ប្រធានាធិបតីអ៊ុយក្រែន៖ រុស្ស៉ីកំពុងតែព្យាយាមធ្វើរឿងគ្រប់យ៉ាងដែលអាចធ្វើទៅបាន ដើម្បីរារាំងមិនឱ្យជំនួបរវាងរូបលោក និងប្រធានាធិបតីរុស្ស៉ី លោក វ៉្លាឌីមៀ ពូទីន កើតឡើង

កៀវ៖ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី កាលពីថ្ងៃសុក្រ ទី២២ ខែសីហា បាននិយាយថា រុស្ស៉ីកំពុងតែព្យាយាមធ្វើរឿងគ្រប់យ៉ាងដែលអាចធ្វើទៅបាន ដើម្បីរារាំងមិនឱ្យជំនួបរវាងរូបលោក និងប្រធានាធិបតីរុស្ស៉ី លោក វ៉្លាឌីមៀ ពូទីន កើតឡើង។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

ថ្លែងក្នុងសន្និសីទសារព័ត៌មានរួមគ្នា ជាមួយអគ្គលេខាធិការអង្គការ NATO លោក Mark Rutte នៅទីក្រុងកៀវ លោក ហ្សេលេនស្គី បាននិយាយថា អ្នកទាំងពីរបានពិភាក្សាគ្នា អំពីការធានាសន្តិសុខសម្រាប់អ៊ុយក្រែន ដែលស្រដៀងគ្នាទៅនឹងមាត្រា៥ របស់ NATO ដែលចាត់ទុកការវាយប្រហារលើសមាជិកណាមួយ ស្មើនឹងការវាយប្រហារលើសមាជិកទាំងអស់។

លោក ហ្សេលេនស្គី ធ្លាប់បានអំពាវនាវម្តងហើយម្តងទៀត ឱ្យលោក ពូទីន យល់ព្រមជួបចរចាគ្នាជាមួយលោក។

ប្រធានាធិបតីអាមេរិក លោក ដូណាល់ ត្រាំ បាននិយាយថា លោកប្រធានាធិបតីរុស្ស៉ី បានយល់ព្រមចំពោះជំនួបជាមួយលោក ហ្សេលេនស្គី ក្នុងកិច្ចសន្ទនាតាមទូរសព្ទ កាលពីដើមសប្តាហ៍នេះ អំឡុងពេលលោក ហ្សេលេនស្គី និងក្រុមមេដឹកនាំអឺរ៉ុប ធ្វើទស្សនកិច្ចមកកាន់ទីក្រុងវ៉ាស៉ីនតោន ដើម្បីជជែកអំពីសង្រ្គាមនៅអ៊ុយក្រែន។

យ៉ាងណាមិញ កាលពីថ្ងៃសុក្រ លោក ហ្សេលេនស្គី បាននិយាយយ៉ាងដូច្នេះថា «រុស្ស៉ីនាពេលនេះកំពុងប្រឹងប្រែងធ្វើរឿងគ្រប់យ៉ាង ដែលពួកគេអាចធ្វើទៅបាន ដើម្បីរារាំងជំនួបនោះ មិនឱ្យកើតមានឡើង»។ លោកប្រធានាធិបតីអ៊ុយក្រែន បានបន្តថា «ផ្ទុយពីរុស្ស៉ី អ៊ុយក្រែនមិនខ្លាចជំនួបជាមួយមេដឹកនាំណាមួយឡើយ»។

ជាចុងក្រោយ លោក ហ្សេលេនស្គី ក៏បានបន្តអំពាវនាវឱ្យសម្ព័ន្ធមិត្តខ្លួន ដាក់ទណ្ឌកម្មថ្មីបន្ថែមលើទីក្រុងមូស្គូ ប្រសិនបើរុស្ស៉ីនៅតែបន្តមិនបង្ហាញការចាប់អារម្មណ៍ ចំពោះកិច្ចប្រឹងប្រែងស្វែងរកសន្តិភាព៕