អាម៉េរិក ប្រឈមមុខនឹងការបាត់បង់ប្រាក់ចំណូលប្រមាណ១២,៥ពាន់លានដុល្លារ ពីភ្ញៀវទេសចរបរទេសក្នុងឆ្នាំនេះ
វ៉ាស៊ីនតោន៖ បើយោងតាមរបាយការណ៍របស់ក្រុមប្រឹក្សាឧស្សាហកម្មទេសចរណ៍ ចេញផ្សាយកាលពីថ្ងៃទី១៥ ខែឧសភា បានឲ្យដឹងថា សហរដ្ឋអាម៉េរិកប្រឈមមុខនឹងការបាត់បង់ប្រាក់ចំណូលប្រមាណ១២,៥ពាន់លានដុល្លារ ពីភ្ញៀវទេសចរបរទេសក្នុងឆ្នាំនេះ ខណៈរដ្ឋបាលលោក ដូណាល់ ត្រាំ កំពុងបង្ក្រាបជនអន្តោប្រវេសន៍។
ការសិក្សាដោយក្រុមប្រឹក្សាទេសចរណ៍ និងស្ថាប័នទេសចរណ៍ពិភពលោក (WTTC) និង Oxford Economics បានរកឃើញថា សហរដ្ឋអាម៉េរិក គឺជាប្រទេសតែមួយគត់ ដែលបានព្យាករថា នឹងជួបប្រទះការធ្លាក់ចុះនៃការចំណាយរបស់ភ្ញៀវទេសចរបរទេសនៅឆ្នាំនេះ។ ការចំណាយរបស់ភ្ញៀវបរទេសនឹងធ្លាក់ចុះ២២,៥ភាគរយដល់១៨១ពាន់លានដុល្លារពីកម្រិតខ្ពស់កាលពីដប់ឆ្នាំមុន។
WTTC បង្កើតឡើងដោយក្រុមហ៊ុនទេសចរណ៍ឈានមុខគេ លើកឡើងថា៖«ការធ្លាក់ចុះនេះ តំណាងឱ្យផលប៉ះពាល់ដោយផ្ទាល់ដល់សេដ្ឋកិច្ចសហរដ្ឋអាម៉េរិកទាំងមូល ដែលប៉ះពាល់ដល់សហគមន៍ការងារ និងអាជីវកម្មទូទាំងប្រទេស»។
ប្រធាន WTTC លោកស្រី ជូលៀ ស៊ីមសុន (Julia Simpson) បាននិយាយថា ការគាំទ្រពីរដ្ឋាភិបាល គឺចាំបាច់ដើម្បីធានាបាននូវកំណើនទេសចរណ៍។ ស្របពេលលោកប្រធានាធិបតី ដូណាល់ ត្រាំ ដឹកនាំការបង្រ្កាបលើការធ្វើអន្តោប្រវេសន៍ខុសច្បាប់ ធ្វើអត្ថាធិប្បានយោបាយអំពីប្រទេសផ្សេងទៀត និងដាក់ពន្ធលើទំនិញបរទេស អ្នកប្រើប្រាស់នៅក្នុងប្រទេសផ្សេងទៀតបានបង្កើតកិច្ចខិតខំប្រឹងប្រែងជាច្រើន ដើម្បីធ្វើពហិការមិនប្រើផលិតផលសហរដ្ឋអាម៉េរិក និងការអំពាវនាវមិនឱ្យធ្វើដំណើរទៅកាន់សហរដ្ឋអាម៉េរិក។
របាយការណ៍នេះ បានគូសបញ្ជាក់ពីការធ្លាក់ចុះយ៉ាងគំហុកនៃចំនួនភ្ញៀវទេសចរពីប្រទេសសំខាន់ៗ នៅក្នុងខែមីនាឆ្នាំ២០២៥ រួមទាំងការធ្លាក់ចុះជិត១៥ភាគរយពីចក្រភពអង់គ្លេស និងកូរ៉េខាងត្បូង។ ការធ្លាក់ចុះមានជាង២០ភាគរយមកពីប្រទេសអាល្លឺម៉ង់ អៀរឡង់ និងអេស្ប៉ាញ។
របាយការណ៍ ក៏បានកត់សម្គាល់ផងដែរនូវទិន្នន័យផ្សេងទៀតដែលបង្ហាញពីការធ្លាក់ចុះ២០ភាគរយពីប្រទេសកាណាដា។ ទន្ទឹមនឹងនោះ របាយការណ៍បានរកឃើញថា ពលរដ្ឋអាម៉េរិកធ្វើដំណើរទៅក្រៅប្រទេសកាន់តែច្រើន ធ្វើឱ្យប៉ះពាល់ដល់វិស័យធ្វើដំណើររបស់អាម៉េរិកបន្ថែមទៀត។ ក្នុងឆ្នាំ២០២៤ វិស័យទេសចរណ៍បានរួមចំណែក ២,៦ពាន់ពាន់លានដុល្លារ ដល់សេដ្ឋកិច្ចសហរដ្ឋអាម៉េរិក និងបានគាំទ្រការងារជាង២០លានកន្លែង។ វាក៏បានរួមចំណែកច្រើនជាង ៥៨៥ពាន់លានដុល្លារអាម៉េរិក នៅក្នុងប្រាក់ចំណូលពន្ធ ឬស្ទើរតែ៧ភាគរយនៃចំនួនសរុប៕
