ទេសរដ្ឋមន្រ្តី លី ធុជ ដឹកនាំការដេីររួមគ្នា ដេីម្បីពង្រឹងសាមគ្គីភាព ប្រសិទ្ធភាពការងារ និងបង្កេីនភាពសុខដុមរមនា ក្នុងស្ថាប័នអាជ្ញាធរមីន
សៀមរាប៖ ថ្ងៃទី២៥ ខែវិច្ឆិកា ឆ្នាំ២០២៥ ឯកឧត្ដមបណ្ឌិត លី ធុជ ទេសរដ្ឋមន្រ្តី អនុប្រធានទី១ អាជ្ញាធរមីន បានដឹកនាំថ្នាក់ដឹកនាំ មន្រ្ដី-បុគ្គលិកអាជ្ញាធរមីន ដេីររួមគ្នាក្នុងតំបន់រមណីយដ្ឋានអង្គរ ខេត្តសៀមរាប ។ ការដេីររួមគ្នានេះ ក្នុងគោលបំណងពង្រឹងសាមគ្គីភាព ពង្រឹងប្រសិទ្ធភាពការងារ ពង្រឹងស្មារតីការងារជាក្រុម បង្កេីនភាពស្និទ្ធស្នាល និងបង្កេីនភាពសុខដុមរមនា ក្នុងស្ថាប័នអាជ្ញាធរមីន។
ការដេីររួមគ្នានេះរបស់ថ្នាក់ដឹកនាំ មន្ត្រី បុគ្គលិកអាជ្ញាធរមីន មិនគ្រាន់តែជាការជួបជុំ និងប្រមូលផ្ដុំប៉ុណ្ណោះទេ ប៉ុន្តែវាជាការសម្តែងនូវការប្តេជ្ញាចិត្តរួម និងកិច្ចខិតខំប្រឹងប្រែងរួម ដេីម្បីឈានទៅសម្រេចគោលដៅក្នុងវិស័យសកម្មភាពមីន សម្រាប់ឆ្នាំ២០២៦ និងឆ្នាំបន្តបន្ទាប់ទៀត រហូតដល់កម្ពុជាអាចសម្រេចគោលដៅរបស់ខ្លួន គ្មានផលប៉ះពាល់ដោយសារមីន និងសំណល់ជាតិផ្ទុះពីសង្រ្គាម។
តាងនាមអាជ្ញាធរមីន ជាសេនាធិការឱ្យរាជរដ្ឋាភិបាលក្នុងការដឹកនាំ គ្រប់គ្រង និងសម្របសម្រួលវិស័យសកម្មភាពមីន ចាប់ពីឆ្នាំ២០២៦ អាជ្ញាធរមីន បានត្រៀមខ្លួនក្នុងការដឹកនាំការអនុវត្តគោលនយោបាយជាតិសកម្មភាពមីន ២០២៦-២០៣៥ ដោយបានដាក់ចេញនូវគោលដៅកម្ពុជាមួយគ្មានមីនឆ្នាំ២០៣០ និងការសម្រេចបានចក្ខុវិស័យវែងឆ្ងាយគឺ «កម្ពុជាមួយគ្មានផលប៉ះពាល់ដោយសារមីន និងសំណល់ជាតិផ្ទុះពីសង្គ្រាម»។
