លោក ម៉ារីស សាង៉ាមវង្សា បានលើកឡើងថា ថៃនឹងជំរុញឱ្យមានការចូលរួមជាអន្តរជាតិបន្ថែមទៀតជាមួយប្រទេសកម្សត់មីយ៉ាន់ម៉ា
បរទេស៖ រដ្ឋមន្ត្រីការបរទេសថៃ លោក ម៉ារីស សាង៉ាមវង្សា បានលើកឡើងថា នៅក្នុងកិច្ចប្រជុំកំពូលមេដឹកនាំអាស៊ីអាគ្នេយ៍នាសប្តាហ៍ក្រោយនេះ ថៃនឹងជំរុញឱ្យមានការចូលរួមជាអន្តរជាតិបន្ថែមទៀតជាមួយប្រទេសកម្សត់មីយ៉ាន់ម៉ា នៅក្នុងការជំរុញឱ្យមានកិច្ចសហប្រតិបត្តិការអន្តរជាតិដើម្បីពង្រីកកិច្ចខិតខំប្រឹងប្រែងការទូតដើម្បីបញ្ចប់សង្គ្រាមស៊ីវិលរ៉ាំរ៉ៃ។
ផែនការសន្តិភាពឆ្នាំ២០២១ ដែលបង្កើតដោយសមាគមប្រជាជាតិអាស៊ីអាគ្នេយ៍ រហូតមកដល់ពេលថ្មីៗនេះ ស្ទើរតែមិនមានការរីកចម្រើន ប៉ុន្តែប្រធានអាស៊ានគឺលោក អាន់វ៉ា អ៊ីប្រាហ៊ីម នាយករដ្ឋមន្ត្រីម៉ាឡេស៊ី បានជំរុញជាថ្មីសម្រាប់ការសន្ទនា រួមទាំងការពិភាក្សាដាច់ដោយឡែកជាមួយប្រមុខរបបយោធា លោក មីន អ៊ុងឡាំង និងរដ្ឋាភិបាលរួបរួមជាតិដែលជាគូប្រជែងរបបសឹក។
នៅក្នុងបទសម្ភាសមួយ រដ្ឋមន្ត្រីការបរទេសថៃ លោក ម៉ារីស បានគាំទ្រកិច្ចខិតខំប្រឹងប្រែងរបស់លោក អាន់វ៉ា ដែលផ្តោតដំបូងលើការព្យាយាមដើម្បីទទួលបានការពន្យារពេលបទឈប់បាញ់ដើម្បីជួយសម្រួលដល់ជំនួយមនុស្សធម៌ បន្ទាប់ពីគ្រោះរញ្ជួយដីកាលពីខែមីនា ដែលបានសម្លាប់មនុស្សជាង៣៨០០ នាក់។ លោក ម៉ារីស បានប្រាប់ទីភ្នាក់ងារសារព័ត៌មានរ៉យទ័រថា៖«បទឈប់បាញ់គឺជាជំហានដំបូងដ៏សំខាន់ ប៉ុន្តែវាមិនអាចមានភាគីម្ខាងទេ។ យើងត្រូវតែអាចយកបញ្ហាផ្សេងៗមកតុពិភាក្សាក្នុងន័យស្ថាបនា ហើយធ្វើដូច្នេះដោយមិនបាច់ដាក់សម្ពាធ»។ លោក ម៉ារីស បានសង្កត់ធ្ងន់ថា ជំហានច្បាស់លាស់លើគំនិតផ្តួចផ្តើមសន្តិភាព ចាំបាច់ត្រូវតែគូសវាសនៅឯកិច្ចប្រជុំនៅរាជធានីគូឡាឡាំពួ ដែលចាប់ផ្តើមនៅចុងសប្តាហ៍នេះ។
ប៉ុន្តែចាប់តាំងពីការពិភាក្សារបស់លោក អាន់វ៉ា កាលពីខែមុនមក យោធាបានបន្តយុទ្ធនាការវាយប្រហារលើក្រុមប្រឆាំង រួមទាំងនៅតំបន់ដែលការរញ្ជួយដីបានកើតឡើង ដោយមានការវាយប្រហារតាមអាកាសជាច្រើនលើក និងការវាយប្រហារដោយកាំភ្លើងធំ។ សង្រ្គាមស៊ីវិលរបស់ប្រទេសមីយ៉ាន់ម៉ាបានធ្វើឱ្យឧក្រិដ្ឋកម្មឆ្លងដែនកាន់តែធ្ងន់ធ្ងរឡើង ដែលអង្គការសហប្រជាជាតិបង្ហាញថាមនុស្សរាប់សែននាក់បានចូលរួមក្នុងប្រតិបត្តិការអនឡាញខុសច្បាប់ដែលរកចំណូលបានរាប់ពាន់លានដុល្លារជារៀងរាល់ឆ្នាំ។
ទាក់ទិននឹងបញ្ហានេះ ប្រមុខការទូតថៃ បាននិយាយថា៖«កិច្ចសហប្រតិបត្តិការអន្តរជាតិទូលំទូលាយ នឹងជួយដល់គំនិតផ្តួចផ្តើមសន្តិភាព ដោយសារវានឹងនាំភាគីទាំងអស់មកកាន់តុចរចា រួមទាំងកងទ័ពជនជាតិភាគតិចផងដែរ។ លោកបានបន្ថែមថា ប្រសិនបើមិនមានដំណោះស្រាយចំពោះជម្លោះក្នុងប្រទេសមីយ៉ាន់ម៉ាទេ នោះឧក្រិដ្ឋកម្មឆ្លងដែនមិនអាចដោះស្រាយបានទេ បញ្ហាទាំងពីរត្រូវបានភ្ជាប់គ្នា»។ គួរបញ្ជាក់ថា មីយ៉ាន់ម៉ាបានជាប់គាំងនៃជម្លោះកាន់តែខ្លាំងឡើង ចាប់តាំងពីយោធាបានធ្វើរដ្ឋប្រហារបានបណ្តេញរដ្ឋាភិបាលស៊ីវិលជាប់ឆ្នោតក្នុងឆ្នាំ២០២១ ដែលបានបង្ខំឱ្យប្រជាជនជាង៣,៥ លាននាក់ភៀសខ្លួន និងបំផ្លាញសេដ្ឋកិច្ច៕
