ភ្នំពេញ៖ នៅថ្ងៃទី២៣-២៤ ខែមេសា ឆ្នាំ២០២៥ លោកស្រីនាយករដ្ឋមន្ត្រីថៃ នឹងអញ្ជើញមកបំពេញទស្សនកិច្ចផ្លូវការនៅកម្ពុជា។
ទស្សនកិច្ចមាន៣ប្រភេទគឺ “ទស្សនកិច្ចផ្លូវរដ្ឋ, ទស្សនកិច្ចផ្លូវការ និងទស្សនកិច្ចការងារ”
ថ្ងៃនេះសូមបង្ហាញពីភាពខុសគ្នារវាង “ទស្សនកិច្ចផ្លូវការ និងងទស្សនកិច្ចការងារ” !
១.តើអ្វីទៅជាទស្សនកិច្ចផ្លូវការរបស់នាយករដ្ឋមន្ត្រី?
នាយករដ្ឋមន្ត្រីនៃប្រទេសមួយ អញ្ជើញមកបំពេញទស្សនកិច្ចនៅកម្ពុជា តបតាមការអញ្ជើញរបស់នាយករដ្ឋមន្ត្រីកម្ពុជា ហៅថា “ទស្សនកិច្ចផ្លូវការ”។
គោលបំណងនៃទស្សនកិច្ចផ្លូវការ គឺពង្រឹងទំនាក់ទំនងការទូតទ្វេភាគីបន្ថែមទៀត និងជំរុញកិច្ចសហប្រតិបត្តិការទ្វេភាគី និងមានកិច្ចប្រជុំផ្លូវការ ពិភាក្សាដោះស្រាយបញ្ហារួមរវាងប្រទេសទាំងពីរដូចជាបញ្ហានយោបាយ, សេដ្ឋកិច្ច, ពាណិជ្ជកម្ម, ព្រំដែន, ទេសចរណ៍ និងពលករ…។ល។ ជាទស្សនកិច្ចដែលមមាញឹកខ្លាំង។
នៅក្នុងដំណើរទស្សនកិច្ចផ្លូវការ តែងមានចុះហត្ថលេខាលើកិច្ចព្រមព្រៀង ឬ MoU មួយចំនួនដែលជាសមិទ្ធផលនៃដំណើរទស្សនកិច្ច។
នៅក្នុងទស្សនកិច្ចផ្លូវការនេះដែរ នាយករដ្ឋមន្ត្រី អាចនឹងអញ្ជើញចូលក្រាបថ្វាយបង្គំគាល់សម្តែងការគួរសមចំពោះព្រះមហាក្សត្រកម្ពុជា, ចូលជួបសម្តែងការគួរសមជាមួយប្រធានព្រឹទ្ធសភា និងរដ្ឋសភា។
ពិធីការទទួលបដិសណ្ឋារកិច្ចមាន៖
o មានរដ្ឋមន្ត្រីអមមួយរូបទៅទទួលដល់ព្រលានយន្តហោះ មកវិមានសន្តិភាព ដែលនាយករដ្ឋមន្ត្រីកម្ពុជា រៀបចំពិធីទទួលស្វាគមន៍ជាផ្លូវការ មានកងកិត្តិយសនៅក្នុងវិមានសន្តិភាព។
o ពិធីបដិសណ្ឋារកិច្ចផ្លូវការមានម៉ូតូប៉ូលីសអមចំនួន ១៨គ្រឿង ។
o នាយករដ្ឋមន្ត្រីជាភ្ញៀវអញ្ជើញទៅគោរពវិញ្ញាណក្ខន្ធនៅវិមានឯករាជ្យ និងពេលល្ងាចមានពិធីជប់លៀងស្វាគមន៍ផ្លូវការ។
កំណត់សម្គាល់ៈ កន្លងមកការរៀបចំពិធីការកម្ពុជា ឱ្យរដ្ឋមន្ត្រីអម ជិះនៅក្នុងរថយន្តទន្ទឹមគ្នាជាមួយប្រមុខរដ្ឋ ឬប្រមុខរដ្ឋាភិបាលរបស់ភ្ញៀវ។ នៅត្រង់ចំណុចនេះ មិនសូវសមទេ ព្រោះយើងមានឋានៈត្រឹមតែជារដ្ឋមន្ត្រី ចំណែកភ្ញៀវមានឋានៈជាប្រមុខរដ្ឋ ឬប្រមុខរដ្ឋាភិបាល យើងមិនគួរឱ្យរដ្ឋមន្ត្រីអម អង្គុយក្នុងរថយន្តតែមួយទន្ទឹមគ្នានោះទេ គួរឱ្យរដ្ឋមន្ត្រីអម ជិះរថយន្តដាច់ដោយឡែកខាងក្រោយរថយន្ត VIP ទើបជាការល្អ។
ពិធីទទួលលោកប្រធានាធិបតី Xi Jinping ឃើញរដ្ឋមន្ត្រីអម ជិះរថយន្តដោយឡែកនៅពីក្រោយរថយន្ត VIP គឺជាការល្អ។
២.តើអ្វីទៅជាទស្សនកិច្ចការងារ?
