នាយករដ្ឋមន្ត្រី ហ៊ុន ម៉ាណែត៖ សៀវភៅប្រវត្តិសាស្ត្របំពេញបន្ថែមថ្មី សម្រាប់បឋមសិក្សា មិនមែនជាសៀវភៅ បង្រៀនឱ្យដឹងគុណប្រទេសជិតខាងនោះទេ

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងអះអាងថា សៀវភៅប្រវត្តិសាស្ត្របំពេញបន្ថែមថ្មី សម្រាប់ថ្នាក់បឋមសិក្សា មិនមែនជាសៀវភៅ បង្រៀនឱ្យដឹងគុណប្រទេសជិតខាងនោះទេ ។

ក្នុងឱកាសអញ្ជើញប្រគល់សញ្ញាបត្រ ដល់និស្សិត​ នៃសាកលវទ្យាល័យ អាស៊ី អឺរ៉ុប សរុបចំនួន ២ ៥៥១ អង្គ/នាក់ នាថ្ងៃទី១៩ ខែកុម្ភៈនេះ សម្តេចធបិតី ហ៊ុន ម៉ាណែត លើកឡើងថា សៀវភៅដែលបោះពុម្ភថ្មីនេះ គឺជាសៀវភៅបំពេញបន្ថែម របស់ក្រសួងអប់រំ ទៅលើសៀវភៅប្រវត្តិវិទ្យា សម្រាប់បឋមសិក្សា ដែលមាន៣ច្បាប់ ក្នុងនោះនិយាយអំពីប្រវត្តិសាស្ត្រខ្មែរ តាមដំណាក់កាល នៃប្រវត្តិសាស្ត្រ ដែលបានកកើត ។ សម្តេចធិបតី មើលឃើញថា សៀវភៅមួយក្បាលដែលមានចំណងជើងថា «ខ្មែរ និងដំណើរឆ្ពោះទៅកាន់ វិបុលភាព» ដែលមានភាពចម្រូងចម្រាស់ខ្លាំងជាងគេ ដែលទាមទារឱ្យសម្តេចត្រូវតែ ចេញមកបកស្រាយ ។

សម្តេចធិបតី បានពន្យល់ថា សៀវភៅខាងលើនេះ មិនមែនចេញមកជំនួសសៀវភៅ ប្រវត្តិសាស្ត្រចាស់នោះទេ និងមិនមានការកែប្រែអ្វីឡើយ ប៉ុន្តែបំពេញបន្ថែម នូវរូបភាពជាច្រើន ដើម្បីឱ្យសិក្សានុសិស្សសិក្សាងាយយល់តែប៉ុណ្ណោះ ។ ហើយត្រូវបានចាត់ទុកថាជាការ ធ្វើទំនើបកម្ម នៃរបៀបបង្រៀន។

សម្តេចធិបតី បានគូសបញ្ជាក់ថា រឿងជាតិនិយម ការស្រលាញ់ជាតិ ការថែរក្សាវប្បធម៌ អត្តសញ្ញាណជាតិ ត្រូវតែមានគ្រប់គ្នាទាំងអស់ ខណៈដែលអ្នកបារម្ភ លើបណ្តាញសង្គមភាគច្រើន មិនទាន់បានបើកមើល សិក្សាពីសៀវភៅនេះនៅឡើយនោះទេ ដោយគ្រាន់តែវាយតម្លៃ តាមគម្របមុខនៃសៀវភៅ​។

សម្តេចធិបតី បានលើកឡើងថា ការភ័ណ្ឌច្រឡំទៅលើបញ្ហា ការចេញសៀវភៅប្រវត្តិសាស្ត្របំពេញបន្ថែមថ្មីនេះ មិនមែនជារឿងតូចឡើយ ដែលអាចនាំឱ្យខ្មែរនិងខ្មែរឈ្លោះគ្នាឯង ៕