ឯកឧត្តម ហ៊ុន ម៉ានី ជួបសំណេះសំណាលជាមួយសិស្សមន្រ្តីក្រមការ ជំនាន់ទី១២ នៃសាលាភូមិន្ទរដ្ឋបាល ដែលទើបប្រឡងជាប់ និងត្រៀមខ្លួនចូលរៀននៅសាលាភូមិន្ទរដ្ឋបាល ចំនួន ២០៥នាក់

ភ្នំពេញ នារសៀលថ្ងៃទី០៥ ខែមករា ឆ្នាំ២០២៦ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្រ្តីក្រសួងមុខងារសារធារណៈ និងជាប្រធានក្រុមប្រឹក្សាសាលាភូមិន្ទរដ្ឋបាល បានអញ្ជើញជួបសំណេះសំណាលជាមួយសិស្សមន្រ្តីក្រមការ ជំនាន់ទី១២ នៃសាលាភូមិន្ទរដ្ឋបាល ដែលទើបប្រឡងជាប់ និងត្រៀមខ្លួនចូលរៀននៅសាលាភូមិន្ទរដ្ឋបាល ចំនួន ២០៥នាក់។

នៅក្នុងជំនួបសំណេះសំណាលនេះដែរ ឯកឧត្តមឧបនាយករដ្ឋមន្ត្រី បានលើកឡើងពីដំណើរវិវត្តនៃសង្គមជាតិ ជាបន្តបន្ទាប់ ជាពិសេសការរីកចម្រើននៃប្រព័ន្ធរដ្ឋបាលសាធារណៈរបស់កម្ពុជា ព្រមទាំងបានដាស់ស្មារតីសិស្សមន្ត្រីក្រមការនូវសំណួរមួយថា «ហេតុអ្វីបានជាយើងត្រូវមានមោទនភាពចំពោះប្រព័ន្ធរដ្ឋបាលសាធារណៈ របស់កម្ពុជា ដែលយើងកំពុងមានមកដល់សព្វថ្ងៃ?» ក្រោយបានសួរសំណួរនេះ ឯកឧត្តមឧបនាយករដ្ឋមន្ត្រីបានបង្ហាញយោបល់ផ្ទាល់ខ្លួនដោយបានបន្តថា ក្រោយថ្ងៃរំដោះ៧មករា កម្ពុជាបានចាប់ផ្តើមរៀបចំប្រព័ន្ធរដ្ឋបាលសាធារណៈសាជាថ្មី ដោយបាតដៃទទេរ ហើយរក្សាបាននូវភាពរឹងមាំរហូតមកដល់សព្វថ្ងៃ។ នេះបានសបញ្ជាក់ពីភាពឈ្លាសវៃក្នុងការដោះស្រាយបញ្ហា និងការគិតគូរច្រើនណាស់ទម្រាំមានថ្ងៃនេះ។ ក្នុងនោះ ឆ្លងកាត់ដំណាក់កាលជាបន្តបន្ទាប់នៃសង្គមកម្ពុជា ប្រព័ន្ធរដ្ឋបាលសាធារណៈកម្ពុជាបានចូលរួមដោះស្រាយ ស្ថានភាពនយោបាយនៅកម្ពុជា រួមទាំងការចូលរួមជាផ្នែកមួយក្នុងការអនុវត្តនយោបាយឈ្នះ ឈ្នះផងដែរ ហើយទទួលបានការរីកចម្រើនជាបន្តបន្ទាប់រហូតមក។ ទោះបីជាយ៉ាងនេះក្តី ឯកឧត្តមបានបញ្ជាក់ពីការបន្តការងារកែទម្រង់រដ្ឋបាលសាធារណៈជាប្រចាំ និងជាចាំបាច់ ព្រមទាំងបានរម្លឹកប្រសាសន៍របស់សម្តេចតេជោថា «បន្តការកែទម្រង់ ដោយត្រូវសម្រួចមុំ»ដ្បិតថាការងារនេះជាកិច្ចការអាទិភាព ដែលមានចែងក្នុងយុទ្ធសាស្ត្របញ្ចកោណ ដំណាក់កាលទី១ ។

លើសពីនេះ ឯកឧត្តមបានសម្តែងនូវក្តីរីករាយ និងចូលរួមអបអរសាទរដល់សិស្សមន្រ្តីក្រមការ ជំនាន់ទី១២ នៃសាលាភូមិន្ទរដ្ឋបាល ដែលទើបប្រឡងជាប់នាពេលថ្មីៗនេះ និងបានសំណូមពរដល់សិស្សមន្ត្រីទាំងអស់ កុំភ្លេចមេរៀន ឆ្នាំ២០២៥ និងកុំភ្លេចការលះបង់របស់វីរកងទ័ពដើម្បីជាតិរបស់យើង។មេរៀនដែលធំជាងគេគឺត្រូវខិតខំប្រឹងប្រែងខ្លួនឯងជាប្រចាំ និងរក្សាឱ្យបាននូវសាមគ្គីភាពផ្ទៃក្នុង ពិសេសត្រូវតែបង្កើនសមត្ថភាព ក្នុងការប្រកួតប្រជែង។

សូមជម្រាបថា ការប្រឡងប្រជែងជ្រើសរើសសិស្សមន្ត្រីក្រមការ ជំនាន់ទី១២នេះ មានបេក្ខជនដាក់ពាក្យសរុប ២០,១៣៣នាក់ ក្នុងនោះមានតែបេក្ខជនទទួលបានសិទ្ធិប្រឡង ១៦,៤២៥នាក់ ហើយមានតែបេក្ខជន ១៧៧នាក់ (ស្រី ៥៤នាក់) ប៉ុណ្ណោះបានប្រឡងជាប់ជាស្ថាពរ ហើយបេក្ខជនជាប់បម្រុង ចំនួន ២៨នាក់ (ស្រី ៧នាក់) ត្រូវបានជ្រើសរើសឱ្យជំនួសទីកន្លែងដែលទំនេរមិនមានបេក្ខជនជាប់ស្ថាពរ ដើម្បីទទួលបានចំនួនសរុប ២០៥ នាក់ តាមតម្រូវការរបស់រដ្ឋបាលថ្នាក់ក្រោមជាតិ។