សកម្មភាពផលិតកម្មរោងចក្រនៅប្រទេសចិន នៅតែបន្តធ្លាក់ចុះជាលើកទីបីជាប់ៗគ្នា ក្នុងខែមិថុនាឆ្នាំនេះ
(ប៉េកាំង)៖ ថ្ងៃចន្ទ ទី៣០ ខែមិថុនា ឆ្នាំ២០២៥ សកម្មភាពផលិតកម្មរោងចក្រនៅប្រទេសចិន នៅតែបន្តធ្លាក់ចុះជាលើកទីបីជាប់ៗគ្នា ក្នុងខែមិថុនាឆ្នាំនេះ ទោះបីជាការធ្លាក់ចុះមានការស្ដារឡើងខ្លះ។ ទិន្នន័យនេះបង្ហាញថាវិធានលើកទឹកចិត្តសេដ្ឋកិច្ចដែលរដ្ឋាភិបាលចិនបានអនុវត្តតាំងពីចុងឆ្នាំមុន កំពុងចាប់ផ្តើមផ្ដល់ប្រសិទ្ធភាព។ នេះបើយោងតាមការចេញផ្សាយរបស់សារព័ត៌មានReuters
សន្ទស្សន៍សកម្មភាពទិញជាសាធារណៈ (PMI) ដែលចេញផ្សាយដោយទីភ្នាក់ងារជាតិស្ថិតិចិន បានកើនឡើងដល់ ៤៩.៧ ក្នុងខែមិថុនា ពីតម្លៃ ៤៩.៥ ក្នុងខែឧសភា។ បើទោះបីជានេះជាការកែលម្អ តែសន្ទស្សន៍នៅតែស្ថិតក្រោមកម្រិត ៥០ ដែលជាសញ្ញាបង្ហាញពីការធ្លាក់ចុះសេដ្ឋកិច្ច។
ជាក់ស្តែង ការបញ្ជាទិញថ្មីក្នុងស្រុកកើនឡើងដល់ ៥០.២ ខណៈបរិមាណការទិញក៏ឡើងដល់ ៥០.២ ផងដែរ។ ប៉ុន្តែការជួលបុគ្គលិក និងការបញ្ជាទិញនាំចេញថ្មី នៅតែមានការធ្លាក់ចុះ។ សន្ទស្សន៍នាំចេញថ្មីនៅតែស្ថិតក្រោម ៥០ ជាលើកទី ១៤ ជាប់គ្នា ដោយនៅក្នុងខែមិថុនា វាបានកើនឡើងបន្តិចទៅដល់ ៤៧.៧ ពី ៤៧.៥ ក្នុងខែមុន។
លោក Xu Tianchen អេកូណូមីស្តពី Economist Intelligence Unit បានឱ្យដឹងថា “ការកែលម្អស្ទើរពីរខែជាប់គ្នា គឺជាសញ្ញាគួរឲ្យលើកទឹកចិត្ត ខណៈអាកររបស់ប្រធានាធិបតីអាមេរិក លោកដូណាល់ ត្រាំ ត្រូវបានកាត់បន្ថយជាលើកដំបូងក្នុងខែមិថុនា។”
រដ្ឋាភិបាលចិនក៏បានពង្រឹងវិធានផ្នែកហិរញ្ញវត្ថុ ដូចជាការវិនិយោគលើគម្រោងសាធារណៈ ដើម្បីជម្រុញការលូតលាស់។ សន្ទស្សន៍សំណង់បានកើនឡើងដល់កម្រិតខ្ពស់បំផុតក្នុងរយៈពេល ៣ ខែ គឺ ៥២.៨ ខណៈសកម្មភាពសេវាកម្មដូចជាអាហារ ភោជនីយដ្ឋាន និងដឹកជញ្ជូននៅតែមានការធ្លាក់ចុះ។
អ្នកវិភាគរបស់ Capital Economics លោក Zichun Huang បាននិយាយថា “សេដ្ឋកិច្ចចិនកំពុងស្ដារឡើងវិញបន្តិច ប៉ុន្តែហានិភ័យពីការនាំចេញនិងសំពាធតម្លៃធ្លាក់នៅតែបន្តជាបញ្ហាធំ។”
ស្ថានភាពនេះ បានជំរុញឲ្យមានសំពាធទៅលើរដ្ឋាភិបាលចិន ក្នុងការលើកទឹកចិត្តសេដ្ឋកិច្ចបន្ថែម ដើម្បីរក្សាការលូតលាស់ឲ្យបានប្រមាណ ៥ ភាគរយ តាមគោលដៅសម្រាប់ឆ្នាំ ២០២៥។
បច្ចុប្បន្ន ការធ្វើបដិរង្គសេដ្ឋកិច្ចចិន កំពុងផ្លាស់ប្តូរពីម៉ូឌែលផ្អែកលើផលិតកម្ម ទៅជាសេដ្ឋកិច្ចផ្អែកលើការប្រើប្រាស់។ រដ្ឋមន្រ្តីក្រសួងរដ្ឋសភាចិន លោកលី ខៀង បានបញ្ជាក់ថា ការផ្លាស់ប្តូរនេះអាចធ្វើទៅបាន ព្រមទាំងរក្សាការលូតលាស់ដដែល។ ប៉ុន្តែអ្នកជំនាញជឿថា វានឹងចំណាយពេលច្រើនឆ្នាំ ហើយអាចបណ្ដាលឲ្យសេដ្ឋកិច្ចស្ទាក់ស្ទើរនៅក្នុងរយៈពេលខ្លី។
អត្ថបទពីកញ្ញា ហេង គីមជូ
