ចក្រភពអង់គ្លេស និងក្រុមហ៊ុន OpenAI ដែលជាអ្នកបង្កើត ChatGPT បានចុះហត្ថលេខាលើភាពជាដៃគូយុទ្ធសាស្ត្រថ្មីមួយ ដើម្បីពង្រឹងកិច្ចសហប្រតិបត្តិការលើការស្រាវជ្រាវសន្តិសុខបញ្ញាសិប្បនិម្មិត (AI)

បរទេស៖ បើយោងតាមទីភ្នាក់ងារសារព័ត៌មាន Reuters ចេញផ្សាយនៅថ្ងៃទី២២ ខែកក្កដា ឆ្នាំ២០២៥ រដ្ឋាភិបាលចក្រភពអង់គ្លេសបានប្រកាសនៅថ្ងៃចន្ទដើមសប្តាហ៍ថា ចក្រភពអង់គ្លេស និងក្រុមហ៊ុន OpenAI ដែលជាអ្នកបង្កើត ChatGPT បានចុះហត្ថលេខាលើភាពជាដៃគូយុទ្ធសាស្ត្រថ្មីមួយ ដើម្បីពង្រឹងកិច្ចសហប្រតិបត្តិការលើការស្រាវជ្រាវសន្តិសុខបញ្ញាសិប្បនិម្មិត (AI) និងស្វែងយល់ពីលទ្ធភាពវិនិយោគលើហេដ្ឋារចនាសម្ព័ន្ធ AI របស់ចក្រភពអង់គ្លេស ដូចជាមជ្ឈមណ្ឌលទិន្នន័យជាដើម។

លោក Peter Kyle រដ្ឋលេខាធិការបច្ចេកវិទ្យាបានមានប្រសាសន៍ក្នុងសេចក្តីថ្លែងការណ៍ថា៖ «AI នឹងក្លាយជាមូលដ្ឋានគ្រឹះក្នុងការជំរុញការផ្លាស់ប្តូរដែលយើងចង់ឃើញនៅទូទាំងប្រទេស – មិនថាជាការកែទម្រង់ NHS (សេវាសុខភាពជាតិ) ការបំបែកឧបសគ្គដល់ឱកាស ឬការជំរុញកំណើនសេដ្ឋកិច្ចនោះទេ។» លោកបានបន្ថែមថា៖ «នេះមិនអាចសម្រេចបានទេបើគ្មានក្រុមហ៊ុនដូចជា OpenAI ដែលកំពុងជំរុញបដិវត្តន៍នេះទៅមុខជាអន្តរជាតិ។

ភាពជាដៃគូនេះនឹងឃើញមានការងាររបស់ពួកគេកាន់តែច្រើនឡើងនៅក្នុងចក្រភពអង់គ្លេស។»រដ្ឋាភិបាលបានដាក់ចេញផែនការវិនិយោគ ១ ពាន់លានផោនលើហេដ្ឋារចនាសម្ព័ន្ធកុំព្យូទ័រសម្រាប់ការអភិវឌ្ឍ AI ដោយសង្ឃឹមថានឹងបង្កើនសមត្ថភាពកុំព្យូទ័រសាធារណៈ ២០ ដងក្នុងរយៈពេល ៥ ឆ្នាំខាងមុខ។

នៅក្នុងសេចក្តីថ្លែងការណ៍ដូចគ្នានេះដែរ លោក Sam Altman នាយកប្រតិបត្តិ (CEO) ក្រុមហ៊ុន OpenAI បានថ្លែងអំណរគុណដល់រដ្ឋាភិបាលចក្រភពអង់គ្លេសដែលជាអ្នកដំបូងគេបានទទួលស្គាល់សក្តានុពលនៃបច្ចេកវិទ្យានេះ តាមរយៈ «ផែនការសកម្មភាពឱកាស AI» របស់ខ្លួន។ នេះជាគំនិតផ្តួចផ្តើមរបស់នាយករដ្ឋមន្ត្រី Keir Starmer ដើម្បីប្រែក្លាយចក្រភពអង់គ្លេសទៅជាមហាអំណាចបញ្ញាសិប្បនិម្មិត។

គួរជម្រាបថា រដ្ឋាភិបាលការងារ (Labour Government) បានលើកឡើងថា បច្ចេកវិទ្យានេះអាចបង្កើនផលិតភាព ១.៥% ក្នុងមួយឆ្នាំ ដែលនឹងបន្ថែមតម្លៃ ៤៧ ពាន់លានផោន (ស្មើនឹង ៦៣.៣៧ ពាន់លានដុល្លារ) ជារៀងរាល់ឆ្នាំក្នុងរយៈពេលមួយទសវត្សរ៍៕