ឯកឧត្តម ទូច វិសាលសុខ ដឹកនាំកិច្ចប្រជុំត្រួតពិនិត្យវឌ្ឍនភាពការងារប្រចាំខែសីហា និងលើកទិសដៅការងារបន្តសម្រាប់ខែកញ្ញា របស់បណ្ឌិត្យសភានគរបាលកម្ពុជា

ភ្នំពេញ÷នៅព្រឹកថ្ងៃព្រហស្បតិ៍ ទី៤ ខែកញ្ញា ឆ្នាំ២០២៥ ឯកឧត្តមបណ្ឌិត ទូច វិសាលសុខ រដ្ឋលេខាធិការ ក្រសួងមហាផ្ទៃ បានអញ្ជើញដឹកនាំកិច្ចប្រជុំត្រួតពិនិត្យវឌ្ឍនភាពការងារប្រចាំខែសីហា និងលើកទិសដៅការងារបន្តសម្រាប់ខែកញ្ញា របស់បណ្ឌិត្យសភានគរបាលកម្ពុជា ។

កិច្ចប្រជុំនេះដែរការអញ្ជើញចូលរួមពីសំណាក់ ឯកឧត្តម អនុរដ្ឋលេខាធិការ ឯកឧត្តម នាយឧត្តមសេនីយ៍ សាស្ត្រាចារ្យ ឯក មនោសែន ប្រធានបណ្ឌិត្យសភា ឯកឧត្តមឧត្តមសេនីយ៍ឯក អនុប្រធានបណ្ឌិត្យសភា សាស្ត្រាចារ្យ គ្រូនគរបាលជាតិ ប្រធានមន្ទីរចាត់ការ ប្រធាន-នាយកអង្គភាពចំណុះបណ្ឌិត្យសភា និងមន្ត្រីពាក់ព័ន្ធមួយចំនួនដោយផ្ទាល់ នាសាលសន្និសីទ-ព្រះរាម (អគារA)នៃបណ្ឌិត្យសភា និងតាមប្រព័ន្ធអនឡាញ(Zoom Meeting) ពីសំណាក់នាយក នាយករងសាលានគរបាលជាតិ គ្រូនគរបាលជាតិ និងមន្ត្រីពាក់ព័ន្ធ។

កិច្ចប្រជុំនេះ មានគោលបំណងដើម្បីពិនិត្យវឌ្ឍនភាពការងារដែលសម្រេចបានក្នុងខែសីហាកន្លងទៅ ដើម្បីវាយតម្លៃមនិងលើកទិសដៅការងារបន្តសម្រាប់ខែកញ្ញា ឆ្នាំ២០២៥។

ក្នុងឱកាសនោះ ឯកឧត្តមបណ្ឌិត រដ្ឋលេខាធិការ បានថ្លែងបញ្ជាក់ថា សមិទ្ធផលដែលសម្រេចបានរបស់បណ្ឌិត្យសភា ក្នុងរយៈពេល១ខែកន្លងទៅនេះ គឺបង្ហាញអំពីលទ្ធផលការងារដែលសម្រេចបាន ស្របតាមផែនការនិងកម្មវិធីការងារដែលបានកំណត់និងតាមការដឹកនាំ ចង្អុលបង្ហាញរបស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដែលតែងបានផ្តល់ការគាំទ្រគ្រប់បែបយ៉ាងធ្វើឱ្យបណ្ឌិត្យសភាមានការវិវត្តរីកចម្រើនគួរជាទីមោទនៈ។ ទន្ទឹមនឹងនេះ ថ្នាក់ដឹកនាំ សាស្ត្រាចារ្យ គ្រូ មន្រ្តី និងអ្នកសិក្សា មានការខិតខំប្រឹងប្រែងប្រកបដោយឆន្ទៈមោះមុត និងមានការប្ដេជ្ញាចិត្តខ្ពស់ក្នុងការបំពេញភារកិច្ចទទួលខុសត្រូវនិងអនុវត្តកម្មវិធីកំណែទម្រង់៕