ក្រសួងហិរញ្ញវត្ថុថៃ៖ វិស័យនាំចេញ និងទេសចរណ៍ត្រូវបានរំពឹងថា នឹងបន្តជួយគាំទ្រសេដ្ឋកិច្ចរបស់ប្រទេសថៃ

បាងកក៖ បើយោងតាមកាសែតបាងកកប៉ុស្តិ៍ក្រសួងហិរញ្ញវត្ថុថៃបានឱ្យដឹងថា វិស័យនាំចេញ និងទេសចរណ៍ត្រូវបានរំពឹងថា នឹងបន្តជួយគាំទ្រសេដ្ឋកិច្ចរបស់ប្រទេសថៃ ប៉ុន្តែឧស្សាហកម្មរថយន្តនៅតែជាក្តីបារម្ភខ្លាំង។

កាសែតបាងកកប៉ុស្តិ៍បានរាយការណ៍ដោយដកស្រង់សម្ដី លោក Pornchai Thiraveja អគ្គនាយកការិយាល័យគោលនយោបាយសារពើពន្ធ នៃក្រសួងសេដ្ឋកិច្ចថៃខណៈថ្លែងថា សូចនាករសេដ្ឋកិច្ចសម្រាប់ការប្រើប្រាស់វិស័យឯកជន ក្នុងខែវិច្ឆិកាបានបង្ហាញសញ្ញាប្រសើរឡើង បើធៀបទៅនឹងរយៈពេលដូចគ្នាកាលពីឆ្នាំមុន។ ទោះជាយ៉ាងណា ការប្រើប្រាស់ទំនិញប្រើប្រាស់បានយូរ ជាពិសេសក្នុងវិស័យរថយន្តនៅតែមានការថមថយ។

ចំណូលពិតក្នុងវិស័យកសិកម្មក្នុងខែវិច្ឆិកាឆ្នាំនេះ បានកើនឡើង ៨ភាគរយធៀបនឹងរយៈពេលដូចគ្នាកាលពីឆ្នាំមុន។ ទោះជាយ៉ាងណា ការប្រើប្រាស់ទំនិញប្រើប្រាស់បានយូរ ក្នុងវិស័យរថយន្តនៅតែទន់ខ្សោយ ដែលឆ្លុះបញ្ចាំងពីការធ្លាក់ចុះការលក់រថយន្តដឹកអ្នកដំណើរ និងម៉ូតូថ្មីៗនៅក្នុងខែវិច្ឆិកា ពោលគឺថយចុះ ៣០,១% និង ៤,៥% រៀងគ្នា បើធៀបនឹងរយៈពេលដូចគ្នាកាលពីឆ្នាំមុន។

យោងតាមលោក Pornchai សូចនាករសេដ្ឋកិច្ចសម្រាប់ការវិនិយោគឯកជនក៏បង្ហាញសញ្ញាធ្លាក់ចុះផងដែរ ដោយការវិនិយោគឯកជនលើគ្រឿងម៉ាស៊ីន និងឧបករណ៍បានធ្លាក់ចុះ ៥,១% ក្នុងខែវិច្ឆិកាធៀបនឹងរយៈពេលដូចគ្នាកាលពីឆ្នាំមុន។

សម្រាប់ការនាំចេញវិញ លោក Pornchai បាននិយាយថា តម្លៃនៃការនាំចេញទំនិញបានកើនឡើងនៅក្នុងខែវិច្ឆិកា ធៀបនឹងរយៈពេលដូចគ្នាកាលពីឆ្នាំមុន។ តម្លៃនាំចេញសរុបនៃទំនិញគិតជាប្រាក់ដុល្លារអាមេរិកក្នុងខែវិច្ឆិកាមានចំនួន ២៥,៦ពាន់លានដុល្លារអាមេរិក កើនឡើង ៨,២% ធៀបនឹងរយៈពេលដូចគ្នាកាលពីឆ្នាំមុន។

លោក Pornchai បានឱ្យដឹងទៀតថា ប្រទេសថៃបានស្វាគមន៍ភ្ញៀវទេសចរអន្តរជាតិចំនួន ៣,១៥លាននាក់នៅក្នុងខែវិច្ឆិកា កើនឡើង ១៩,៥% ធៀបនឹងរយៈពេលដូចគ្នាកាលពីឆ្នាំមុន ដោយភាគច្រើនមកពីប្រទេសចិន ម៉ាឡេស៊ី ឥណ្ឌា កូរ៉េខាងត្បូង និងរុស្ស៊ី។ នេបើយោងតាមកាសែតបាងកកប៉ុស្តិ៍៕