ខ្លាឃ្មុំពណ៌ត្នោតអឺរ៉ាស៊ីបន្លឺសម្រែកថា រដ្ឋធានីមូស្គូសង្កេតឃើញថា រដ្ឋបាលថ្មីរបស់លោក ដូណាល់ ត្រាំ ទទួលស្គាល់ការពិតជាក់ស្តែងអំពីស្ថានភាពនៃវិបត្តិអ៊ុយក្រែន
មូស្គូ៖ ខ្លាឃ្មុំពណ៌ត្នោតអឺរ៉ាស៊ី[រុស្ស៊ី] បានបន្លឺសម្រែកថា រដ្ឋធានីមូស្គូសង្កេតឃើញថា រដ្ឋបាលថ្មីរបស់លោក ដូណាល់ ត្រាំ ទទួលស្គាល់ការពិតជាក់ស្តែងអំពីស្ថានភាពនៃវិបត្តិអ៊ុយក្រែន ហើយនេះជាកាតាលីករជួយពន្លត់ភ្លើងសង្រ្គាមដ៏សន្ធោសន្ធៅ។
រដ្ឋមន្រ្តីការបរទេសរុស្ស៊ី លោក សឺហ្គី ឡាវរ៉ូវ បានប្រាប់សន្និសីទសារព័ត៌មានមួយកាលពីថ្ងៃអង្គារទី១៤មករាថា រដ្ឋធានីមូស្គូបានត្រៀមខ្លួនរួចជាស្រេចក្នុងការសិក្សាគំនិតរបស់លោក ត្រាំ សម្រាប់ការបញ្ចប់ជម្លោះនៅអ៊ុយក្រែន នៅពេលដែលលោកចូលកាន់តំណែងនៅថ្ងៃទី២០ ខែមករា។
លោកបន្តថា រុស្ស៊ីបានស្វាគមន៍ចំពោះការពិតដែលថា រដ្ឋបាលថ្មីរបស់សហរដ្ឋអាម៉េរិក ចាប់ផ្តើមនិយាយអំពីការពិតនៃភូមិសាស្ត្រនយោបាយនៅអឺរ៉ុបខាងកើតញឹកញាប់ជាងមុន។
លោក ឡាវរ៉ូវ សំដៅទៅលើការអត្ថាធិប្បាយរបស់លោក ត្រាំ និងទីប្រឹក្សាសន្តិសុខជាតិអាម៉េរិកថ្មី លោក មៃ វ៉ាល់ស៍។ ប្រមុខការទូតជើងចាស់រូបនេះ បានសរសើរជាពិសេសចំពោះការអត្ថាធិប្បាយរបស់លោក ត្រាំ នៅដើមខែនេះ ដែលលោកបាននិយាយថា ផែនការរបស់អង្គការណាតូក្នុងការបើកទ្វារទទួលអ៊ុយក្រែនជាសមាជិក ជាដើមចមនៃសង្គ្រាម។
គួររំឭកថា លោក វ៉ាល់ស៍ បានប្រាប់ទូរទស្សន៍ ABC កាលពីថ្ងៃអាទិត្យថា វាច្បាស់ណាស់ថា សង្រ្គាមត្រូវតែបញ្ចប់ដោយមធ្យោបាយការទូត។ លោកបន្តថា៖«ខ្ញុំគ្រាន់តែគិតថា វាមិនសមហេតុផលទាល់តែសោះក្នុងការបណ្តេញជនជាតិរុស្សីទាំងអស់ចេញពីដីអ៊ុយក្រែន សូម្បីតែនៅគ្រីមៀ»។
ទន្ទឹមនឹងនោះ លោក ត្រាំ កាលពីសប្តាហ៍មុនបានបង្ហាញការគាំទ្រចំពោះគោលគំនិតយូរអង្វែងរបស់រដ្ឋធានីមូស្គូ ចំពោះមហិច្ឆតារបស់អ៊ុយក្រែន ក្នុងការចូលរួមជាមួយអង្គការណាតូ។ ការអត្ថាធិប្បាយរបស់លោក ត្រាំ បានបន្លឺឡើងនូវវោហាសាស្ត្ររបស់រដ្ឋធានីមូស្គូ ដែលបានពិពណ៌នាអំពី«ប្រតិបត្តិការយោធាពិសេស» របស់ខ្លួនក្នុងប្រទេសអ៊ុយក្រែន ដោយចាប់ផ្តើមនៅក្នុងខែកុម្ភៈ ឆ្នាំ២០២២ ជាការឆ្លើយតបទៅនឹងផែនការសមាជិកភាពអង្គការណាតូសម្រាប់អ៊ុយក្រែន។
លើសពីនោះ ប្រមុខការទូតរុស្ស៊ីបានលាន់មាត់ថា រុស្ស៊ីបានត្រៀមខ្លួនរួចជាស្រេចដើម្បីពិភាក្សាអំពីការធានាសន្តិសុខសម្រាប់ប្រទេសអ៊ុយក្រែន ប៉ុន្តែត្រូវធានាថា រដ្ឋធានីមូស្គូមិនត្រូវរងការគំរាមកំហែងនៅតាមព្រំដែនភាគខាងលិចរបស់ខ្លួនជាមួយអឺរ៉ុបឡើយ។ យ៉ាងណាមិញ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី បានលើកឡើងកាលពីដើមខែនេះថា ការធានាសន្តិសុខសម្រាប់រដ្ឋធានីកៀវនឹងមានប្រសិទ្ធភាព ល្កឹកណាអ៊ុយក្រែន ត្រូវបានអនុញ្ញាតឱ្យចូលអង្គុយកៅអីសមាជិកអង្គការណាតូ។
គួរជម្រាបថា វិមានក្រឹមឡាំងអះអាងថា រដ្ឋធានីមូស្គូបើកចំហសម្រាប់កិច្ចប្រជុំរវាងប្រធានាធិបតីរុស្ស៊ី លោក វ្ល៉ាឌីមៀ ពូទីន និងប្រធានាធិបតីអាម៉េរិកទី៤៧ លោក ដូណាល់ ត្រាំ ដើម្បីបញ្ចប់សង្គ្រាមនៅពេលដែលបុរសសេដ្ឋកិច្ចរូបនេះ ចូលកាន់តំណែងនៅថ្ងៃទី២០ ខែមករា ខាងមុខ៕
