(បរទេស)÷ នៅថ្ងៃព្រហស្បតិ៍ ទី១៩ ខែមិថុនា ឆ្នាំ២០២៥ ក្រោយកិច្ចព្រមព្រៀងពាណិជ្ជកម្មថ្មីរវាងចិន និងសហរដ្ឋអាមេរិក ក្រុងប៉េកាំងបានបង្ហាញថា ខ្លួនកាន់អំណាចចរចា និងមានឥទ្ធិពលខ្លាំងជាងមុន។ ប្រទេសចិនបានប្រើធនធានធម្មជាតិដ៏សំខាន់ «Rare Earths» ដែលជាគ្រឿងផ្សំចាំបាច់សម្រាប់ផលិតទូរស័ព្ទ, រថយន្តអគ្គិសនី និងអាវុធ ធ្វើជាឧបាយយុទ្ធសាស្ត្រ ក្នុងការចរចាជាមួយអាមេរិក។
ចំពោះកិច្ចព្រមព្រៀងថ្មីនេះ ចិនព្រមអនុញ្ញាតឲ្យនាំចេញ Rare Earths ទៅសហរដ្ឋអាមេរិកវិញ ខណៈដែលអាមេរិកក៏ពិចារណាលើការលើកលែងវិធានការទណ្ឌកម្មខ្លះៗ។ ទោះបីជាប្រធានាធិបតី ត្រាំ ប្រកាសថា “Deal is DONE” ក៏ដោយ កិច្ចព្រមព្រៀងនេះនៅតែមានចំណុចមិនច្បាស់ និងតម្រូវឲ្យមានចរចាបន្ថែម។
អ្នកវិភាគបានឲ្យដឹងថា ចិនឃើញថា ត្រាំផ្លាស់ប្តូរយោបល់ញឹកញាប់ និងយល់ថា វាជាឱកាសដើម្បីចរចាបានកាន់តែប្រសើរ។ ចិនក៏បង្ហាញចេតនាចង់ចរចាជាសមមិត្ត មិនមែនជាគូប្រឆាំង។ នៅពេលសហរដ្ឋអាមេរិកត្រូវការធនធានសំខាន់ៗ ពេលនោះចិនកាន់កាតជាប់ដៃ។
បំណងរបស់ចិននាពេលក្រោយ គឺបន្តចរចាដើម្បីបន្ថយពន្ធលើទំនិញចិន បើកទីផ្សារថ្មី និងទទួលបានបច្ចេកវិជ្ជាពីអាមេរិកមកប្រើប្រាស់។
អត្ថបទពីកញ្ញា ហេង គីមជូ
