នាយករដ្ឋមន្ត្រីចិន ព្រមានពីការកើនឡើងនៃលទ្ធិឯកតោភាគីនិយម និងគាំពារនិយម អាចគំរាមកំហែងដល់សណ្តាប់ធ្នាប់សេដ្ឋកិច្ច និងពាណិជ្ជកម្មពិភពលោក
ហ្សាការតា៖ កាលពីថ្ងៃអាទិត្យទី២៥ ខែឧសភា នាយករដ្ឋមន្ត្រីចិន លោក លី ឈាង បានព្រមានថា ការកើនឡើងនៃលទ្ធិឯកតោភាគីនិយម និងគាំពារនិយម អាចគំរាមកំហែងដល់សណ្តាប់ធ្នាប់សេដ្ឋកិច្ច និងពាណិជ្ជកម្មពិភពលោក ខណៈដែលលោកបានបញ្ជាក់សាជាថ្មីអំពីទំនាក់ទំនងរបស់រដ្ឋធានីប៉េកាំងជាមួយរដ្ឋធានីហ្សាការតា ក្នុងអំឡុងដំណើរទស្សនកិច្ចទៅកាន់ប្រទេសឥណ្ឌូណេស៊ី មុនពេលកិច្ចប្រជុំកំពូលក្នុងតំបន់នៅរាជធានីគូឡាឡាំពួនៃប្រទេសម៉ាឡេស៊ី។
លោក លី បានប្រាប់ប្រធានាធិបតីឥណ្ឌូណេស៊ី លោក ប្រាបូវ៉ូ ស៊ូប៊ីយ៉ាន់តូ (Prabowo Subianto) កាលពីថ្ងៃអាទិត្យថា៖«លទ្ធិឯកតោភាគី និងលទ្ធិគាំពារនិយមកំពុងរីកធំធាត់នៅទូទាំងពិភពលោក ដែលបង្កការគំរាមកំហែងយ៉ាងធ្ងន់ធ្ងរដល់សណ្តាប់ធ្នាប់សេដ្ឋកិច្ច និងពាណិជ្ជកម្មអន្តរជាតិ។ ប្រឈមមុខនឹងហានិភ័យទាំងនេះ ការរួបរួម និងកិច្ចសហប្រតិបត្តិការ គឺជាផ្លូវដែលអាចសម្រេចបានតែមួយគត់ឆ្ពោះទៅមុខ»។ នេះបើយោងតាមទីភ្នាក់ងារសារព័ត៌មានរដ្ឋចិនស៊ីនហួ។
លោក លី បានលើកឡើងថា រដ្ឋធានីប៉េកាំងចង់ជំរុញកិច្ចសហប្រតិបត្តិការបន្ថែមទៀតជាមួយប្រទេសមានសេដ្ឋកិច្ចធំបំផុតរបស់អាស៊ីអាគ្នេយ៍។
លោបន្តថា៖«ចិនបានត្រៀមខ្លួនជាស្រេចដើម្បីធ្វើការជាមួយប្រទេសឥណ្ឌូណេស៊ី និងប្រទេសកំពុងអភិវឌ្ឍផ្សេងទៀតដើម្បី … លើកកម្ពស់ពហុភាគីនិយម និងពាណិជ្ជកម្មសេរី និងជំរុញពិភពលោកពហុប៉ូល និងសកលភាវូបនីយកម្មដែលរួមបញ្ចូល»។
លោក ប្រាបូវ៉ូ ក៏បានបន្ទរពីចំណងមិត្តភាពដ៏ជិតស្និទ្ធ និងល្អរបស់បងធំប្រចាំតំបន់អាស៊ាន[ឥណ្ឌូណេស៊ី]ជាមួយមហាយក្សចិន។ មេដឹកនាំឥណ្ឌូណេស៊ីសង្កត់ធ្ងន់ថា ឥណ្ឌូណេស៊ីត្រៀមខ្លួនជាស្រេចដើម្បីបង្កើតតំបន់ដែលមានសុវត្ថិភាព និងវិបុលភាព។
