ក្រុម Houthi របស់យេម៉ែន កំណត់គោលដៅលើនាវាផ្ទុកយន្តហោះអាមេរិក ចំពេលមានការវាយប្រហារតាមអាកាសថ្មីរបស់អាមេរិក

បរទេស៖ អ្នកនាំពាក្យយោធា Houthi របស់ប្រទេសយេម៉ែនបានឲ្យដឹងនៅថ្ងៃចន្ទថា ក្រុមរបស់លោកបានបើកការវាយប្រហារលើកទី២ សំដៅទៅលើនាវាផ្ទុកយន្តហោះអាមេរិកនៅភាគខាងជើងសមុទ្រក្រហម បន្ទាប់ពីយោធាសហរដ្ឋអាមេរិកបានធ្វើការវាយប្រហារតាមផ្លូវអាកាសថ្មីៗទៅលើគោលដៅរបស់ Houthi។

អ្នកនាំពាក្យយោធា Houthi លោក Yahya Sarea បានបញ្ជាក់នៅក្នុងសេចក្តីថ្លែងការណ៍នៅព្រឹកថ្ងៃចន្ទថា ដើម្បីឆ្លើយតបទៅនឹងការបន្តការឈ្លានពានរបស់អាមេរិកប្រឆាំងនឹងប្រទេសរបស់យើង កងកម្លាំងប្រដាប់អាវុធរបស់យើងបានកំណត់គោលដៅជាលើកទីពីរក្នុងរយៈពេលតិចជាង ២៤ម៉ោង នាវាផ្ទុកយន្តហោះអាមេរិក USS Harry Truman នៅភាគខាងជើងសមុទ្រក្រហម ជាមួយនឹងមីស៊ីលផ្លោង និងនាវា និងយន្តហោះគ្មានមនុស្សបើក។

លោកបានបន្តថា កងកម្លាំងប្រដាប់អាវុធរបស់យើងក៏ទទួលបានជោគជ័យក្នុងការរារាំងការវាយប្រហារដោយអរិភាពដែលសត្រូវកំពុងរៀបចំដើម្បីវាយប្រហារប្រទេសរបស់យើងដោយការបាញ់រ៉ុក្កែត និងការវាយប្រហារដោយយន្តហោះគ្មានមនុស្សបើកជាច្រើនដែលបង្ខំឱ្យយន្តហោះចម្បាំងរបស់សត្រូវត្រឡប់មកវិញ។

លោក Sarea ក៏បានប្តេជ្ញាថានឹងពង្រីកការវាយប្រហារដើម្បីរួមបញ្ចូលកងនាវាចរ និងនាវាពាណិជ្ជកម្មរបស់សហរដ្ឋអាមេរិកទាំងអស់នៅក្នុងតំបន់ ប្រសិនបើការវាយប្រហារតាមអាកាសរបស់សហរដ្ឋអាមេរិកនៅតែបន្ត។

ទន្ទឹមនឹងនេះ បញ្ជាការកណ្តាលរបស់សហរដ្ឋអាមេរិកបានឲ្យដឹងនៅក្នុងប៉ុស្តិ៍ X ថា ប្រតិបត្តិការរបស់ខ្លួនប្រឆាំងនឹងក្រុម Houthi នៅតែបន្ត ដោយសំដៅទៅលើការវាយប្រហារតាមអាកាសថ្មីៗប្រឆាំងនឹងគោលដៅ Houthi។

ទូរទស្សន៍ Houthi al-Masirah បានរាយការណ៍ថា ការវាយប្រហារតាមអាកាសរបស់សហរដ្ឋអាមេរិកកាលពីថ្ងៃចន្ទបានកំណត់គោលដៅលើរោងចក្រផលិតកប្បាសនៅស្រុក Zabid ភាគខាងត្បូងនៃខេត្ត Hodeidah ភាគខាងលិច និងអគារអភិបាលខេត្តនៅភាគឦសាននៃខេត្ត Al-Jawf។ មិនទាន់មានសេចក្តីរាយការណ៍ភ្លាមៗអំពីអ្នកស្លាប់ និងរបួសនោះទេ។

ក្រសួងសុខាភិបាលដែលគ្រប់គ្រងដោយក្រុម Houthi នៅក្នុងទីក្រុង Sanaa បានឲ្យដឹងថា ចំនួនអ្នកស្លាប់ដោយសារការវាយប្រហារតាមអាកាសរបស់សហរដ្ឋអាមេរិកបានកើនឡើងដល់ ៥៣នាក់ក្នុងនោះមានកុមារ ៥នាក់ និងស្ត្រី ២នាក់ និង ៩៨នាក់ផ្សេងទៀតបានរងរបួស។ ប្រតិបត្តិការជួយសង្គ្រោះកំពុងដំណើរការដើម្បីស្វែងរកអ្នកផ្សេងទៀតដែលជាប់នៅក្រោមគំនរបាក់បែក។

ការវាយប្រហារតាមអាកាសរបស់សហរដ្ឋអាមេរិកបានចាប់ផ្តើមនៅល្ងាចថ្ងៃសៅរ៍ ខណៈដែលលោកប្រធានាធិបតី Donald Trump បានប្តេជ្ញាបន្តការវាយប្រហារតាមផ្លូវអាកាសរហូតដល់ក្រុម Houthi បញ្ឈប់ការវាយប្រហារលើបណ្តាញដឹកជញ្ជូន និងកប៉ាល់អន្តរជាតិ។