លោក ដូណាល់ ត្រាំ ចង់ឱ្យមានការកាត់ទោសប្រហារជីវិត សម្រាប់បទឃាតកម្មនៅក្នុងរដ្ឋធានីវ៉ាស៊ីនតោន

វ៉ាស៊ីនតោន៖ បើតាមការចេញផ្សាយដោយទីភ្នាក់ងារសារព័ត៌មាន AFP ប្រធានាធិបតីអាមេរិក លោក ដូណាល់ ត្រាំ នៅថ្ងៃអង្គារ ទី២៦ ខែសីហា បាននិយាយថារូបលោកចង់ឱ្យមានការកាត់ទោសប្រហារជីវិត សម្រាប់បទឃាតកម្មនៅក្នុងរដ្ឋធានីវ៉ាស៊ីនតោន ជាផ្នែកមួយនៃយុទ្ធនាការបង្ក្រាបលើអ្វីដែលលោកហៅថាជាការកើនឡើងយ៉ាងគំហុកនូវបទឧក្រិដ្ឋ ក្នុងរដ្ឋធានីមួយនេះ។

នៅឯកិច្ចប្រជុំគណៈរដ្ឋមន្ត្រីក្នុងសេតវិមាន លោក ត្រាំ បានគូសបញ្ជាក់ថា «បើនរណាម្នាក់សម្លាប់នរណាម្នាក់ ក្នុងរដ្ឋធានីវ៉ាស៊ីនតោន យើងនឹងស្វែងរកកាត់ទោសប្រហារជីវិត»។

លោកបន្ថែមថានេះជា វិធានការបង្ការយ៉ាងរឹងមាំបំផុត ហើយមនុស្សគ្រប់គ្នាក៏យល់ស្របដែរ។ ការទទូចចង់ឱ្យមានការកាត់ទោសប្រហារជីវិត កើតមានឡើងបន្ទាប់ពីលោក ត្រាំ បានដាក់ពង្រាយកងទ័ពឆ្មាំជាតិទៅកាន់ រដ្ឋធានីវ៉ាស៊ីនតោនគ្រប់គ្រងដោយគណបក្សប្រជាធិបតេយ្យ និងបានប្រើសិទ្ធិអំណាចគ្រប់គ្រងលើស្ថាប័នប៉ូលិលប្រចាំរដ្ឋនេះកាលពីដើមខែសីហាកន្លងទៅនេះ។

គួរបញ្ជាក់ថា រដ្ឋធានីវ៉ាស៊ីនតោន ឬគេស្គាល់ថា District of Columbia បានលុបចោលច្បាប់កាត់ទោសប្រហារជីវិតក្នុងឆ្នាំ១៩៨១។ លោក ត្រាំ បានព្រមានថារូបលោកក៏កំពុងពិចារណា ដាក់ពង្រាយកងទ័ពឆ្មាំជាតិទៅកាន់ទីក្រុងមួយចំនួនដឹកនាំបក្សប្រជាធិបតេយ្យដូចជា Chicago, New York និង Baltimore ផងដែរ៕