ប្រធានសិទ្ធិមនុស្ស UN ព្រួយបារម្ភខ្លាំង ពីការផ្លាស់ប្ដូរទិសដៅជាមូលដ្ឋានដោយអាមេរិក ក្រោមការដឹកនាំរបស់លោក ត្រាំ ដែលអាចបង្កឱ្យមានបញ្ហាសិទ្ធិមនុស្សនៅជុំវិញពិភពលោក
ហ្សឺណែវ៖ ប្រធានសិទ្ធិមនុស្សរបស់អង្គការសហប្រជាជាតិ លោក វ៉ុលឃឺរ តួក កាលពីថ្ងៃចន្ទទី៣ ខែមីនា បានសម្ដែងការព្រួយបារម្ភយ៉ាងខ្លាំង អំពីការផ្លាស់ប្ដូរទិសដៅជាមូលដ្ឋានដោយសហរដ្ឋអាម៉េរិក ក្រោមការដឹកនាំរបស់លោកប្រធានាធិបតី ដូណាល់ ត្រាំ ដែលអាចបង្កឱ្យមានបញ្ហាសិទ្ធិមនុស្សនៅជុំវិញពិភពលោក។
ឧត្តមស្នងការអង្គការសហប្រជាជាតិ ទទួលបន្ទុកសិទ្ធិមនុស្ស លោក តួក បាននិយាយនៅក្នុងសុន្ទរកថាមួយ ដែលមិនថ្លែងចំឈ្មោះលោក ត្រាំ ថា៖«យើងទទួលបានការគាំទ្រទ្វេភាគីពីសហរដ្ឋអាម៉េរិកលើសិទ្ធិមនុស្ស ក្នុងរយៈពេលជាច្រើនទសវត្សរ៍មកហើយ។ យ៉ាងណា ការផ្លាស់ប្ដូរជំហរនយោបាយក្នុងស្រុក និងអន្តរជាតិរបស់សហរដ្ឋអាម៉េរិក បានបង្កក្ដីបារម្ភចំពោះសិទ្ធិមនុស្សនៅជុំវិញពិភពលោក»។ លោកបន្តថា៖«គោលនយោបាយដែលមានគោលបំណងការពារមនុស្សពីការរើសអើង ឥឡូវក្លាយជាគោលនយោបាយរើសអើង។ សំដីបំភាន់ និងបំបែកបំបាក់ កំពុងបង្កើតការភ័យខ្លាច និងការថប់បារម្ភក្នុងចំណោមមនុស្សជាច្រើន»។
សុន្ទរកថារបស់លោក តួក ទៅកាន់ក្រុមប្រឹក្សាសិទ្ធិមនុស្សអង្គការសហប្រជាជាតិ នៅទីក្រុងហ្សឺណែវ ជាស្ថាប័នមួយដែលលោក ត្រាំ បានដកខ្លួនចេញពីកាលពីខែកុម្ភៈ គឺជាសុន្ទរកថា ដ៏ខ្លាំងបំផុតរបស់លោករហូតមកដល់ពេលនេះ ស្តីពីផលប៉ះពាល់នៃគោលនយោបាយថ្មីរបស់រដ្ឋបាលសហរដ្ឋអាម៉េរិក។ ចាប់តាំងពីចូលកាន់តំណែងនៅថ្ងៃទី២០ ខែមករា លោក ត្រាំ បានចេញបទបញ្ជាប្រតិបត្តិជាបន្តបន្ទាប់ ដែលមានគោលបំណងរុះរើកម្មវិធីភាពចម្រុះ សមធម៌ និងការដាក់បញ្ចូលនៅទូទាំងរដ្ឋាភិបាលសហព័ន្ធ និងវិស័យឯកជន។ កម្មវិធីរបស់ទីភ្នាក់ងារសហរដ្ឋអាម៉េរិក សម្រាប់កិច្ចអភិវឌ្ឍអន្តរជាតិ (USAID) ក៏ត្រូវបានផ្អាកសម្រាប់រយៈពេល៩០ថ្ងៃ ខណៈពេលរដ្ឋបាលរបស់បុរសសេដ្ឋកិច្ចរូបនេះ កំពុងពិនិត្យមើលថា តើវាស្របតាមគោលនយោបាយ America first ដែរឬទេ។
ការខ្វះខាតថវិការ៉ាំរ៉ៃរបស់ការិយាល័យសិទ្ធិមនុស្សអង្គការសហប្រជាជាតិ អាចនឹងកាន់តែធ្ងន់ធ្ងរឡើង ដោយសារការកាត់បន្ថយជំនួយបរទេសរបស់សហរដ្ឋអាម៉េរិក។ សហរដ្ឋអាម៉េរិកបានបរិច្ចាគលុយចំនួន៣៥លានដុល្លារកាលពីឆ្នាំមុន ស្មើនឹង១៥ភាគរយនៃវិភាគទានស្ម័គ្រចិត្តសរុប ដែលទទួលបានក្នុងឆ្នាំ២០២៤។ លោក តួក បានលើកឡើងថា៖«ការកាត់បន្ថយយ៉ាងខ្លាំងចំពោះការផ្ដល់ហិរញ្ញប្បទានសម្រាប់សុវត្ថិភាពសង្គម ហិរញ្ញវត្ថុអាកាសធាតុ និងជំនួយបរទេសរបស់សហរដ្ឋអាម៉េរិក គឺជាសញ្ញានៃការថយក្រោយដ៏ធំសម្រាប់ការការពារសិទ្ធិមនុស្ស ការការពារជម្លោះ និងសម្រាប់ស្ថិរភាពពិភពលោក»។
នៅក្នុងការពិនិត្យឡើងវិញជាសកលអំពីស្ថានភាពសិទ្ធិមនុស្ស ប្រមុខស្នងការដ្ឋានសិទ្ធិមនុស្សអង្គការសហប្រជាជាតិ បានព្រមានថា សណ្តាប់ធ្នាប់អន្តរជាតិប្រឈមនឹងការដួលរលំ ខណៈជម្លោះចំនួន១២០ បានកើតឡើងនៅជុំវិញពិភពលោក។ លោកបានលើកឡើងពីការព្រួយបារម្ភអំពីច្បាប់សន្តិសុខជាតិ ដែលរារាំងសិទ្ធិសេរីភាពពលរដ្ឋក្នុងទីក្រុងហុងកុង ដោយនិយាយថា លោកនឹងលើកបញ្ហានេះ និងបញ្ហាផ្សេងទៀតដូចជា សិទ្ធិមនុស្សនៅតំបន់ស៊ីនជាំង និងទីបេជាមួយអាជ្ញាធរចិន។ មិនត្រឹមតែប៉ុណ្ណោះ លោក តួក ក៏បានសម្ដែងការព្រមានអំពីការប្រើប្រាស់អាវុធយោធាប្រឆាំងនឹងប៉ាឡេស្ទីន នៅតំបន់ West Bank ដែលអ៊ីស្រាអែលកាន់កាប់ ហើយបានអំពាវនាវឱ្យអ៊ីស្រាអែលបញ្ឈប់ការគំរាមកំហែង។ អ៊ីស្រាអែល ដូចជាសហរដ្ឋអាម៉េរិកដែរ បានដកខ្លួនចេញពីក្រុមប្រឹក្សានេះ ដោយលើកឡើងពីការលម្អៀងប្រឆាំងនឹងខ្លួន៕
