កម្ពុជា-ស៊ីប ប្តេជ្ញាពង្រឹងទំនាក់ទំនងទ្វេភាគី និងជំរុញកិច្ចសហប្រតិបត្តិការលើវិស័យសក្តានុពលជាច្រើន

ប្រទេសស៊ីប: ក្នុងបរិយាកាសប្រកបដោយមិត្តភាព និងកិត្តិយសដ៏ខ្ពង់ខ្ពស់ ឯកឧត្តម Nikos Christodoulides ប្រធានាធិបតីនៃសាធារណរដ្ឋស៊ីប កាលពីថ្ងៃទី៩ ខែកុម្ភៈ ឆ្នាំ២០២៦បានទទួលសារតាំងពី ឯកឧត្តម ជា ច័ន្ទបរិបូរណ៍ ឯកអគ្គរដ្ឋទូតវិសាមញ្ញ និងមានសមត្ថកិច្ចថ្មីនៃព្រះរាជាណាចក្រកម្ពុជា ។
ក្នុងឱកាសនោះ ឯកឧត្តម ជា ច័ន្ទបរិបូរណ៍ បានពាំនាំនូវការផ្តាំផ្ញើសាកសួរសុខទុក្ខដ៏កក់ក្តៅ និង សេចក្តីគោរពរាប់អានពីសំណាក់ ព្រះមហាក្សត្រនៃព្រះរាជាណាចក្រកម្ពុជា រួមជាមួយថ្នាក់ដឹកនាំកំពូលៗមានដូចជា ប្រធានព្រឹទ្ធសភា ប្រធានរដ្ឋសភា និងសម្តេចនាយករដ្ឋមន្ត្រី ជូនចំពោះឯកឧត្តមប្រធានាធិបតី និងប្រជាជនស៊ីប ។
ឯកឧត្តមឯកអគ្គរដ្ឋទូតកម្ពុជាបានជម្រាប់ជូនថា ដើម្បីឱ្យទំនាក់ទំនងទ្វេភាគី និងកិច្ចសហប្រតិបត្តិការលើវិស័យលើកគ្រប់វិស័យកាន់តែរឹងមាំថែមទៀត កម្ពុជាស្នើឱ្យមានការពិគ្រោះយោបល់នយោបាយជាទៀងទាត់ និងការគាំទ្រគ្នាទៅវិញទៅមកក្នុងក្របខណ្ឌពហុភាគី ដូចជាអង្គការសហប្រជាជាតិ និងវេទិកាអាស៊ី-អឺរ៉ុប (ASEM) ជាដើម។
ជាមួយគ្នានេះ ឯកឧត្តមបានបង្ហាញសក្តានុពលក្នុងវិស័យកសិឧស្សាហកម្ម ឧស្សាហកម្មផលិតសម្លៀកបំពាក់ និងឡូជីស្ទិក ។ ជំរុញការផ្លាស់ប្តូរអាហារូបករណ៍ និស្សិត និងសាស្ត្រាចារ្យ ដើម្បីពង្រឹងការយល់ចិត្តគ្នារវាងប្រជាជន និងប្រជាជន ។ ពិភាក្សាលើវិធានការសម្រួលទិដ្ឋាការ ដើម្បីជំរុញការធ្វើដំណើរ និងការតភ្ជាប់រវាងប្រទេសទាំងពីរ និងជំរុញឱ្យមានពង្រីកការយកចិត្តទុកដាក់លើសេដ្ឋកិច្ចឌីជីថល ថាមពលបៃតង និងសេដ្ឋកិច្ចសមុទ្រ ។
ជាការឆ្លើយតប ឯកឧត្តម Nikos Christodoulides បានវាយតម្លៃខ្ពស់ចំពោះការប្តេជ្ញាចិត្តរបស់កម្ពុជាចំពោះសន្តិភាពក្នុងតំបន់ និងតួនាទីយ៉ាងសកម្មក្នុងក្របខណ្ឌអាស៊ាន ។ ឯកឧត្តមប្រធានាធិបតីបានបញ្ជាក់ថា សាធារណរដ្ឋស៊ីបស្វាគមន៍ចំពោះសន្ទុះវិជ្ជមាននៃទំនាក់ទំនងទ្វេភាគី និងរង់ចាំការអភិវឌ្ឍកិច្ចសហប្រតិបត្តិការជាក់ស្តែងបន្ថែមទៀត តាមរយៈកិច្ចសន្ទនាប្រកបដោយប្រសិទ្ធភាព ៕