាគោលដៅចុងក្រោយ និងបង្កើនជីវភាពរស់នៅរបស់ពួកគេផ្ទាល់។

-បង្កើនជំនាញរបស់ស្រ្តីជាកសិ-ពាណិជ្ជករ ដែលមានភាពចម្រុះគ្នារវាងជំនាញរឹង និងជំនាញទន់ ក្នុងនោះអាចមានជំនាញទាក់ទងទៅនឹង ១) ផលិតកម្មបែបទំនើបកម្ម ២) ការយល់ដឹងពីសមភាពយេនឌ័រ ផ្នែកសង្គម សេដ្ឋកិច្ច និងផ្លូវចិត្ត ៣) ការយល់ដឹងបន្ថែមពីចំណេះដឹងអាជីវកម្ម ពិសេសផ្នែក អក្ខរកម្ម-ឌីជីថល សម្រាប់ទទួលបានព័ត៌មានទីផ្សារជាដើម សំដៅអភិវឌ្ឍសមត្ថភាពរបស់ស្រ្តី ឱ្យស្របតាមនិនា្នការសាកល និងបម្រែប្រមួលលំនាំធ្វើពាណិជ្ជកម្ម និងស្វ័យប្រវត្តិកម្ម ៕