លោក ប្រាបូវ៉ូ និងលោក លី បានត្រួតពិនិត្យលើការចុះហត្ថលេខាលើកិច្ចព្រមព្រៀងជាច្រើន ដោយបានសន្យាកិច្ចសហប្រតិបត្តិការកាន់តែជិតស្និទ្ធនៅក្នុងវិស័យនានា រួមទាំងការអភិវឌ្ឍសេដ្ឋកិច្ច និងហិរញ្ញវត្ថុ។
វិមានប្រធានាធិបតីឥណ្ឌូណេស៊ីក្រោយមកបានប្រកាសថា កិច្ចព្រមព្រៀងចំនួនប្រាំបីផ្សេងទៀតត្រូវបានចុះហត្ថលេខានៅក្នុងវិស័យដែលគ្របដណ្ដប់លើវិស័យទេសចរណ៍ សុខភាព ការវិនិយោគ និងប្រព័ន្ធផ្សព្វផ្សាយ។ នាយករដ្ឋមន្ត្រីចិននឹងបន្តដំណើរទៅប្រទេសម៉ាឡេស៊ីសម្រាប់កិច្ចប្រជុំកំពូលអាស៊ានរវាងសមាជិកនៃប្លុក១០ ប្រទេសគឺប្រទេសចិននិងប្រទេសផលិតប្រេង។
លោក ប្រាបូវ៉ូ បានទៅបំពេញទស្សនកិច្ចនៅរដ្ឋធានីប៉េកាំងកាលពីឆ្នាំមុន ក្នុងអំឡុងពេលដែលប្រធានាធិបតីចិន ស៊ី ជីនពីង បានប្រាប់គាត់ថា លោកសង្ឃឹមសម្រាប់ជំពូកថ្មីនៅក្នុងទំនាក់ទំនងទ្វេភាគី។ ប្រទេសទាំងពីរនាពេលកន្លងមកបានជជែកគ្នាជុំវិញការទាមទារដែលមានជម្លោះនៅក្នុងសមុទ្រចិនខាងត្បូង ដែលចិនទាមទារស្ទើរតែទាំងស្រុង។ រដ្ឋាភិបាលប៉េកាំងបានព្យាយាមពង្រីកវត្តមានរបស់ខ្លួនជាច្រើនឆ្នាំនៅក្នុងដែនទឹកប្រទាញប្រទង់ ដោយបានច្រានចោលសេចក្តីសម្រេចអន្តរជាតិដែលការទាមទាររបស់ចិនមិនមានមូលដ្ឋានផ្លូវច្បាប់។
រដ្ឋធានីប៉េកាំង និងហ្សាការតា គឺជាសម្ព័ន្ធមិត្តសេដ្ឋកិច្ចដ៏សំខាន់ ដោយក្រុមហ៊ុនចិនបានចាក់ដើមទុនក្នុងការទាញយកធនធានធម្មជាតិរបស់ឥណ្ឌូណេស៊ីក្នុងរយៈពេលប៉ុន្មានឆ្នាំចុងក្រោយនេះ ជាពិសេសនៅក្នុងវិស័យនីកែល ។ ប៉ុន្តែការទាមទារដែលមានជម្លោះរបស់ប្រទេសទាំងពីរនៅក្នុងផ្លូវទឹកយុទ្ធសាស្ត្រនៃសមុទ្រចិនខាងត្បូង និងទឹកដីក្បែរនោះបានប៉ះពាល់បន្តិចបន្តួចដល់ទំនាក់ទំនងក្នុងប៉ុន្មានឆ្នាំថ្មីៗនេះ។
នាវាចិន ម្ដងម្កាលបានចូលទៅក្នុងតំបន់ដែលទាមទារដោយឥណ្ឌូណេស៊ីនៃសមុទ្រណាធូណា (Natuna) ខាងជើងនៅគែមភាគខាងត្បូងនៃសមុទ្រចិនខាងត្បូង ដោយទាក់ទាញការតវ៉ាពីរដ្ឋធានីហ្សាកាតា។ កាលពីខែតុលាឆ្នាំមុន ឥណ្ឌូណេស៊ីបានប្រកាសថា ខ្លួនបានបណ្ដេញនាវាឆ្មាំសមុទ្រចិនចេញពីដែនទឹកដែលមានជម្លោះនៅសមុទ្រចិនខាងត្បូងក្នុងឱកាសបីផ្សេងគ្នា៕
