អ្នកនាំពាក្យក្រសួងការពារជាតិកម្ពុជា៖ សភាពការណ៍តាមបណ្ដោយព្រំដែនកម្ពុជា-ថៃ នៅទិសខេត្តព្រះវិហារ និងខេត្តឧត្តរមានជ័យមានសភាពស្ងប់ស្ងាត់

ភ្នំពេញ៖ ថ្លែងនៅក្នុងសន្និសីទកាសែត នាព្រឹកថ្ងៃទី១៣ ខែសីហា ឆ្នាំ២០២៥នេះ លោកជំទាវឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិ អះអាងថា គិតចាប់ពីម៉ោង១២យប់រំលងអាធ្រាត្រ រហូតដល់ព្រឹកថ្ងៃទី១៣ខែសីហានេះ សភាពការណ៍តាមបណ្ដោយព្រំដែនកម្ពុជា-ថៃ នៅទិសខេត្តព្រះវិហារ និងខេត្តឧត្តរមានជ័យមានសភាពស្ងប់ស្ងាត់ ខណៈកងកម្លាំងកម្ពុជា បានបន្តប្រុងប្រយ័ត្នខ្ពស់ ក្នុងការបំពេញតួនាទីបានយ៉ាងខ្ជួន។

អ្នកនាំពាក្យបានបញ្ជាក់ថា កម្ពុជាមិនប្រើមីនថ្មីដាច់ខាត កម្ពុជាអនុវត្តតាមសន្ធិសញ្ញា និងច្បាប់អន្តរជាតិ ដោយមិនប្រើប្រាស់មីនប្រឆាំងមនុស្សដូចការចោទប្រកាន់របស់ថៃឡើយ ហើយមកដល់ពេលនេះ ករណីមីនរបស់ថៃមិនទាន់មានការស៊ើបអង្កេតច្បាស់លាស់ និងប្រកបដោយតម្លាភាពនៅឡើយទេ។ កម្ពុជាតែងតែរំលឹកថៃថា តំបន់ដែលមានមីននេះជាតំបន់ដែលមានមីនសល់ពីសម័យសង្គ្រាម មិនទាន់ធ្វើការសម្អាតរួចរាល់។

អ្នកនាំពាក្យក្រសួងការពារជាតិ បានបន្តកម្ពុជាប្តេជ្ញាអនុវត្តយ៉ាងខ្ជាប់បទឈប់បាញ់ និងកិច្ចព្រមព្រៀង១៣ចំណុច នៅប្រទេសម៉ាឡេស៊ី។ កម្ពុជាអំពាវនាវឱ្យថៃ គោរពបទឈប់បាញ់ និងស្មារតីនៃការឯកភាពគ្នាក្នងកិច្ចព្រមព្រៀង១៣ចំណុច នៃកិច្ចប្រជុំ GBC ជាពិសេសលើចំណុច ដែលភាគីទាំងពីរបានឯកភាពមិនផ្លាស់ប្តូរ ឬចល័ត រាប់ទាំងការដើរល្បាត ចូលទៅទីតាំងរបស់ភាគីម្ខាងទៀតឡើយ។

បើតាមអ្នកនាំពាក្យគិតចាប់តាំងពីថ្ងៃទី២៩ ខែកក្កដា ក្រោយបទឈប់បាញ់ចូលជាធរមាន ដែលកងកម្លាំងយើងត្រូវបាន យោធាថៃចាប់ខ្លួនដោយខុសច្បាប់ ដែលគិតដល់ពេលនេះមានរយៈពេល១៥ ថ្ងៃហើយ។ កម្ពុជានៅតែអំពាវនាវឱ្យភាគីថៃ ដោះលែងយោធិនកម្ពុជា ស្របតាមច្បាប់មនុស្សធម៌អន្តរជាតិ៕