ដូហា៖ លោក ម៉ូហាម៉េដ ប៊ីន អាប់ឌុលរ៉ាម៉ាន់ អាល់ថានី (Mohammed bin Abdulrahman Al Thani) នាយករដ្ឋមន្ត្រីកាតា កាលពីថ្ងៃអាទិត្យទី១៤កញ្ញា បានជំរុញសហគមន៍អន្តរជាតិឱ្យបញ្ឈប់ការប្រើប្រាស់ស្ដង់ដារទ្វេ និងដាក់ទណ្ឌកម្មអ៊ីស្រាអែល ចំពោះអ្វីដែលលោកបានពិពណ៌នាថាជា«ឧក្រិដ្ឋកម្ម»។ ការណ៍នេះ កើតឡើងក្រោយអ៊ីស្រាអែលបើកការវាយប្រហារនៅលើទឹកដីកាតា ឥតញញើតច្បាប់អន្តរជាតិ។
លោក អាល់ថានី បាននិយាយនៅក្នុងកិច្ចប្រជុំត្រៀមមួយ នៅមុនថ្ងៃនៃកិច្ចប្រជុំកំពូលបន្ទាន់នៃមេដឹកនាំអារ៉ាប់ និងអ៊ីស្លាមដែលរៀបចំដោយកាតា បន្ទាប់ពីអ៊ីស្រាអែលបានវាយប្រហារតាមអាកាសដែលមិនធ្លាប់មានពីមុនមកលើមេដឹកនាំក្រុមហាម៉ាសនៅរដ្ឋធានីដូហា។
លោកបានលើកឡើងថា៖«ដល់ពេលដែលសហគមន៍អន្តរជាតិឈប់ប្រើប្រាស់ស្ដង់ដារទ្វេ និងដាក់ទណ្ឌកម្មអ៊ីស្រាអែលហើយ ចំពោះឧក្រិដ្ឋកម្មទាំងអស់ដែលពួកគេបានប្រព្រឹត្ត ហើយអ៊ីស្រាអែលត្រូវដឹងថា សង្រ្គាមនៃការសម្លាប់រង្គាលកំពុងបន្តដែលប្រជាជនប៉ាឡេស្ទីនជាបងប្អូនរបស់យើងកំពុងទទួលរង ហើយគោលបំណងនៃការបណ្តេញពួកគេចេញពីទឹកដីរបស់ពួកគេ នឹងមិនដំណើរការទេ»។
យោងតាមអ្នកនាំពាក្យក្រសួងការបរទេសកាតា ម៉ាជេត អាល់អានសារី (Majed al-Ansari) កិច្ចប្រជុំនៅថ្ងៃចន្ទទី១៥កញ្ញារបស់មេដឹកនាំអារ៉ាប់ និងអ៊ីស្លាម នឹងពិចារណាសេចក្តីព្រាងសេចក្តីសម្រេច ស្តីពីការវាយប្រហាររបស់អ៊ីស្រាអែលលើរដ្ឋកាតា។ ក្នុងចំណោម មេដឹកនាំ ដែល ចូលរួម នឹងមាន ប្រធានាធិបតី អ៊ីរ៉ង់ លោក ម៉ាស៊ូដ ប៉េសេសឃីន (Masoud Pezeshkian) និង នាយករដ្ឋមន្ត្រី អ៊ីរ៉ាក់ លោក ម៉ូហាម៉េដ ស៊ីអា អាល់-ស៊ូដានី (Mohammed Shia al-Sudani)។
ប្រធានាធិបតីប៉ាឡេស្ទីន លោក ម៉ាមូដ អាប់បាស បានទៅដល់រដ្ឋធានីដូហាកាលពីថ្ងៃអាទិត្យទី១៤កញ្ញា នៅមុនកិច្ចប្រជុំកំពូល។ ប្រព័ន្ធផ្សព្វផ្សាយតួកគីបានរាយការណ៍ថា ប្រធានាធិបតីតួកគីលោក រីសេប តៃយីប អឺដូហ្កាន់ (Recep Tayyip Erdogan) ក៏ត្រូវបានគេរំពឹងថា នឹងចូលរួមផងដែរ។
គេនៅតែត្រូវមើលថា តើព្រះអង្គម្ចាស់ ម៉ូហាម៉េដ ប៊ីន សាល់ម៉ាន (Mohammed bin Salman) ដែលជាអ្នកគ្រប់គ្រងរបស់ប្រទេសអារ៉ាប៊ីសាអូឌីត នឹងចូលរួមដែរឬយ៉ាងណា? បើទោះបីជាព្រះអង្គបានទៅបំពេញទស្សនកិច្ចនៅប្រទេសកាតា កាលពីដើមសប្តាហ៍នេះ ក្នុងការបង្ហាញសាមគ្គីភាពអ្នកជិតខាងក៏ដោយ។ ប្រទេសកាតា ដែលជាម្ចាស់ផ្ទះមូលដ្ឋានយោធាដ៏ធំបំផុតរបស់សហរដ្ឋអាម៉េរិកនៅក្នុងតំបន់ ដើរតួជាអ្នកសម្រុះសម្រួលដ៏សំខាន់នៅក្នុងសង្គ្រាមអ៊ីស្រាអែល និងក្រុមហាម៉ាស រួមជាមួយសហរដ្ឋអាម៉េរិក និងអេហ្ស៊ីប។
សមាជិកការិយាល័យនយោបាយរបស់ក្រុមហាម៉ាស លោក បាសេម ណាំ (Bassem Naim) បាននិយាយថា ចលនាសកម្មប្រយុទ្ធសង្ឃឹមថា កិច្ចប្រជុំកំពូលនឹងបង្កើតជំហរអារ៉ាប-អ៊ីស្លាម ដែលសម្រេច និងបង្រួបបង្រួម និងវិធានការច្បាស់លាស់ និងជាក់លាក់លើអ៊ីស្រាអែល និងសង្រ្គាម។
គួរបញ្ជាក់ថា នាយករដ្ឋមន្ត្រីកាតា បានជួបជាមួយប្រធានាធិបតីសហរដ្ឋអាម៉េរិក លោក ដូណាល់ ត្រាំ ក្នុងទីក្រុងញូវយ៉ក បន្ទាប់ពីការវាយប្រហារដ៏សាហាវរបស់អ៊ីស្រាអែលទៅលើរដ្ឋធានីដូហាក្នុងសប្តាហ៍នេះ។ មុនពេលកិច្ចប្រជុំជាមួយប្រធានាធិបតីអាម៉េរិក លោក អាល់ថានី បានជួបអនុប្រធានាធិបតីអាម៉េរិក ជេឌី វ៉ាន (JD Vance) និងរដ្ឋមន្ត្រីការបរទេស លោក ម៉ាកូ រូប៊ីអូ នៅសេតវិមាន ជាកន្លែងដែលពួកគេបានពិភាក្សាអំពីការវាយប្រហាររបស់អ៊ីស្រាអែល និងការរៀបចំសន្តិសុខអាម៉េរិក-កាតា៕
