មូស្គូ៖ បើតាមការចេញផ្សាយដោយទីភ្នាក់ងារសារព័ត៌មាន AFP វិមានក្រឹមឡាំង កាលពីថ្ងៃទី២៩ ខែសីហា បានឱ្យដឹងថាប្រធានាធិបតីរុស្ស៉ី លោក វ្ល៉ាឌីមៀ ពូទីន នឹងធ្វើដំណើរទស្សនកិច្ចទៅកាន់ប្រទេសឥណ្ឌា នៅខែធ្នូខាងមុខ ខណៈទំនាក់ទំនងរវាងប្រទេសទាំង២មានភាពកាន់តែស៊ីជម្រៅ នៅចំពោះមុខសម្ពាធពីសហរដ្ឋអាមេរិកជុំវិញការទិញប្រេងរុស្ស៉ីរបស់ទីក្រុងញូវដែលី។
មន្ត្រីជាន់ខ្ពស់វិមានក្រឹមឡាំង លោក Yuri Ushakov បានបញ្ជាក់ថាលោក ពូទីន ក៏នឹងជួបនាយករដ្ឋមន្ត្រីឥណ្ឌា លោក Narendra Modi ផងដែរនៅឯកិច្ចប្រជុំកំពូលថ្នាក់តំបន់មួយនៅក្នុងប្រទេសចិន នៅថ្ងៃចន្ទសប្ដាហ៍ក្រោយ ដើម្បីពិភាក្សាពីការត្រៀមរៀបចំដំណើរទស្សនកិច្ចរបស់លោក ពូទីន នៅខែធ្នូខាងមុខ។
គួរបញ្ជាក់ថា ប្រធានាធិបតីអាមេរិក លោក ដូណាល់ ត្រាំ បានដំឡើងពន្ធគយលើទំនិញនាំចូលពីឥណ្ឌា ជាការឆ្លើយតបទៅនឹងការបង្កើនការទិញប្រេងពីរុស្ស៉ីរបស់ទីក្រុង ញូវដែលី ជាផ្នែកមួយនៃយុទ្ធនាការរបស់លោក ត្រាំ ក្នុងការកាត់ផ្ដាច់ចំណូលរបស់ទីក្រុងមូស្គូ និងជំរុញការបិទបញ្ចប់សង្រ្គាមនៅអ៊ុយក្រែន៕
