លោក ដូណាល់ ត្រាំ អាចពិចារណាលើការនិរទេស លោក អ៊ីឡុន ម៉ាស បន្ទាប់ពីមហាសេដ្ឋីរូបនេះរិះគន់លើសំណើកាត់បន្ថយការចំណាយដ៏លេចធ្លោរបស់ខ្លួន
វ៉ាស៊ីនតោន៖ លោក ដូណាល់ ត្រាំ ប្រធានាធិបតីសហរដ្ឋអាម៉េរិក បានប្រកាសកាលពីថ្ងៃទី១ ខែកក្កដាថា លោកអាចពិចារណាលើការនិរទេស លោក អ៊ីឡុន ម៉ាស បន្ទាប់ពីមហាសេដ្ឋីមានដើមកំណើតអាហ្វ្រិកខាងត្បូងរូបនេះ បានរិះគន់លើសំណើកាត់បន្ថយការចំណាយដ៏លេចធ្លោរបស់ខ្លួន។
លោក ត្រាំ បានស្នើថា នាយកដ្ឋានប្រសិទ្ធភាពរដ្ឋាភិបាល (DOGE) ដែលលោក ម៉ាស បានដឹកនាំមុនពេលចុះចេញពីតំណែងនៅចុងខែឧសភា ត្រួតពិនិត្យឧបត្ថម្ភធនរបស់រដ្ឋាភិបាលលើស្ថាបនិកក្រុមហ៊ុនរថយន្តអគ្គិសនីតេស្លា និងក្រុមហ៊ុនរុករកអាកាស SpaceX។
លោក ត្រាំ អះអាងថា លោក ម៉ាស មិនសប្បាយចិត្តនឹងសំណើនេះ ដោយសារវាមិនបានបញ្ចូលវិធានការគាំទ្ររថយន្តអគ្គិសនី ហើយបានគំរាមដកកិច្ចសន្យារដ្ឋាភិបាលពីក្រុមហ៊ុនរបស់មហាសេដ្ឋីរូបនេះ។ លោកបានព្រមានថា បើគ្មានការឧបត្ថម្ភធនទេ លោក អ៊ីឡុន ទំនងជាត្រូវបិទហាង ហើយត្រឡប់ទៅអាហ្វ្រិកខាងត្បូងវិញ។
គួរបញ្ជាក់ផងដែរថា លោក ម៉ាស ជាមហាសេដ្ឋីមានបំផុតលើពិភពលោក គឺជាម្ចាស់ជំនួយដ៏ធំបំផុតរបស់លោក ត្រាំ នៅក្នុងការបោះឆ្នោតឆ្នាំ២០២៤ ដំបូងឡើយបានរក្សាទំនាក់ទំនងជិតស្និទ្ធជាមួយប្រធានាធិបតី។
លោក ម៉ាស បានចំណាយប្រាក់ជាង ២៧០លានដុល្លារ ដើម្បីគាំទ្រលោក ត្រាំ និងគណបក្សសាធារណរដ្ឋក្នុងអំឡុងវដ្តនៃការបោះឆ្នោតឆ្នាំ២០២៤។ យ៉ាងណា ពួកគេបានខ្វែងគំនិតគ្នាជាសាធារណៈលើសំណើច្បាប់នេះ ហើយចាប់តាំងពីពេលនោះមក លោក ម៉ាស បានចោទប្រកាន់គណបក្សសាធារណរដ្ឋថា បានបោះបង់ចោលកិច្ចខិតខំប្រឹងប្រែងដើម្បីដាក់សហរដ្ឋអាម៉េរិកជាមហាអំណាចរថយន្តអគ្គិសនី និងបដិវត្តថាមពលស្អាត។ លោក ម៉ាស ក៏បានអំពាវនាវឱ្យមានការបង្កើតគណបក្សនយោបាយថ្មីមួយដែលមានឈ្មោះថា គណបក្សអាម៉េរិក ឬ «America Party» ប្រសិនបើសំណើនេះត្រូវបានអនុម័ត៕
