ប៉ូលិសឥណ្ឌូណេស៊ី ត្រូវបានចោទប្រកាន់ពីបទជាប់ពាក់ព័ន្ធ នឹងការសម្លាប់មនុស្សក្រៅប្រព័ន្ធតុលាការ ៣១នាក់
ហ្សាការតា៖ អង្គការលើកលែងទោសអន្តរជាតិនៅក្នុងប្រទេសឥណ្ឌូណេស៊ី បានបញ្ជាក់កាលពីថ្ងៃចន្ទទី៩ធ្នូថា ប៉ូលិសឥណ្ឌូណេស៊ីត្រូវបានចោទប្រកាន់ពីបទជាប់ពាក់ព័ន្ធនឹងការសម្លាប់មនុស្សក្រៅប្រព័ន្ធតុលាការចំនួន៣១នាក់ បង្ហាញពីកង្វះវឌ្ឍនភាពនៃដំណើរការកំណែទម្រង់ប៉ូលិស។
អង្គការលើកលែងទោសបានកត់ត្រាយ៉ាងហោចណាស់១១៦ករណីនៃអំពើហិង្សារបស់ប៉ូលិស នៅចន្លោះខែមករាដល់ខែវិច្ឆិកាឆ្នាំនេះ រួមទាំងករណីនៃការសម្លាប់ក្រៅប្រព័ន្ធតុលាការចំនួន២៩ករណី បណ្តាលឱ្យមានអ្នកស្លាប់សរុបមានចំនួន៣១ នាក់។ ករណីចុងក្រោយបំផុតមួយ គឺកាលពីចុងខែវិច្ឆិកា នៅពេលដែលមន្ត្រីប៉ូលិសម្នាក់ត្រូវបានចោទប្រកាន់ ថាបានបាញ់សម្លាប់សិស្សនិស្សិតម្នាក់នៅខេត្តជ្វាភាគកណ្តាល Central Java។ មន្ត្រីម្នាក់ត្រូវបានឃាត់ខ្លួនជុំវិញករណីនេះ ដោយទទួលបានការចាប់អារម្មណ៍ពីប្រជាជនទូទាំងប្រទេស បន្ទាប់ពីប៉ូលិសក្នុងតំបន់អះអាងថា មន្ត្រីម្នាក់បានចាត់វិធានការដើម្បីបំបែកការប៉ះទង្គិចគ្នារបស់សិស្ស ប៉ុន្តែប្រធានផ្នែកកិច្ចការផ្ទៃក្នុងរបស់ប៉ូលិសប្រចាំខេត្តជ្វាភាគកណ្តាល លោក អារីស ស៊ូព្រីយ៉ូណូ (Aris Supriyono) ប្រាប់សមាជិកសភា កាលពីសប្តាហ៍មុនថា ការបាញ់ប្រហារនេះមិនទាក់ទងនឹងការបំបែកការឈ្លោះប្រកែកគ្នានោះទេ។
នាយកប្រតិបត្តិរបស់អង្គការលើកលែងទោសអន្តរជាតិ នៅក្នុងប្រទេសឥណ្ឌូណេស៊ី លោក អ៊ូសម៉ាន ហាមីដ (Usman Hamid) បានឱ្យដឹងថា ករណីនៃអំពើហិង្សាដែលបង្កឡើងដោយប៉ូលិស រួមមាន៖ ការធ្វើទារុណកម្ម ការប្រើឧស្ម័នបង្ហូរទឹកភ្នែក និងការចាប់ខ្លួនដោយបំពានបានបង្ហាញពីភាពខ្វះខាតជាប្រព័ន្ធក្នុងកំណែទម្រង់របស់ប៉ូលិសឥណ្ឌូណេស៊ី។ អង្គការលើកលែងទោស ក៏បានកត់ត្រាករណីផ្សេងទៀតនៃអំពើហិង្សារបស់ប៉ូលិសក្នុងរយៈពេលដូចគ្នានេះ រួមទាំងករណីគំរាមកំហែង២៨ ករណី និងអំពើហិង្សាលើរាងកាយ ព្រមទាំងការធ្វើទារុណកម្មចំនួន២៦ ករណី។
លើសពីនោះ អង្គការលើកលែងទោសនេះ បានកត់ត្រាថា មនុស្សជាង៥០០នាក់ត្រូវបានទទួលរងនូវអំពើហិង្សាពីសំណាក់ប៉ូលិស រួមទាំងការចាប់ខ្លួនតាមអំពើចិត្ត អំពើហិង្សាលើរាងកាយ និងការប្រើប្រាស់ឧស្ម័នបង្ហូរទឹកភ្នែកដោយមិនត្រឹមត្រូវរវាងថ្ងៃទី២២ និងទី២៩ ខែសីហា ក្នុងអំឡុងពេលបាតុកម្មប្រឆាំងនឹងការផ្លាស់ប្ដូរច្បាប់បោះឆ្នោតនៅក្នុងទីក្រុងចំនួន១៤ នៅទូទាំងប្រជុំកោះ។ លោក អ៊ូសម៉ាន បានលើកឡើងថា៖«វាបានបង្ហាញថា ប៉ូលិសបច្ចុប្បន្នក្លាយទៅជាផ្តាច់ការ-គាបសង្កត់ មិនមែនជាប៉ូលិសប្រជាធិបតេយ្យ-មនុស្សជាតិ ដូចដែលបានសន្យា ឬកំណត់ដោយច្បាប់»៕
