អភិបាលខេត្តបាត់ដំបង ណែនាំយោធិនត្រូវស្មោះត្រង់ និងការពាររាជរដ្ឋាភិបាលស្របច្បាប់ដែលកើតចេញពីការបោះឆ្នោត មិនត្រូវជឿតាមការញុះញង់របស់ក្រុមជនអគតិដែលមានបំណងបំផ្លាញសន្តិភាពនោះទេ

ភ្នំពេញ៖ ឯកឧត្តម សុខ លូ អភិបាលនៃគណៈអភិបាលខេត្តបាត់ដំបង បានអញ្ជើញសំណេះសំណាល និងជូនដំណើរយោធិននៃកងរាជអាវុធហត្ថទើបជ្រើសរើសថ្មីចូលហ្វឹកហ្វឺននៅមជ្ឈមណ្ឌលហ្វឹកហ្វឺនកងរាជអាវុធហត្ថភ្នំជុំសែនរីករាយ ខេត្តកំពង់ឆ្នាំង ដែលពិធីនេះធ្វើឡើងនៅថ្ងៃទី៥ ខែធ្នូ ឆ្នាំ២០២៤ នាទីបញ្ជាការដ្ឋានកងរាជអាវុធហត្ថខេត្តបាត់ដំបង។

ថ្លែងក្នុងឱកាសនោះឯកឧត្តម សុខ លូ បានណែនាំដល់យោធិនទាំងអស់ត្រូវគោរពវិន័យ ខិតខំប្រឹងប្រែងហ្វឹកហាត់យកចំណេះជំនាញមកបម្រើប្រជាពលរដ្ឋ ជាពិសេសដាច់ខាតកងកម្លាំងត្រូវស្មោះត្រង់ និងការពាររាជរដ្ឋាភិបាលស្របច្បាប់ដែលកើតចេញពីការបោះឆ្នោត មិនត្រូវជឿតាមការញុះញង់របស់ក្រុមជនអគតិដែលមានបំណងបំផ្លិចបំផ្លាញសន្តិភាពនោះទេ។

ឯកឧត្តម សុខ លូ សង្កត់ធ្ងន់ថា ទោះក្នុងតម្លៃណាក៏ដោយកងកម្លាំងដាច់ខាតត្រូវការពារសុខសន្តិភាព និងសមិទ្ធផលដែលរាជរដ្ឋាភិបាលសម្រេចបានកន្លងមក ខណៈសន្តិភាពរកបានដោយលំបាកតាមរយៈការបូជាសាច់ស្រស់ឈាមស្រស់  ប៉ុន្តែការការពារសុខសន្តិភាពកាន់តែពិបាកប្រសិនបើធ្វេសប្រហែសតែបន្តិចប្រទេសជាតិនឹងវិលធ្លាក់ទៅក្នុងភ្នក់ភ្លើងសង្រ្គាមជាមិនខាន។

ឯកឧត្តម សុខ លូ បានណែនាំដល់យោធិនទាំងអស់ត្រូវធ្វើជាគំរូរបស់ប្រជាពលរដ្ឋ ចៀសឆ្ងាយពីគ្រឿងញៀន គោរពច្បាប់ចរាចរណ៍ និងចូលរួមថែរក្សាអនាម័យបរិស្ថាន។

ឯកឧត្តម សុខ លូ បានរំលឹកពីបទបញ្ជារបស់រាជរដ្ឋាភិបាលក្នុងការចាត់វិធានការបញ្ចប់មុខតំណែង និងបណ្ដេញចេញពីក្របខណ្ឌដោយគ្មានការលើកលែងចំពោះមន្រ្តីរាជការស៊ីវិល មន្រ្តីនគរបាលជាតិ និងយោធិន ព្រមទាំងមន្រ្តីកិច្ចសន្យាណាដែលត្រូវបានរកឃើញថាមានការប្រើប្រាស់គ្រឿងញៀនខុសច្បាប់ ឬមានការពាក់ព័ន្ធនឹងគ្រឿងញៀនខុសច្បាប់។បន្ទាប់ពីបណ្ដេញចេញពីក្របខណ្ឌមន្រ្តីរាជការ និងកងកម្លាំងទាំងនោះនឹងត្រូវបញ្ជូនទៅមជ្ឈមណ្ឌលបន្សាបគ្រឿងញៀនថែមទៀតផង។

តំណាងយោធិននៃកងរាជអាវុធហត្ថទើបជ្រើសរើសថ្មី បានប្ដេជ្ញាស្មោះត្រង់ចំពោះជាតិ សាសនា ព្រះមហាក្សត្រ និងគោរពអនុវត្តន៍ម៉ឺងមាត់តាមបទបញ្ជារបស់ថ្នាក់ដឹកនាំ។
សូមបញ្ជាក់ថា យោធិននៃកងរាជអាវុធហត្ថខេត្តបាត់ដំបងទើបជ្រើសរើសថ្មីដែលបានប្រឡងជាប់ជាស្ថាពរមានចំនួន៥២នាក់ និងជាប់ត្រៀមបម្រុង៦នាក់ ក្នុងចំណោមបេក្ខជនដាក់ពាក្យសរុប៦០១នាក់៕