អាជ្ញាធរទន្លេសាប និងធនាគារពិភពលោកប្រចាំកម្ពុជា បើកកិច្ចប្រជុំសម្របសម្រួលជាមួយភាគីពាក់ព័ន្ធស្ដីពី «ការកសាងកិច្ចសហការរួមគ្នាសម្រាប់សន្តិសុខទឹក និងភាពធន់នៅបឹងទន្លេសាប»

ភ្នំពេញ៖ នៅព្រឹកថ្ងៃទី២៧ ខែមករា ឆ្នាំ២០២៥ លោក ហ៊ែល តូនី អនុប្រធានអចិន្ត្រៃយ៍ អាជ្ញាធរទន្លេសាប តំណាងឯកឧត្ដម ថោ ជេដ្ឋា រដ្ឋមន្រ្តីក្រសួងធនធានទឹក និងឧតុនិយម និងជាប្រធានអាជ្ញាធរទន្លេសាប រួមជាមួយលោកស្រី Tania Mayer ប្រធានគ្រប់គ្រងប្រចាំប្រទេស នៃធនាគារពិភពលោកប្រចាំកម្ពុជា បានអញ្ជើញជាអធិបតីភាពដឹកនាំកិច្ចប្រជុំសម្របសម្រួលជាមួយភាគីពាក់ព័ន្ធស្ដីពី «ការកសាងកិច្ចសហការរួមគ្នាសម្រាប់សន្តិសុខទឹក និងភាពធន់នៅបឹងទន្លេសាប»។

កិច្ចប្រជុំនេះមានកិច្ចសហការជាមួយ ធនាគារពិភពលោក (WBG), ក្រសួងកិច្ចការបរទេស និងពាណិជ្ជកម្ម (DFAT) និង Australian Water Partnership (AWP) ក្នុងការអនុវត្តកម្មវិធីវាយតម្លៃសន្តិសុខ និងភាពធន់នៃនឹងទន្លេសាប សម្រាប់ឆ្នាំ ២០២៤-២០២៦។

សូមជម្រាបជូនថា កិច្ចប្រជុំខាងលើ មានសមាសភាពចូលរួមពីសមាជិកសមាជិកាអាជ្ញាធរទន្លេសាប ក្រសួង ស្ថាប័នពាក់ព័ន្ធ ខេត្តពាក់ព័ន្ធជុំវិញបឹងទន្លេសាប ស្ថាប័នអប់រំ និងស្រាវជ្រាវ និងដៃគូអភិវឌ្ឍន៍ ដោយផ្ដោតសំខាន់លើ៖

ទី១៖ បង្កើនការយល់ដឹងទាក់ទងនឹងបញ្ហាប្រឈមនៅក្នុងតំបន់បឹងទន្លេសាប និងស្ទឹងសំខាន់ៗទាំង១១។
ទី២៖ គាំទ្រគោលនយោបាយនានាដែលពាក់ព័ន្ធ ដើម្បីចូលរួមឯកភាពគ្នាក្នុងការបង្កើតឡើងនូវការគ្រប់គ្រងអាងទន្លេសាប ព្រមទាំងការសម្រេចចិត្តផ្អែកលើភស្តុតាងនានា សម្រាប់បង្កើតនូវផែនការអភិវឌ្ឍពហុដំណាក់ កាលរយៈពេលវែងសម្រាប់ទន្លេសាបប្រកបដោយនិរន្តរភាព និងកិច្ចសហការ។
ទី៣៖ ផ្លាស់ប្តូរចំណេះដឹង បង្កើតកម្មវិធី និងការពង្រឹងសមត្ថភាពរវាងភាគីពាក់ព័ន្ធ។

សូមបញ្ជាក់ជូនថា កិច្ចប្រជុំនេះ មានគោលបំណងបង្កើននូវការយល់ដឹងអំពីកម្មវិធីសន្តិសុខទឹក និងភាពធន់នៃបឹងទន្លេសាប ដើម្បីទទួលយកចំណេះដឹងថ្មីៗ និងគម្រោង ឬកម្មវិធីនានា ដែលស្ថិតនៅក្រោមខ្សែបន្ទាត់ក្រសួង ស្ថាប័នពាក់ព័ន្ធសំខាន់ៗ ដើម្បីជូនដំណឹងអំពីការវាយតម្លៃនាពេលខាងមុខ និងក្របខ័ណ្ឌយុទ្ធសាស្រ្តសម្រាប់អាងទន្លេសាប។

ជាលទ្ធផល កិច្ចប្រជុំនេះសម្រេចបាននូវការចែករំលែក និងពិភាក្សាក្នុងចំណោមភាគីពាក់ព័ន្ធអំពីទស្សនៈសម្រាប់ការអភិរក្ស និងការអភិវឌ្ឍតំបន់បឹងទន្លេសាប ក៏ដូចជាការកសាង ការរួមបញ្ចូលគ្នាសម្រាប់សន្តិសុខទឹក និងភាពធន់នៅបឹងទន្លេសាប។ដោយអនុលោមតាមផែនការចូលរួមរបស់គម្រោង ការពិគ្រោះយោបល់ជាបន្តបន្ទាប់ ការចែករំលែកផ្លាស់ប្តូរចំណេះដឹង និងត្រូវរៀបចំឡើងជាជំហានសំខាន់ៗ ក្រោមគម្រោងសម្រាប់កម្មវិធីសន្តិសុខទឹក និងភាពធន់នៃបឹងទន្លេសាប៕