សម្តេចបវរធិបតី ហ៊ុន ម៉ាណែត និងលោកជំទាវបណ្ឌិត ផ្តល់អំណោយជូនប្រជានេសាទ ភ្ញាក់រលឹក ស្ម័គចិត្តប្រគល់ឧបករណ៍ឆក់ត្រីខុសច្បាប់

ភ្នំពេញ៖ ឧត្តមសេនីយ៍ទោ សេង ធារិន មេបញ្ជាការរង នាយសេនាធិការ យោធភូមិភាគទី៥ និងជាប្រធានក្រុមការងារបង្ក្រាបបទល្មើសនេសាទ នាថ្ងៃទី៧ ខែកុម្ភៈ ឆ្នាំ២០២៥ បាននាំយកអំណោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ចែកជូនដល់ប្រជានេសាទ ភ្ញាក់រលឹក ស្ម័គចិត្តប្រគល់ឧបករណ៍ឆក់ត្រីខុសច្បាប់ ជូនកងកម្លាំងប្រតិបត្តិការបង្រ្កាបបទល្មើសនេសាទ ស្ថិតនៅឃុំកោះជីវាំង ស្រុកឯកភ្នំ ខេត្តបាត់ដំបង សរុបចំនួន ១២៨គ្រួសារ និងចែកសម្ភារសិក្សាជូនដល់សិស្សានុសិស្ស ចំនួន ២៩៨នាក់ និងលោកគ្រូអ្នកគ្រូចំនួន ៦នាក់។

ឧត្តមសេនីយ៍ទោ សេង ធារិន បានបញ្ជាក់ថា សម្តេចមហាបវរធិបតី ហ៊ុន ម៉ាណែត និងលោកជំទាវ បណ្ឌិត តែងតែគិតគូ ដល់សុខទុក្ខប្រជាពលរដ្ឋ និងប្រជានេសាទដែលជួបការលំបាក ជានិច្ចជាកាលបានផ្តល់អំណោយ ជាគ្រឿងឧបភោគបរិភោគ និងថវិកា ជួយសម្រួលការលំបាក ផងដែរ។
ការភ្ញាក់រលឹក និងប្រគល់ឧបរកណ៍ នេសាទ
ខុសច្បាប់ជូនកងកម្លាំង គឺជាស្មារតី ចូលរួមការពារ និងអភិរក្ស ធនធានធម្មជាតិ និងជីវចម្រុះ ក្នុងបឹងទន្លេសាបសម្រាប់អ្នកជំនាន់ក្រោយ។

ជាក់ស្តែងនៅថ្ងៃនេះប្រជាពលនេសាទ ចំនួន ១២៨គ្រួសារ ក្នុងមួយគ្រួសារទទួលបានគ្រឿងឧបភោគបរិភោគ ចំនួន ៧មុខ និងថវិកាមួយចំនួន។ អាជ្ញាធរមូលដ្ឋាន ប្រជានេសាទនិងសិស្សានុសិស្សទាំងអស់ សូមគោរពជូនពរ និងថ្លែងអំណរគុណយ៉ាងជ្រាលជ្រៅបំផុតជូនចំពោះ សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ដែលតែងតែយកចិត្តទុកដាក់ដល់ប្រជាពលរដ្ឋ ជួបការលំបាកគ្រប់វេលា ព្រមទាំងបួងសួងដល់វត្ថុស័ក្តិសិទ្ធក្នុងលោក សូមប្រសិទ្ធិពរជ័យបវរសួស្តី ជួបតែសេចក្ដីសុខ សេចក្តីចម្រើន សុភមង្គល ក្នុងក្រុមគ្រួសារ ទទួលបានជោគជ័យគ្រប់ភារកិច្ច និងជួបពុទ្ធពរ ៤ប្រការ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។