ឯកឧត្តមបណ្ឌិត លី ធុជ៖ ជីវភាពរស់នៅរបស់ប្រជាជនកម្ពុជាកាន់តែប្រសើរឡើង គឺជាការយកចិត្តទុកដាក់ និងកិច្ចការអាទិភាពរបស់សម្តេចធិបតី នាយករដ្ឋមន្រ្តី
ភ្នំពេញ៖ នៅថ្ងៃទី១០ ខែឧសភា ឆ្នាំ២០២៥ តាងនាមសម្តេចកិត្តិសង្គហបណ្ឌិត ម៉ែន សំអន ប្រធានក្រុមការងារគណបក្សចុះមូលដ្ឋានខេត្តស្វាយរៀង ឯកឧត្តមបណ្ឌិត លី ធុជ ប្រធានក្រុមការងារគណបក្សចុះមូលដ្ឋានក្រុងបាវិត ខេត្តស្វាយរៀង បានអញ្ជើញជួបសំណេះសំណាល និងចែកអំណោយដល់ប្រជាពលរដ្ឋមានជីវភាពខ្វះខាត (ក្រីក្រ១) នៅសង្កាត់បាទី ក្រុងបាវិត។
គ្រឿងឧបភោគបរិភោគដែលចែកជូនប្រជាពលរដ្ឋនេះ មានការចូលរួមឧបត្ថម្ភពីកុងស៊ុលកិត្តិយសប្រទេស៊ីបប្រចាំកម្ពុជា សមាគម TAFTAC វិទ្យាស្ថានបណ្តុះបណ្តាលវិស័យកាត់ដេរកម្ពុជា និងក្រុមការងារគណបក្សចុះមូលដ្ឋានសង្កាត់បាទី។
ក្នុងឱកាសនោះ ឯកឧត្តមបណ្ឌិត លី ធុជ បានពាំនាំសេចក្តីសាកសួរសុខទុក្ខ និងក្តីនឹករលឹកពីសម្តេចតេជោ ហ៊ុន សែន ប្រធានគណបក្សប្រជាជនកម្ពុជា និងសម្តេចធិបតី ហ៊ុន ម៉ាណែត នាយករដ្ឋមន្រ្តី ជូនបងប្អូនប្រជាពលរដ្ឋនៅក្រុងបាវិតទាំងអស់ ព្រមទាំងសម្តែងនូវការដឹងគុណចំពោះគោលនយោបាយរបស់រាជរដ្ឋាភិបាលកម្ពុជា ដែលតែងតែគិតគូរ និងយកចិត្តទុកដាក់ក្នុងការលើកស្ទួចជីវភាពរស់នៅរបស់ប្រជាជនកម្ពុជា។
ឯកឧត្តមបណ្ឌិត បានគូសបញ្ជាក់ទៀតថា ជីវភាពរស់នៅរបស់ប្រជាពលរដ្ឋ គឺជាកិច្ចការអាទិភាព របស់រាជរដ្ឋាភិបាលកម្ពុជា ក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្រ្តី ក្នុងនោះគោលនយោបាយកាត់បន្ថយភាពក្រីក្រ រដ្ឋាភិបាលតែងតែផ្តល់ប្រាក់ឧបត្ថម្ភដល់គ្រួសារក្រីក្រ ការបណ្តុះបណ្តាលជំនាញវិជ្ជាជីវៈដើម្បីទទួលបាននូវឱកាសការងារនិងប្រាក់ចំណូលខ្ពស់ និងការថែទាំសុខភាពដោយឥតគិតថ្លៃតាមរយៈការផ្តល់ប័ណ្ណ .ប.ស.ស. និងប័ណ្ណក្រីក្រ ជាដើម។
ជាមួយគ្នានោះ ឯកឧត្តមបណ្ឌិត លី ធុជ បានអំពាវនាវឱ្យប្រជាជនកម្ពុជាទាំងអស់បន្តគាំទ្រការដឹកនាំរបស់ សម្តេចធិបតី បន្តគាំទ្រដល់គោលនយោបាយរបស់រាជរដ្ឋាភិបាលកម្ពុជា និងបោះឆ្នោតជូនគណបក្សប្រជាជនកម្ពុជាគ្រប់អាណត្តិ ដើម្បីអាចបន្តបេសកកម្មដ៏ថ្លៃថ្លាសម្រាប់ជាតិមាតុភូមិ និងធ្វើឱ្យប្រទេសកាន់តែរីកចម្រើន និងជីវភាពរបស់ពលរដ្ឋកាន់តែល្អប្រសើរ ៕
