ឯកឧត្តម ចាន់ ស៊ីណាត អញ្ជើញចូលរួមក្នុងកិច្ចប្រជុំត្រួតពិនិត្យរបាយការណ៍បេសកកម្មរបស់ក្រុមការងារធនាគារវិនិយោគហេដ្ឋារចនាសម្ព័ន្ធអាស៊ី (AIIB)

ភ្នំពេញ៖ នៅថ្ងៃអង្គារ ២រោច ខែមិគសិរ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី១៧ ខែធ្នូ ឆ្នាំ២០២៤នេះ ឯកឧត្តម ចាន់ ស៊ីណាត រដ្ឋលេខាធិការ តំណាងដ៏ខ្ពង់ខ្ពស់របស់ឯកឧត្តម ថោ ជេដ្ឋា រដ្ឋមន្ដ្រីក្រសួងធនធានទឹក និងឧតុនិយម បានអញ្ជើញចូលរួមកិច្ចប្រជុំដែលដឹកនាំដោយឯកឧត្តម រស់ សីលវ៉ា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ នៅសាលប្រជុំនៃទីស្តីការក្រសួងសេដ្ឋកិច្ច និងហិរញ្ញវត្ថុ។

សូមជម្រាបថា កិច្ចប្រជុំនេះគឺដើម្បីត្រួតពិនិត្យមើលលើរបាយការណ៍របស់ក្រុមការងារបេសកកម្មធនាគារវិនិយោគហេដ្ឋារចនាសម្ព័ន្ធអាស៊ី(AIIB) ដឹកនាំដោយលោកបណ្ឌិត Rajesh Yadav ដែលបានចុះពិនិត្យជាក់ស្តែងដល់បណ្តាខេត្តគោលដៅនៃគម្រោងការកសាងប្រព័ន្ធធារាសាស្រ្តធន់នឹងអាកាសធាតុ និងគម្រោងការគ្រប់គ្រងវិស័យធនធានទឹកដោយវិធានការចម្រុះ ដែលនឹងត្រូវអនុវត្តនៅខេត្តពោធិ៍សាត់ ខេត្តកំពង់ឆ្នាំង ខេត្តកំពង់ស្ពឺ និងខេត្តកណ្តាល។

ឯកឧត្តម ចាន់ ស៊ីណាត រដ្ឋលេខាធិការ បានឱ្យដឹងថា ក្រសួងសេដ្ឋកិច្ច និងហិរញ្ញវត្ថុ បានកោតសរសើរយ៉ាងខ្លាំងលើកិច្ចខំប្រឹងប្រែងសហប្រតិបត្តិការដ៏ល្អប្រសើររបស់ក្រសួងធនធានទឹក និងឧតុនិយម ជាមួយធនាគារវិនិយោគហេដ្ឋារចនាសម្ព័ន្ធអាស៊ី (AIIB) ព្រមទាំងសហហិរញ្ញប្បទានផ្សេងទៀតដូចជា ធនាគារអភិវឌ្ឍន៍អាស៊ី (ADB) មូលនិធិអន្ដរជាតិសម្រាប់កិច្ចអភិវឌ្ឍន៍វិស័យកសិកម្ម (IFAD) និងមូលនិធិអាកាសធាតុបៃតង (GCF) ជាដើម។

ទន្ទឹមនឹងនេះ ឯកឧត្តមរដ្ឋលេខាធិការបានបញ្ជាក់បន្ថែមថា ក្រសួងសេដ្ឋកិច្ច និងហិរញ្ញវត្ថុ បានគាំទ្រយ៉ាងពេញទំហឹង និងបានស្នើឱ្យភាគីធនាគារវិនិយោគហេដ្ឋារចនាសម្ព័ន្ធអាស៊ី (AIIB) ផ្តល់នូវហិរញ្ញប្បទានឥតសំណងឱ្យបានច្រើនដល់បណ្តាគម្រោងខាងលើ ៕