២.១. ទស្សនកិច្ចការងារ គឺនាយករដ្ឋមន្ត្រីកម្ពុជា អញ្ជើញប្រមុខរដ្ឋ / ប្រមុខរដ្ឋាភិបាលនៃប្រទេសផ្សេងៗឱ្យមកចូលរួមកិច្ចប្រជុំ ដូចពេលដែលកម្ពុជាធ្វើជាម្ចាស់ផ្ទះនៃកិច្ចប្រជុំកំពូលអាស៊ាន។
២.២.កិច្ចប្រជុំការងាររវាងនាយករដ្ឋមន្ត្រីទាំងពីរ ដើម្បីដោះស្រាយបញ្ហា ឬការងារមួយចំនួន៖
ឧទាហរណ៍ៈ ការប៉ះទង្គិចប្រដាប់អាវុធរវាងកម្ពុជា និងថៃ នាយករដ្ឋមន្ត្រីទាំងពីរត្រូវជួបប្រជុំពិភាក្សា ស្វែងរកដំណោះស្រាយ ដូច្នេះនាយករដ្ឋមន្ត្រីកម្ពុជា អញ្ជើញនាយករដ្ឋមន្ត្រីថៃឱ្យមកប្រជុំនៅកម្ពុជា គេហៅថា “ទស្សនកិច្ចការងារ” គឺពុំមានពិធីទទួលស្វាគមន៍ផ្លូវការ ដែលមានកងកិត្តិយសនោះទេ គឺចុះពីយន្តហោះមកប្រជុំតែម្តង។
៣.ពិធីការនៃការទទួលបដិសណ្ឋារកិច្ចទស្សនកិច្ចការងារ គឺពុំមានម៉ូតូប៉ូលីសអមទេ ពុំមានកងកិត្តិយសទទួលជាផ្លូវការនោះទេ។ មានតែម៉ូតូប៉ូលីស ០១គ្រឿង និងរថយន្តប៉ូលីស ០១គ្រឿង សម្រាប់សម្រួលចរាចរណ៍តែប៉ុណ្ណោះ។
នាយករដ្ឋមន្ត្រីកម្ពុជា រង់ចាំទទួលស្វាគមន៍នៅកន្លែងប្រជុំ ។
ហេតុនេះហើយ ទើបពុំមានពិធីទទួលបដិសណ្ឋារកិច្ចជាផ្លូវការ នៅពេលលោកប្រធានាធិបតីអាម៉េរិក អញ្ជើញមកចូលរួមក្នុងកិច្ចប្រជុំកំពូលអាស៊ាននៅកម្ពុជា ។
បំណងល្អពីរាជធានីភ្នំពេញ ថ្ងៃទី២២ ខែមេសា ឆ្នាំ២០២៥ !
ដោយ៖ បណ្ឌិត ឥន សុផល
