អនុប្រធានាធិបតីហ្វីលីពីន លោកស្រី Sara Duterte នឹងឈរឈ្មោះជាបេក្ខជនប្រធានាធិបតី ក្នុងការបោះឆ្នោត នៅឆ្នាំ២០២៨ខាងមុខ

ម៉ានីល៖ បើតាមការចេញផ្សាយដោយទីភ្នាក់ងារសារព័ត៌មាន Reuters អនុប្រធានាធិបតីហ្វីលីពីន លោកស្រី Sara Duterte នៅថ្ងៃពុធ ទី១៨ ខែកុម្ភៈ ឆ្នាំ២០២៦ បានប្រកាសថាលោកស្រីនឹងឈរឈ្មោះជាបេក្ខជនប្រធានាធិបតី ក្នុងការបោះឆ្នោត នៅឆ្នាំ២០២៨ខាងមុខ។

លោកស្រី Sara Duterte បានបញ្ជាក់ទៀតថាលោកស្រីសុខចិត្តបូជាជីវិត ថាមពល និងអនាគត ដើម្បីបម្រើប្រទេសជាតិ។ ការស្ទង់មតិបានឱ្យដឹងថាលោកស្រីបានជាប់ចំណាត់ថ្នាក់ជាបេក្ខជនមាន សក្ដានុពលម្នាក់សម្រាប់ការបោះឆ្នោតប្រធានាធិបតីហ្វីលីពីននៅឆ្នាំ២០២៨។

នៅក្រោមរដ្ឋធម្មនុញ្ញហ្វីលីពីន ប្រធានាធិបតីអាចកាន់តំណែងបានត្រឹមតែមួយអាណត្តិប៉ុណ្ណោះមានរយៈពេល៦ឆ្នាំ ដែលនេះមានន័យថាប្រធានាធិបតីសព្វថ្ងៃ គឺលោក Ferdinand Marcos Jr មិនអាចឈរឈ្មោះក្នុងការបោះឆ្នោតសាជាថ្មីបាននោះទេ។

គួរបញ្ជាក់ថា លោកស្រី Sara Duterte គឺជាកូនស្រីរបស់អតីតប្រធានាធិបតីហ្វីលីពីន លោក Rodrigo Duterte ដែលឥលូវកំពុងជាប់ឃុំនៅឯតុលាការព្រហ្មទណ្ឌអន្តរជាតិ ICC ក្នុងទីក្រុងឡាអេ ជុំវិញបទចោទប្រកាន់មនុស្សឃាតពាក់ព័ន្ធនឹងសង្រ្គាមប្រឆាំងគ្រឿងញៀនអំឡុងការកាន់អំណាចរបស់លោក៕