វិមានក្រឹមឡាំង៖ អ៊ុយក្រែនចាំបាច់ត្រូវដកកងទ័ពរបស់ខ្លួនចេញពីផ្នែកនៃតំបន់ដុនបាស (Donbas) ដែលខ្លួននៅតែបន្តគ្រប់គ្រង ប្រសិនបើចង់បានសន្តិភាព
មូស្គូ៖ បើតាមការចេញផ្សាយ ដោយទីភ្នាក់ងារសារព័ត៌មាន Reuters វិមានក្រឹមឡាំងបានប្រកាសនៅថ្ងៃចន្ទនេះថា អ៊ុយក្រែនចាំបាច់ត្រូវដកកងទ័ពរបស់ខ្លួនចេញពីផ្នែកនៃតំបន់ដុនបាស (Donbas) ដែលខ្លួននៅតែបន្តគ្រប់គ្រង ប្រសិនបើចង់បានសន្តិភាព ហើយបានព្រមានថា ប្រសិនបើទីក្រុងកៀវមិនព្រមចុះកិច្ចព្រមព្រៀងទេ នោះនឹងត្រូវបាត់បង់ទឹកដីបន្ថែមទៀត។
អ្នកនាំពាក្យវិមានក្រឹមឡាំង លោក ឌីមីទ្រី ប៉េស្កូវ បានបញ្ជាក់ថា លោក ពូទីន និងលោក ត្រាំ បានជជែកគ្នាតាមទូរស័ព្ទកាលពីថ្ងៃអាទិត្យ ហើយកិច្ចសន្ទនាមួយទៀតត្រូវបានគ្រោងទុកក្នុងពេលឆាប់ៗនេះ។
ទាក់ទងនឹងលក្ខខណ្ឌសន្តិភាព លោក ប៉េស្កូវ បានសង្កត់ធ្ងន់ថា «យើងកំពុងនិយាយអំពីការដកកងកម្លាំងប្រដាប់អាវុធនៃរបបនេះចេញពីតំបន់ដុនបាស»។ ទោះជាយ៉ាងណា លោកបានបដិសេធមិនធ្វើអត្ថាធិប្បាយលើគំនិតបង្កើតតំបន់សេដ្ឋកិច្ចពិសេស ឬអនាគតនៃរោងចក្រថាមពលនុយក្លេអ៊ែរ Zaporizhzhia។
លោក ប៉េស្កូវ ក៏បានយោងតាមប្រសាសន៍របស់លោក ត្រាំ ផងដែរថា អ៊ុយក្រែនអាចនឹងបាត់បង់ទឹកដីបន្ថែមទៀតទៅឱ្យរុស្ស៊ីក្នុងរយៈពេលប៉ុន្មានខែខាងមុខ ប្រសិនបើទីក្រុងកៀវមិនព្រមឈានដល់កិច្ចព្រមព្រៀង។ បច្ចុប្បន្ន រុស្ស៊ីគ្រប់គ្រងទឹកដីប្រហែល ២០% នៃអ៊ុយក្រែន រួមទាំង ៩០% នៃតំបន់ដុនបាស៕
