ប៊ែរឡាំង៖ អាល្លឺម៉ង់កំពុងពិចារណាបញ្ជាទិញយន្តហោះចម្បាំង F-35 ផលិតនៅសហរដ្ឋអាម៉េរិក ចូលឃ្លាំងបន្ថែមទៀត ខណៈការផ្លាស់ប្ដូរនេះ នឹងធ្វើឱ្យរដ្ឋធានីប៊ែរឡាំងទោរទន់កាន់តែខ្លាំងទៅលើដង្ហើមបច្ចេកវិទ្យាយោធាអាម៉េរិក។
ប្រភពមួយបានឱ្យដឹងថា រដ្ឋធានីប៊ែរឡាំង កំពុងចរចាទិញយន្តហោះចម្បាំង F-35 បន្ថែមជាង៣៥គ្រឿងទៀតពីអាម៉េរិក។ កាលពីឆ្នាំ២០២២ អាល្លឺម៉ង់បានចុះហត្ថលេខាទិញយន្តហោះចម្បាំង F-35 ចំនួន៣៥គ្រឿង ហើយនឹងចាប់ផ្តើមដឹកជញ្ជូនចាប់ពីចុងឆ្នាំនេះ។ ការបញ្ជាទិញបន្ថែម កើតឡើងក្នុងពេលដែលអាល្លឺម៉ង់ និងបារាំង ជាប់គាំងនៅក្នុងគម្រោង Future Combat Air System។
អ្នកវិភាគមួយចំនួនជឿថា អាល្លឺម៉ង់ និងបារាំង នឹងបោះបង់ការអភិវឌ្ឍយន្តហោះចម្បាំងជំនាន់ទី៦ រួមគ្នា ប៉ុន្តែពួកគេនៅតែរក្សាកិច្ចសហប្រតិបត្តិការលើដ្រូន និងប្រព័ន្ធឌីជីថលតភ្ជាប់យន្តហោះចម្បាំង និងយន្តហោះគ្មានមនុស្សបើក។
យ៉ាងណា ការបញ្ជាទិញយន្តចម្បាំង F-35 ពីអាម៉េរិកបន្ថែមនេះ នឹងផ្តល់ពេលវេលាដល់អាល្លឺម៉ង់ ក្នុងការស្វែងរកដំណោះស្រាយសម្រាប់គម្រោងផលិតយន្តហោះចម្បាំងជំនាន់ទី៦ ដែលកំពុងតែជាប់គាំង៕
