រដ្ឋមន្ត្រីការបរទេសអាម៉េរិក នឹងធ្វើដំណើរទស្សនកិច្ចទៅកាន់ប្រទេសកូរ៉េខាងត្បូង ជប៉ុន និងបារាំង ចំពេលដំបៅវិបត្តិនយោបាយនៅរដ្ឋធានីសេអ៊ូលកាន់តែគួរឱ្យព្រួយបារម្ភ

វ៉ាស៊ីនតោន៖ ក្រសួងការបរទេសអាម៉េរិក បានបញ្ជាក់កាលពីថ្ងៃសុក្រទី៣ ខែមករាថា រដ្ឋមន្ត្រីការបរទេសអាម៉េរិកលោក អាន់តូនី ប្លីងខេន នឹងធ្វើដំណើរទស្សនកិច្ចទៅកាន់ប្រទេសកូរ៉េខាងត្បូង ជប៉ុន និងបារាំង ចាប់ពីថ្ងៃទី៤ដល់ថ្ងៃទីខែមករាដើមឆ្នាំ២០២៥នេះ ចំពេលដំបៅវិបត្តិនយោបាយនៅរដ្ឋធានីសេអ៊ូលកាន់តែគួរឱ្យព្រួយបារម្ភ។

ជាការពិតណាស់ លោក ប្លីងខេន នឹងហោះទៅជួបជាមួយមន្ត្រីជាន់ខ្ពស់រដ្ឋាភិបាលកូរ៉េខាងត្បូង ហើយនឹងពិភាក្សាអំពីរបៀបដែលពួកគេអាចពង្រឹងកិច្ចខិតខំប្រឹងប្រែងសំខាន់ៗដើម្បីលើកកម្ពស់តំបន់ឥណ្ឌូប៉ាស៊ីហ្វិកសេរី បើកចំហ និងវិបុលភាព ក៏ដូចជាកិច្ចខិតខំប្រឹងប្រែងត្រីភាគីជាមួយប្រទេសជប៉ុនផងដែរ។

ដំណើរទស្សនកិច្ចបរបស់លោក ប្លីងខេន ធ្វើឡើង បន្ទាប់ពីអង្គរក្សលោក យូន ស៊ុកយ៉ុល និងយោធាកូរ៉េខាងត្បូង បានរារាំងប៉ូលិស និង ក្រុម រដ្ឋ អាជ្ញា កូរ៉េខាង ត្បូងមិនឱ្យចាប់ខ្លួនលោក យូន កាលពីថ្ងៃសុក្រទី៣ខែមករាឆ្នាំ២០២៥។ កូរ៉េខាងត្បូងគឺជាសម្ព័ន្ធមិត្តសន្តិសុខដ៏សំខាន់សម្រាប់បងធំអាម៉េរិក ប៉ុន្តែប្រទេសនេះបានផុងជើងធ្លាក់ចូលក្នុងវិបត្តិនយោបាយដែលបង្កឡើងដោយការប្រើច្បាប់អាជ្ញាសឹករយៈពេលខ្លីរបស់លោកប្រធានាធិបតី យូន កាលពីថ្ងៃទី៣ ខែធ្នូ២០២៤។

លោក ប្លីងខេន នឹងជួបសមភាគី លោក ឆូ ថេយ៉ុល (Cho Tae-yul) នៅថ្ងៃចន្ទទី៦ ខែមករា។  ប្រមុខការទូតទាំង២ ត្រូវបានគេរំពឹងថានឹងពិភាក្សាអំពីសម្ព័ន្ធភាពកូរ៉េខាងត្បូង-សហរដ្ឋអាម៉េរិក កិច្ចសហប្រតិបត្តិការកូរ៉េខាងត្បូង-អាម៉េរិក-ជប៉ុន បញ្ហាកូរ៉េខាងជើង និងបញ្ហាប្រឈមក្នុងតំបន់ និងពិភពលោក។ ក្រសួងការបរទេសនៅក្នុងសេចក្តីថ្លែងការណ៍មួយមិនបានលើកឡើងដោយផ្ទាល់អំពីភាពវឹកវរនយោបាយឡើយ ដោយគ្រាន់តែថា៖«លោក ប្លីងខេន នឹងនិយាយអំពីវិធីដែលប្រទេសទាំងពីរអាចកសាងលើកិច្ចសហប្រតិបត្តិការដ៏សំខាន់របស់យើងលើបញ្ហាប្រឈមជុំវិញពិភពលោកដោយផ្អែកលើតម្លៃរួមរបស់យើង»។

មិនត្រឹមតែប៉ុណ្ណោះ លោក ប្លីនខេន ក៏នឹងហោះទៅប្រទេសបារាំង ដើម្បីពិភាក្សាអំពីបញ្ហាប្រឈមដ៏ក្ដៅគគុកនៅមជ្ឈិមបូព៌ា និងអឺរ៉ុបផងដែរ ចំពេលមានកិច្ចខិតខំប្រឹងប្រែងបន្តដើម្បីធានាបាននូវបទឈប់បាញ់នតំបន់ហ្កាហ្សា។ នេះបើតាមការចេញផ្សាយរបស់ក្រសួងការបរទេសអាម៉េរិក៕