លោកជំទាវអ្នកឧកញ៉ា ម៉ៅ ចំណាន គិតម៉េង ដឹកនាំរៀបចំវេចខ្ចប់ និងដឹកជញ្ជូនគ្រឿងឧបភោគបរិភោគ សម្លៀកបំពាក់ និងសម្ភារផ្សេងៗ យកទៅប្រគល់ជូនជនភៀសសឹក និងកងទ័ពជួរមុខ

ភ្នំពេញ៖ នៅថ្ងៃទី១៧ និងទី១៨ ខែសីហា ឆ្នាំ២០២៥ នេះ លោកជំទាវអ្នកឧកញ៉ា ម៉ៅ ចំណាន គិតម៉េង ក្នុងនាមជាអនុប្រធានក្រុមប្រឹក្សាភិបាលក្រុមហ៊ុន រ៉ូយ៉ាល់ គ្រុប និងជាប្រធានសមាគមសិល្បករខ្មែរ បានដឹកនាំក្រុមការងារមកពីក្រុមហ៊ុន រ៉ូយ៉ាល់ គ្រុប (ធនាគារ វីង ,CBS , សែលកាត) និងសិល្បករសិល្បការិនី មកពី សមាគមសិល្បករខ្មែរ រៀបចំវេចខ្ចប់សម្លៀកបំពាក់ សម្ភារប្រើប្រាស់ គ្រឿងឧបភោគបរិភោគចម្រុះ ដូចជា អាហារក្រៀម អង្ករ គ្រឿងទេស អាវភ្លៀង ថ្នាំពេទ្យ ភេសជ្ជៈ និងនំចំណីសម្រាប់កុមារ ដើម្បីនាំយកទៅចែកជូនដល់បងប្អូនជនភៀសសឹក និងបងៗវីរកងទ័ព។

តាមរយៈអ្នកគ្រប់គ្រងមូលនិធិ ទ្រទ្រង់ជនភៀសសឹក បានបញ្ជាក់ថា សម្លៀកបំពាក់ សម្ភារប្រើប្រាស់ គ្រឿងឧបភោគបរិភោគចម្រុះទាំងនេះ បានទទួលពីកម្លាំងសាមគ្គីរបស់សប្បុរសជនមកពីគ្រប់ទិសទីតាមរយៈ «មូលនិធិទ្រទ្រង់ជនភៀសសឹក » ដែលបានផ្តួចផ្តើមឡើងដោយអ្នកឧកញ៉ា គិត ម៉េង អគ្គនាយកក្រុមហ៊ុនរ៉ូយ៉ាល់គ្រុប និងលោកជំទាវអ្នកឧកញ៉ា ម៉ៅ ចំណាន គិតម៉េង ប្រធានសមាគមសិល្បករខ្មែរ ។

អ្នកគ្រប់គ្រងមូលនិធិ បានបញ្ជាក់បន្ថែមថា នេះជាលើកទីបួនហើយ ដែលក្រុមហ៊ុន រ៉ូយ៉ាល់ គ្រុប និងសមាគមសិល្បករខ្មែរ បាននាំយកមូលនិធិទ្រទ្រង់ជនភៀសសឹក ទៅប្រគល់ជូនដល់ដៃប្រជាពលរដ្ឋជា ជនភៀសខ្លួននៅជំរំសុវត្ថិភាព និងបងៗវីរកងទ័ពការពារទឹកដីពីការឈ្លានពានរបស់ថៃ ។

តាមការគ្រោងទុក លោកជំទាវអ្នកឧកញ៉ា ម៉ៅ ចំណាន គិតម៉េង នឹងដឹកនាំយកនូវសម្លៀកបំពាក់ សម្ភារប្រើប្រាស់ គ្រឿងឧបភោគបរិភោគ ដែលបានវេចខ្ចប់ទាំងអស់នេះ ទៅចែកជូនដល់ជនភៀសសឹក និង វីរកងទ័ព ដោយផ្ទាល់តែម្តង។

សូមបញ្ជាក់ថា មូលនិធិទ្រទ្រង់ជនភៀសសឹក បានកើតឡើងដោយគំនិតផ្តួចផ្តើមដោយអ្នកឧកញ៉ា គិត ម៉េង និងលោកជំទាវ អ្នកឧកញ៉ា ម៉ៅ ចំណាន គិតម៉េង ក្រោមកិច្ចសហការរួមជាមួយសមាគមសិល្បករខ្មែរ ធនាគារវីង ក្រុមហ៊ុន CBS ក្រុមហ៊ុន សែលកាត និងដោយមានការគាំទ្រពីក្រុមហ៊ុន រ៉ូយ៉ាល់ គ្រុប។ មូលនិធិនេះ បង្កើតឡើងដើម្បីចូលរួមចំណែកជាមួយរាជរដ្ឋាភិបាលកម្ពុជា ក្នុងការជួយដល់ជនភៀសសឹកនៅតាមតំបន់ព្រំដែន តាមរយៈការកៀរគរថវិកា និងអំណោយពីសប្បុរសជនទាំងក្នុង និងក្រៅប្រទេស៕