ក្រុមហ៊ុនផលិតដែកថែប របស់កូរ៉េខាងត្បូង កំពុងប្រឈមមុខនឹងបញ្ហាប្រឈមថ្មី និងតឹងតែងនៅក្នុងទីផ្សារសហរដ្ឋអាមេរិក

សេអ៊ូល៖ បើយោងតាមការចុះផ្សាយរបស់ទីភ្នាកងារ សារព័ត៌មានយុនហាប់ ក្រុមហ៊ុនផលិតដែកថែប របស់កូរ៉េខាងត្បូង កំពុងប្រឈមមុខនឹងបញ្ហាប្រឈមថ្មី និងតឹងតែងនៅក្នុងទីផ្សារសហរដ្ឋអាមេរិក ខណៈដែលរដ្ឋាភិបាល សហរដ្ឋអាមេរិក ត្រូវបានកំណត់ឱ្យចាប់ផ្តើមដំឡើងពន្ធលើការនាំចូលដែក និងអាលុយមីញ៉ូមទាំងអស់ចាប់ពីថ្ងៃពុធ។

ប្រធានាធិបតីអាមេរិក លោក ដូណាល់ ត្រាំ បានប្រកាសពីការយកពន្ធយ៉ាងច្រើន លើដៃគូពាណិជ្ជកម្មមួយចំនួនរបស់ប្រទេសលោក ចាប់តាំងពីចូលកាន់តំណែង ក្នុងខែមករា។ ក្នុងចំណោមនោះមានពន្ធ ២៥ ភាគរយ លើការនាំចូលដែកថែប និងអាលុយមីញ៉ូម ដែលគ្រោងនឹងចាប់ផ្តើមនៅរសៀលថ្ងៃពុធនេះ (ម៉ោងនៅប្រទេសកូរ៉េ)។

ជាការឆ្លើយតបទៅនឹងពន្ធដ៏ច្រើននេះ ក្រុមហ៊ុនដែកថែបកូរ៉េ រួមទាំងក្រុមហ៊ុន POSCO និង Hyundai Steel Co. បានឲ្យដឹងថា ពួកគេនឹងសហការយ៉ាងជិត ស្និទ្ធជាមួយរដ្ឋាភិបាល និងអភិវឌ្ឍផលិតផលលំដាប់ខ្ពស់បន្ថែមទៀត ដើម្បីរក្សាចំណែករបស់ពួកគេ នៅក្នុងទីផ្សារសហរដ្ឋអាមេរិក។

អ្នកនាំពាក្យរបស់ក្រុមហ៊ុន POSCO បានឲ្យដឹងតាមទូរស័ព្ទថា “ក្រុមហ៊ុននឹងផ្តោតការយកចិត្តទុកដាក់កាន់តែខ្លាំងលើការអភិវឌ្ឍន៍ផលិតផលបន្ថែមតម្លៃ និងកាត់បន្ថយថ្លៃដើមផលិតកម្មបន្ថែមទៀត ដើម្បីទទួលបានការប្រកួតប្រជែង ‘គ្មានគូប្រៀប’ ទោះបីជាលក្ខខណ្ឌទីផ្សារខាងក្រៅ ផ្លាស់ប្តូរយ៉ាងឆាប់រហ័សក៏ដោយ” ។ ក្រុមហ៊ុន POSCO បានឲ្យដឹងថា ខ្លួនកំពុងពិចារណាសាងសង់ រោងចក្រដែកនៅសហរដ្ឋអាមេរិក ដើម្បីទប់ទល់នឹងរបាំងពន្ធគយ៕