វិមានក្រឹមឡាំងថាការផ្គត់ផ្គង់ឧស្ម័នទៅអឺរ៉ុបមានការពិបាក នៅពេលដែលកិច្ចព្រមព្រៀងដឹកជញ្ជូនអ៊ុយក្រែនជិតដល់ទីបញ្ចប់

ម៉ូស្គូ៖ អ្នកនាំពាក្យវិមានក្រឹមឡាំង លោក Dmitry Peskov បានបញ្ជាក់កាលពីថ្ងៃចន្ទថា ការដឹកជញ្ជូនឧស្ម័នរុស្ស៊ីទៅកាន់បណ្តាប្រទេសអ៊ឺរ៉ុបនាពេលនេះគឺមានការពិបាក ហើយទាមទារឱ្យមានការយកចិត្តទុកដាក់។

លោក Peskov បានធ្វើការកត់សម្គាល់បន្ទាប់ពីកិច្ចប្រជុំរវាងនាយករដ្ឋមន្ត្រីស្លូវ៉ាគី លោក Robert Fico និងប្រធានាធិបតីរុស្ស៊ី លោក Vladimir Putin នៅទីក្រុងមូស្គូកាលពីថ្ងៃអាទិត្យដែលភាគីបានពិភាក្សាអំពីការឆ្លងកាត់ឧស្ម័នរបស់រុស្ស៊ីខណៈដែលអ៊ុយក្រែនបានបដិសេធមិនបន្តកិច្ចព្រមព្រៀងដឹកជញ្ជូនឧស្ម័នជាមួយរុស្ស៊ី។

លោក Peskov បានបន្តថា «អ្នកបានលឺសេចក្តីថ្លែងការណ៍ពីភាគីអ៊ុយក្រែន ហើយអ្នកដឹងពីជំហររបស់ប្រទេសអ៊ឺរ៉ុបទាំងនោះដែលបន្តទិញឧស្ម័នពីរុស្ស៊ី ហើយដែលចាត់ទុកថាវាចាំបាច់សម្រាប់ប្រតិបត្តិការធម្មតានៃសេដ្ឋកិច្ចរបស់ពួកគេ»។ លោកថា វាមានភាពស្មុគស្មាញណាស់ ស្ថានភាពដែលត្រូវការការយកចិត្តទុកដាក់។

ប្រធានាធិបតីអ៊ុយក្រែន លោក Volodymyr Zelensky បានឲ្យដឹងកាលពីថ្ងៃព្រហស្បតិ៍នៅឯកិច្ចប្រជុំកំពូលរបស់សហភាពអឺរ៉ុបថាលោកនឹងមិនបន្តកិច្ចព្រមព្រៀងដឹកជញ្ជូនឧស្ម័នរយៈពេលប្រាំឆ្នាំរបស់អ៊ុយក្រែនជាមួយប្រទេសរុស្ស៊ីដែលនឹងផុតកំណត់នៅចុងឆ្នាំ២០២៤ នោះទេ។

ការផ្លាស់ប្តូរនេះបានធ្វើឱ្យមានការព្រួយបារម្ភចំពោះស្លូវ៉ាគីដែលមានកិច្ចសន្យារយៈពេលវែងជាមួយក្រុមហ៊ុនថាមពលយក្សរុស្ស៊ី Gazprom។ ទោះបីជាលោកពូទីនបានបញ្ជាក់ពីការត្រៀមខ្លួនរបស់រុស្ស៊ីក្នុងការបន្តផ្គត់ផ្គង់ឧស្ម័នទៅកាន់លោកខាងលិច និងដល់ប្រទេសស្លូវ៉ាគីក៏ដោយ លោក Fico បានបញ្ជាក់ថា នេះគឺមិនអាចអនុវត្តបាន នៅពេលដែលកិច្ចព្រមព្រៀងដឹកជញ្ជូនឧស្ម័នផុតកំណត់នៅចុងឆ្នាំនេះ។