អាជ្ញាធរឥណ្ឌូណេស៊ីជម្លៀសមនុស្ស៩០០នាក់ និងជួយសង្រ្គោះអ្នកឡើងភ្នំ១៧០នាក់ដោយសុវត្ថិភាព បន្ទាប់ពីភ្នំភ្លើង Semeru បានផ្ទុះ

ហ្សាការតា៖ បើតាមការចេញផ្សាយដោយទីភ្នាក់ងារសារព័ត៌មាន Reuters អាជ្ញាធរឥណ្ឌូណេស៊ីបានជម្លៀសមនុស្ស៩០០នាក់ និងបានជួយសង្រ្គោះអ្នកឡើងភ្នំ១៧០នាក់ដោយសុវត្ថិភាព នៅថ្ងៃព្រហស្បតិ៍ ទី២០ ខែវិច្ឆិកា បន្ទាប់ពីភ្នំភ្លើង Semeru បានផ្ទុះ។

ការប្រកាសអាសន្នកម្រិតខ្ពស់នៅតែបន្តអនុវត្តដដែល បន្ទាប់ពីភ្នំភ្លើង Semeru នៅលើកោះជ្វាបានផ្ទុះ ១០ដង កាលពីថ្ងៃពុធម្សិលមិញ ដោយបញ្ចេញផេះ និងកម្អែភ្នំភ្លើងព្រមទាំងដុំថ្ម។ ភ្នំភ្លើង Semeru បានផ្ទុះលើកចុងក្រោយបំផុតកាលពីខែធ្នូ ឆ្នាំ២០២១ ហើយនៅពេលនោះមានមនុស្ស៥១នាក់បានស្លាប់ រីឯភូមិជាច្រើននៅក្បែរត្រូវបានគ្របដណ្ដប់ដោយផេះ។

Semeru ដែលមានកម្ពស់ ៣៦៧៦ម៉ែត្រ គឺជាភ្នំភ្លើងមួយស្ថិតនៅក្នុងចំណោមភ្នំភ្លើងសកម្មទាំង១៣០របស់ឥណ្ឌូណេស៊ីដែលមានទីតាំងភូមិសាស្ត្រស្ថិតនៅលើខ្សែក្រវាត់ភ្នំភ្លើងប៉ាស៊ីហ្វិក និងតែងតែជួបប្រទះបន្ទុះភ្នំភ្លើង និងគ្រោះរញ្ជួយដីជាញឹកញប់៕